ހދ. ވައިކަރަދޫގައި އުމުރުން 81 އަހަރުގެ އަންހެނަކަށް ޖިންސީ ގޯނާ ކުރި ކަމަށް ބުނާ މައްސަލައެއް ތަހުގީގު ކުރަމުންދާ ކަމަށް ފުލުހުން މިއަދު ބުނެފި އެވެ.

އެ މައްސަލައިގައި ތުހުމަތު ކުރެވޭ ފިރިހެން މީހާ މިހާރު ވައިކަރަދޫއިން ފުރާފައިވާ ކަމަށާއި އެއީ ރަށުން ބޭރު މީހެއް ކަމަށް، އެ މައްސަލަ ހުށަހެޅި ފަރާތުން ސޯޝަލް މީޑިއާގައި ބުނެފައިވެ އެވެ.

އެކަމާ ގުޅިގެން މިއަދު މި ނޫހުން ފުލުހުންގެ މީޑިއާ ޑިޕާޓްމަންޓަށް ގުޅުމުން، ފޯނަށް ޖަވާބު ދިން މީހަކު ނަން ހާމަކުރުމަށް ދެކޮޅު ހެދުމަށްފަހު ބުނީ އެ މައްސަލައިގައި މިހާތަނަށް މީހަކު ހައްޔަރުކޮށްފައިނުވާ ކަމަށެވެ.

"ބަލަންޖެހޭ ކަންކަން ބަލަމުންދާ" ކަމަށް ބުނުން ފިޔަވައި، އެ މައްސަލައާ ގުޅިގެން ފުލުހުން ކުރާ އެއްވެސް މަސައްކަތެއް ވެސް މީޑިއާ ޑިޕާޓްމަންޓުން ހާމައެއް ނުކުރެ އެވެ.

އުމުރުން ދުވަސްވީ މީހަކަށް ޖިންސީ ފުރައްސާރަ ކުރި މައްސަލަ ފެންމަތިވީ، ޖިންސީ ފުރައްސާރައިގެ ޝިކާރައަކަށްވީ މީހާގެ ދަރިފުޅު ސޯޝަލް މީޑިއާ ޕްލެޓްފޯމް ޓުވިޓާގައި އެ މައުލޫމާތު ހިއްސާ ކުރުމުންނެވެ.