ޕެރިސް (އޮކްޓޫބަރު 18) - ޕީއެސްޖީ އަށް ކުޅެމުންދާ ފްރާންސްގެ ފޯވާޑް ކީލިއަން އެމްބާޕޭގެ ހަބަރެއް ކިޔުމަށް ވެސް ޝައުގުވެރިކަމެއް ނެތް ކަމަށް ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެ އެވެ.

މިދިޔަ ސީޒަނަށް ފަހު ރެއާލުން އެމްބާޕޭގެ ގެންދަން މަސައްކަތްތަކެއް ކުރި އެވެ. އެކަމަކު، ރެއާލްގެ ހުށަހެޅުމަށް ފުރަގަސްދީ، އެމްބާޕޭ ވަނީ ޕީއެސްޖީގެ ކޮންޓުރެކްޓް އާކޮށްފަ އެވެ. އެހެންކަމުން، އެމްބާޕޭއާ މެދު ޕެރޭޒް ހުރީ ވަރަށް ހިތްހަަމަނުޖެހިފަ އެވެ.

ޕީއެސްޖީއާ މެދު ހިތްހަމަނުޖެހިގެން، އެމްބާޕޭ އެ ކްލަބު ދޫކޮށްލަން ބޭނުންވާ ކަމަށް ބުނެ، މިދިޔަ ހަފުތާގައި ރިޕޯޓްތަކެއް ވަނީ ފެތުރިފަ އެވެ. އެކަމަކު، އެމްބާޕޭ ވަނީ އެ ވާހަކަތައް ދޮގުކޮށްފަ އެވެ.

"އަހަރެންގެ އެއްވެސް ޝައުގުވެރިކަމެއް ނެތް އެމްބާޕޭއާ ގުޅޭ ވާހަކައަކަށް. އެކަމާ ގުޅޭ ހަބަރެއް ވެސް ނުކިޔަން،" ސްޕެއިންގެ ރޭޑިއޯ ޗެނަލްއަކަށް ދެއްވި އިންޓަވިއުއެއްގައި ޕެރޭޒް ރޭ ވިދާޅުވި އެވެ.

ރެއާލްގެ ފޯވަޑް ކަރީމް ބެންޒެމާ އަށް ވަނީ ރޭ ބެލޮންޑިއޯ އެވޯޑް ލިބިފަ އެވެ. އަދި ރެއާލްގެ ފޯވަޑް ވިނީއަސް ޖޫނިއާ ވަނީ ޝޯޓްލިސްޓްގެ ގަދަ ދިހައެއްގައި ހިމެނިފަ އެވެ. އަހަރުގެ އެންމެ މޮޅު ގޯލްކީޕަރަށް ދޭ ޔަޝިން ޓްރޮފީ ރެއާލް ގޯލްކީޕަރު ތީބައު ކޯޓުއާ ހޯދިއިރު، ބެލޮންޑިއޯގެ ގަދަ ދިހައެއްގައި އޭނާ އާއި ރެއާލްގެ މިޑްފީލްޑަރު ލޫކަ މޮޑްރިޗް ވެސް ހިމެނުނެވެ.

ޕެރޭޒް ބުނީ ބެންޒެމާ އަށް ބެލޮންޑިއޯ އެވޯޑް "ހައްގު" ކަމަށެވެ. އަދި ރެއާލްގައި މިހާރު ތިބި ފޯވަޑުން ވަރަށް ހަލުވިކަމާ އެކު ކުރިއެރުން ހޯދަމުންދާ ކަމަށާއި ރެއާލްގެ ހުރިހާ ސަމާލުކަމެއް އޮތީ މި ވަގުތު ޓީމުގައި ތިބި ކުޅުންތެރިންނަށް ކަމަށެވެ.

"މެޑްރިޑްގެ ސަމާލުކަން ހުސްވެފައި އޮތީ މިހާރު ތިބި ކުޅުންތެރިންނަށް. އެ ކުޅުންތެރިން ވަނީ އަހަރަމެންގެ ލޯބި ހޯދައިފައި،" ޕެރޭޒް ބުންޏެވެ.

ޕެރޭޒް ވިދާޅުވީ ވިނީޝިއުސް އާއި ރޮޑްރީގޯގެ ކިބައިގައި މުސްތަގުބަލުގައި ބެލޮންޑިއޯ ހޯދޭނެ ފެންވަރު އެބަހުރި ކަމަށެވެ.