އުދައިގެ އިންޒާރު ދޭ ނިޒާމެއް ދިވެހި މާހިރަކު ފަރުމާކޮށް ޓެސްޓުކުރަން ފަށައިފި އެވެ.

އެފަދަ ނިޒާމެއް ޓެސްޓުކުރަމުން އަންނަ ކަމަށް، ކޯސްޓަލް އިންޖިނިއަރިން ދާއިރާއިން ޕީއެޗްޑީ ހާސިލް ކުރައްވާފައިވާ ޑރ. އަހުމަދު ނަޝްވާން އަބްދުލް މަތީން ހާމަކުރެއްވީ މިދިޔަ ބުދަ ދުވަހު އދ. ދިގުރަށަށް އެރި ބާރުގަދަ އުދައަށްފަހު އެވެ.

ކަނޑާއި ޖައްވު މޮނިޓަކުރާ އެމެރިކާގެ ނޭޝަނަލް އޯޝަނިކް އެންޑް އެޓްމޮސްފެރިކް އެޑްމިނިސްޓްރޭޝަން (އެންއޯއޭއޭ) ގެ ޑޭޓާ އާއި ރާއްޖޭގެ ކަނޑާއި ރާޅުތަކުގެ މައުލޫމާތު ބޭނުން ކޮށްގެން ޑރ. ނަޝްވާން ހެދި ދިރާސާއިން އެނގުނު ގޮތުގައި، ދިގުރަށަށް އުދަ އެރުމުގެ ތިން ދުވަސް ކުރިން އެކަން ދެނެގަތުމުގެ ފުރުސަތު އޮތެވެ.

"[އެމެރިކާގެ އެންއޯއޭއޭގެ ޑޭޓާ] އިން ދައްކާނެ ރާއްޖޭގެ ވެސް ރާޅުތައް ކުރިއަށް އޮތް 14 ދުވަހު ހުންނާނީ ކިހިނެއްތޯ، ދެން އެޔަށް ބަލާފަ، މިސާލަކަށް ދިގުރަށް ކައިރީ ޑޭޓާ ޕޮއިންޓަކުން ލިބޭ ޑޭޓާއިން މި ބަލަނީ ކިހާވަރެއްގެ ރާޅެއްތޯ، ދެން އެ ރާޅުތައް ދިމާވަނީ ދިޔަވަރުގެ ކިހާ ހިސާބަކަށްތޯ، އެ މައުލޫމާތުތަކަށް ބަލާފަ މި ބަލަނީ އުދަ އެރުމުގެ ޖާގަ އޮތްތޯ،" އުދައިގެ އިންޒާރުދޭ ނިޒާމާ ގުޅޭ ގޮތުން ޑރ. ނަޝްވާން "އަދަދު" އަށް ވިދާޅުވި އެވެ.

ޑރ. ނަޝްވާން ބެއްލެވެި ގްރާފްސް: އޭނާ ވިދާޅުވީ އުދަ އެރުމުގެ ތިން ދުވަސް ކުރިން އެކަން އެނގުމުގެ ފުރުސަތު އޮތް ކަމަށް -- ފޮޓޯ: ޓުވިޓާ

އެފަދަ ނިޒާމެއް ގާއިމު ކުރެވިއްޖެ ނަމަ، ވަކި މުއްދަތެއް ކުރިން އުދަ އަރާނެކަން ދެނެގަނެވި ތައްޔާރުވާން ފުރުސަތު ލިބޭނެ ކަމަށް ޑރ. ނަޝްވާން ވިދާޅުވި އެވެ.

"[އެއިރުން] މިސާލަކަށް ދަންވަރު ދޭއް ޖަހާއިރު އުދަ އަރާފާނެ ކަމަށް ތައްޔާރުވާން އެނގޭނެ،" ތިމާވެއްޓާ ގުޅޭ ދިރާސާތަކެއް ކުރައްވާފައިވާ ޑރ. ނަޝްވާން ވިދާޅުވި އެވެ.

ކުރިއަށް އޮތް ތަނުގައި މޫސުމީ ބަދަލުތަކުގެ ސަބަބުން ދިމާވާ ހާދިސާތައް އިތުރުވެ، ލިބޭ ގެއްލުން ބޮޑުވުމުގެ ފުުރުސަތު އެބަ އޮތްކަން ފާހަގަ ކުރައްވަމުން ޑރ. ނަޝްވާން ވިދާޅުވީ ގުދުރަތީ ހާދިސާތަކަށް ދުރާލާ ތައްޔާރުވުން މުހިންމު ކަމަށެވެ.

އުދައިގެ އިންޒާރު ދޭ ނިޒާމާ ގުޅޭ ގޮތުން އެންވާރަމެންޓް މިނިސްޓްރީއާ ވަނީ މަޝްވަރާކޮށްފަ އެވެ. ގްރީން ކްލައިމެޓް ފަންޑުގެ ދަށުން މި ނިޒާމު ގާއިމުކުރަން ފައިސާ ލިބޭތޯ މަސައްކަތް ކުރައްވާއިރު، ނޭޝަނަލް ޑިޒާސްޓާ މެނޭޖްމަންޓް ސެންޓަރާއި މޫސުމާބެހޭ ގައުމީ އިދާރާއާ ގުޅިގެން މި ނިޒާމު ގާއިމުކުރަން ފަންޑު ހޯއްދަވަން މަސައްކަތް ކުރައްވާ ކަމަށް ވެސް ޑރ. ނަޝްވާން ވިދާޅުވި އެވެ.

ދިގުރަށަށް އެރި އުދަ

އދ. ދިގުރަށަށް އެރި ބާރުގަދަ އުދައާ ގުޅޭ ގޮތުން ޑރ. ނަޝްވާން ވިދާޅުވީ އާންމުކޮށް އުދަ އަރަނީ ތޫފާންތަކުން އުފައްދާ ބާރުގަދަ އުސް ރާޅުތަކާއި، ބޮޑު ދިޔައާ ދިމާވުން ކަމަށެވެ. އަދި އާންމުކޮށް ހުޅަނގު މޫސުމުގައި އުދަ އަރަނީ ހުޅަނގު ބިތުގައި ހުންނަ ރަށްރަށަށް ކަން ވެސް އޭނާ ފާހަގަ ކުރެއްވި އެވެ.

ނަމަވެސް, މިފަހަރު ދިގުރަށަށް އެރި އުދައަކީ އާދަޔާ ހިލާފު އުދައެއް ކަމަށް އޭނާ ވެސް ވިދާޅުވި އެވެ.

ދިގުރަށަށް އުދަ އަރާފައިވަނީ ރަށުގެ އިރު އިތުރުންނެވެ. އެހެން ވެދާނެ ސަބަބަކީ ޑރ. ނަޝްވާން ވިދާޅުވި ގޮތުގައި އިންޑިއާ ސަރަހައްދުން އުފެއްދި ބާރުގަދަ ބިޔަ ރާޅުތަކެވެ. ރާއްޖޭގެ އެންމެ ބޮޑު ދިޔަ އާއި އެ ސާޖްއާ ދިމާވީ ކަމަށް އޭނާ ވިދާޅުވި އެވެ.