އެފްއޭ ކަޕް ފުޓްބޯޅަ މުބާރާތުގެ ދެ ވަނަ ސެމީ ފައިނަލުގައި މިރޭ ޕެނަލްޓީ ޖަހައިގެން ސުޕަ ޔުނައިޓެޑް ސްޕޯޓްސް (ސަސް) އަތުން 5-4 އިން މޮޅުވެ، ކްލަބް ވެލެންސިއާ އިން އެފްއޭ ކަޕްގެ ފައިނަލުގެ ފަހު ޖާގަ ހޯދައިފި އެވެ.

އަންނަ އާދިއްތަ ދުވަހުގެރޭ ވެލެންސިއާ އިން އެފްއޭ ކަޕްގެ ފައިނަލުގައި ކުޅޭނީ މާޒިޔާ ސްޕޯޓްސް އެންޑް ރެކްރިއޭޝަނާ އެވެ. މާޒިޔާ އިން ފައިނަލަށް ދަތުރުކުރީ މިއަދު ހަވީރު ފުރަތަމަ ސެމީގައި ކްލަބް ގްރީން ސްޓްރީޓްސް 3-1 އިން ބަލިކޮށްގެންނެވެ. އާދިއްތަ ދުވަހު ހަވީރު ތިން ވަނަ ހޮވާ މެޗުގައި ސަސް އިން ގްރީން ސްޓްރީޓްސްއާ ބައްދަލުކުރާނެ އެވެ.

މި އަހަރުގެ ޖެނުއަރީ މަހުގައި ކުޅުނު ޕްރެޒިޑެންޓްސް ކަޕް ފައިނަލުގައި މާޒިޔާ އަތުން ވެލެންސިއާ ވަނީ 2-1 އިން މޮޅުވެފަ އެވެ.

ގަލޮޅު ދަނޑުގައި މިރޭ ކުޅުނު ސެމީ ފައިނަލްގެ ދެ ވަނަ މެޗުގައި ވެލެންސިއާ އިން ލީޑުނެގީ މެޗުގެ 57 ވަނަ މިނިޓްގައި އަބްދުﷲ ހަނީފް (ބެންޖޯ) ޖެހި ގޯލުންނެވެ. މި ސީޒަން ފެށިއިރު، ސަސްގެ ކެޕްޓަން ބޭންޑް އަޅައިގެން ކުޅުނު ބެންޖޯ، ވެލެންސިއާ އަށް މި ގޯލު ޖަހައިދިނީ އަރިމަތިން އެ ޓީމުގެ އަބްދުﷲ ޔާމީން (ޔާނު) ނަަގައިދިން ހުރަހަކުން ބޮލުންނެވެ. އެ ބޯޅަ ޖަހަން ވެލެންސިއާގެ އިސްމާއިލް އީސަ (މެސީ) ވެސް އެރިއިރު، ބޯޅަ ގޯލަށް ވަނީ ބެންޖޯ ބޮލުގައި ޖެހިފަ އެވެ.

ވެލެންސިއާ މޮޅުވާނެ ކަމަށް ބަލަހައްޓައިގެން ތިއްބައި ސަސް އިން އެއްްވަރުކުރީ މެޗުގެ އިތުރު ވަގުތުގަ އެވެ. އިތުރު ވަގުތުގެ ދެ ވަނަ މިނިޓްގައި ސަސްގެ ގޯލު ޖެހީ، ކުރިން ދަ ގްރާންޑޭ ސްޕޯޓްސް ކްލަބަށް ކުޅުނު ފޯވާޑް، އަހުމަދު ހުސާމް އެވެ. އޭރިއާތެރެއިން ވެލެންސިއާގެ ޑިފެންޑަރުން ކައިރިން ދެމިގަތުމަށް ފަހު ހުސާމް ބޯޅަ ގޯލަށް ވައްދާލީ ގޯލުގެ ހަނި އޭންގަލުންނެވެ. ވެލެންސިއާ ގޯލުގައި ހުރި އާދަމް އިމްއާން ފައިގައި ޖެހިފައި ބޯޅަ ވަނީ ގޯލަށެވެ.

މެޗުގެ ފުރިހަމަ ވަގުތާއި އިތުރު ވަގުތުގެ ދެ ހާފް ނިމުނުއިރު، މެޗު އޮތީ 1-1 އިން އެއްވަރުވެފަ އެވެ. ނަތީޖާ ނެރެން ޖެހުނީ ޕެނަލްޓީ ޖަހާށެވެ.

ސަސްގެ ފުރަތަމަ ޕެނަލްޓީ ހުސާމް ފޮނުވާލިއިރު ކީޕަރު އިމްއާން ވަނީ މަތަކޮށްފަ އެވެ. ވެލެންސިއާގެ ފުރަތަމަ ޕެނަލްޓީ ވައްދާލީ ޔާނު އެވެ. ސަސްގެ ދެ ވަނަ ޕެނަލްޓީ އަހުމަދު އައިހަމް ކާމިޔާބުކުރިއިރު، ވެެލެންސިއާގެ ދެ ވަނަ ޕެނަލްޓީ ބެންޖޯ ފޮނުވާލުމުން ސަސްގެ ކީޕަރު ޔޫސުފް މައިސަމް އަބްދުﷲ ވަނީ މަތަކޮށްފަ އެވެ. ސަސްގެ ތިން ވަނަ ޕެނަލްޓީ މުހައްމަދު އަލާއު ކާމިޔާބުކުރިއިރު، ވެލެންސިއާގެ ތިން ވަނަ ޕެނަލްޓީ އައްސަދު އަލީ (އަޑޭ) ވަނީ ގޯލަށް ފޮނުވާލައިފަ އެވެ.

ސަސްގެ ހަތަރު ވަނަ ޕެނަލްޓީ އަލީ ނަސޫހު ރަޝީދު (ޕިލާ) ކާމިޔާބުކުރިއިރު، ވެލެންސިއާގެ ހަތަރު ވަނަ ޕެނަލްޓީ މިސްރުގެ މިޑްފީލްޑަރު ހަލީލް ޖަމާލް ވަނީ ގޯލަށް ވައްދާލައިފަ އެވެ. ސަސްގެ ފަސް ވަނަ ޕެނަލްޓީ އައިހަމް އަހުމަދު ވައްދާލިއިރު، ވެލެންސިއާގެ ފަސް ވަނަ ޕެނަލްޓީ އީސަ ވަނީ ގޯލަށް ފޮނުވާލައިފަ އެވެ. ސަސްގެ ހަ ވަނަ ޕެނަލްޓީ މުހައްމަދު ނިޒާމް (ޕީކޭ) ފޮނުވާލިިއިރު، ކީޕަރު އިމްއާން ވަނީ އެ ބޯޅަ ހުއްޓުވައިފަ އެވެ.

ވެލެންސިއާ މޮޅުކޮށްދޭން ހަސަން ސުފިއާން (ސޫފީ) ޖެހި ޕެނަލްޓީ ބޭރުވީ ދަނޑީގައި ޖެހިފަ އެވެ. ސަސްގެ ހަތް ވަނަ ޕެނަލްޓީ އިބްރާހިމް ފާރިޝް އަހުމަދު ފޮނުވާލުމުން ދިޔައީ ބޭރުންނެވެ. ވެލެންސިއާ އަށް މި ފަހަރު މޮޅުވާން ލިބުނު ޕެނަލްޓީ އަލީ ސަމްދޫހު (އައްޔަ) ފޮނުވާލީ ހުރަސްދަނޑިމަތިންނެވެ. ސަސް އިން އަށް ވަނަ ޕެނަލްޓީ ޖަހަން ދިޔަ މުހައްމަދު ސާމިރު ބޭރަށް ޕެނަލްޓީ ޖެހުމުން، ތިން ވަނަ ފަހަރަށް މޮޅުވާން ލިބުނު ފުރުސަތުގެ ބޭނުންހިފައި އަބްދުﷲ މިދުހަތު ފަހުމީ (ބިޗަޑް) ވަނީ ގޯލަށް ބޯޅަ ވައްދާލައި، ވެލެންސިއާ އަށް ފައިނަލުގެ ޖާގަ ހޯދައިދީފަ އެވެ.

މުބާރާތުގައި މި ފަހަރު ވާދަކުރާ ޓީމުތަކުގެ ތެރެއިން އެންމެ ފަހުން ޗެމްޕިއަންކަން ހޯދީ ވެލެންސިއާ އެވެ. ވެލެންސިއާ އިން ވަނީ 2016 ވަނަ އަހަރު ޓީސީ ސްޕޯޓްސް ކްލަބް ބަލިކޮށްގެން އެ ފަހަރުގެ އެފްއޭ ކަޕްގެ ޗެމްޕިއަންކަން ހޯދައިފަ އެވެ.

އެންމެ ފަހުން އެފްއޭ ކަޕް ކުޅުނީ 2017 ވަނަ އަހަރު އެވެ. އެ ފަހަރު ފައިނަލުގައި ތަށި އުފުލާލީ ނިއު ރޭޑިއަންޓެވެ. އޭގެ ފަހުން މިދިޔަ އަހަރުތަކުގައި އެކި ސަބަބުތަކާ ހުރެ އެފްއޭ ކަޕް ނުބާއްވަ އެވެ.