އެފްއޭ ކަޕްގެ ކުއާޓާ ފައިނަލުގައި މިއަދު ހަވީރު ޕެނަލްޓީ ޖަހައިގެން ކްލަބް އީގަލްސް އަތުން 7-6 އިން މޮޅުވެ، ސުޕަ ޔުނައިޓެޑް ސްޕޯޓްސް (ސަސް) ފުރަތަމަ ފަހަރަށް މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.

ސަސް އިން ވަނީ މި ފަހަރުގެ އެފްއޭ ކަޕްގައި ކުޅުނު ފުރަތަމަ މެޗުން ބިސް ބުރު ސްޕޯޓްސް ކްލަބް އަތުން 10-0 އިން މޮޅުވެފަ އެވެ. އަންނަ ބުރާސްފަތި ދުވަހުގެރޭ ކުޅޭ ސެމީ ފައިނަލުގައި ސަސް ކުޅޭނީ 2016 ވަނަ އަހަރުގެ ޗެމްޕިއަން ކްލަބް ވެލެންސިއާއާ އެވެ. އެ ދުވަހު ހަވީރު ފުރަތަމަ ސެމީގައި މާޒިޔާ ސްޕޯޓްސް އެންޑް ރެކްރިއޭޝަން ނުކުންނާނީ ކްލަބް ގްރީން ސްޓްރީޓްސްއާ ދެކޮޅަށެވެ.

ގަލޮޅު ދަނޑުގައި މިއަދު ހަވީރު ކުޅުނު މެޗުގައި ލީޑުނެގީ ސަސް އިންނެވެ. މެޗުގެ 18 ވަނަ މިނިޓްގައި ސަސްގެ ގޯލު ޖެހީ އިބްރާހިމް އަތީގް ހަސަން (އިއްބެ) އެވެ. މެޗުގެ 31 ވަނަ މިނިޓްގައި އީގަލްސްގެ ބްރެޒިލް ފޯވާޑް، ބްރޫނޯ ވިނީޝިއުސް ވަނީ އެ ޓީމަށް އެއްވަރުކޮށްދީފަ އެވެ.

ދެ ވަނަ ހާފްގައި ކުޅުން ފަށައިގެން މެޗުގެ 68 ވަަނަ މިނިޓްގައި ސަސްގެ މުހައްމަދު ސާމިރު އެ ޓީމަށް ލީޑުނަގައިދިނެވެ. އީގަލްސް އަށް ދެ ވަނަ ފަހަރަށް އެއްވަރުކޮށްދިނީ މެޗުގެ 82 ވަނަ މިނިޓްގައި އަބްދުﷲ ޒިޔާން (ޖަންކީ) އެވެ. އަހުމަދު ރިޒުވާން (ރިޒޭ)ގެ ބަދަލުގައި ކުޅެން އެރިތާ ހަތް މިނިޓް ތެރޭ ޒިޔާން ވަނީ ގޯލު ޖަހައި ނަތީޖާ ހަމަހަމަކޮށްދީފަ އެވެ.

ނަތީޖާ ނެރެން ޕެނަލްޓީ ޖެހިއިރު، ކޮންމެ ޓީމެއް ވަނީ 10 ޕެނަލްޓީ ފޮނުވާލައިފަ އެެވެ. އީގަލްސް އިން ހަ ޕެނަލްޓީ ކާމިޔާބުކުރިއިރު، ސަސް އިން ވަނީ ހަތް ޕެނަލްޓީ ވައްދާލައިފަ އެވެ. ޕެނަލްޓީގައި ސަސްގެ ތަފާތަކީ ޒުވާން ކީޕަރު، ޔޫސުފް މީސަމް އަބްދުﷲ އެވެ. އޭނާ ވަނީ އީގަލްސްގެ ހަސަން ރާއިފް އަހުމަދު (ހަންނަ)، މުހައްމަދު ނާއިމް، ހިސާމް ސަލީމް (ކޮކީ) އަދި ސޮލާހު އަލީ (ސޮލާ) ޖެހި ޕެނަލްޓީތައް ހުއްޓުވައިފަ އެވެ.

ސަސް އިން ޕެނަލްޓީތައް ނާކާމިޔާބުވީ އައިހަމް އަހުމަދު، މުހައްމަދު ސަހާއު (ބޭލް) އަދި ސާމިރުގެ އެވެ.

އީގަލްސް އިން ޕެނަލްޓީ ކާމިޔާބުކުރީ ބްރޫނޯ، ހުސެއިން ސިފާއު ޔޫސުފް (ކުރޯ)، އަބްދުﷲ ސަމީހު މޫސާ (ސަމިއްޓެ)، ޝައިފުﷲ އިބްރާހިމް، ޒިޔާން އަދި ހުމެއިދު ހުސެއިން އެވެ. ސަސް އިން ޕެނަލްޓީތައް ކާމިޔާބުކުރީ އަހުމަދު ހުސާމް، އައިހަމް އަހުމަދު، އަލީ ނަސޫހު ރަޝީދު (ޕިލާ)، އަހުނަފް ރަޝީދު (އަހުއްކޮ)، މުހައްމަދު އަލާއު، މުހައްމަދު ނިޒާމް (ޕީކޭ) އަދި އަހުމަދު ހަމީދު (އައްމަޑޭ) އެވެ.

މިއީ ސަސް އިން މި ފަހަރު އީގަލްސް ބަލިކުރި ދެ ވަނަ ފަހަރެވެ. ޕްރެޒިޑެންޓްސް ކަޕްގައި ސަސް އިން ވަނީ 2-0 އިން އީގަލްސް ބަލިކޮށްފަ އެވެ. އެކަމަކު، ލީގުގެ ތިން މެޗުގައި ވެސް އީގަލްސް އިން ވަނީ ސަސްގެ މައްޗަށް 2-1 އިން ކުރިހޯދައިފަ އެވެ.

ސަސް އަތުން އެފްއޭ ކަޕްގައި ބަލިވުމާ އެކު އީގަލްސް އަށް ވަނީ މި ފަހަރުގެ ސީޒަން ނިމިފަ އެވެ.