މައިލޯ ގައުމީ ވޮލީބޯޅަ ލީގުގައި މިރޭ ކުޅުނު މެޗުން އޮއްފު އެފްސީ އަތުން މޮޅުވެ، ލީގުގެ ގަދަ ހަތަރެއް ޔަގީންކޮށް، ޕޮލިސް ކްލަބުން ގައުމީ މުބާރާތުގެ ޖާގައެއް ޔަގީންކޮށްފި އެވެ.

ގައުމީ ލީގުގެ ގަދަ ހަތަރަކަށް ކުރިއަށް އޮތް ގައުމީ މުބާރާތުން ފުރުސަތު ލިބޭނެ އެވެ. މިހާރު އޮތްގޮތުން ގައުމީ މުބާރާުތުން ތިން ޓީމެއް ވަނީ ފުރުސަތު ހޯދައިފަ އެވެ. އެއީ ލީގުގައި ބާކީ މެޗެއް އޮއްވައި، ޗެމްޕިއަންކަން ހޯދި ސްޕޯޓްސް ކްލަބް ސިޓީގެ އިތުރުން މިއަދު ކުޅުނު ދެ މެޗުން މޮޅުވި ސިފައިންނާއި ޕޮލިހެވެ.

ސިފައިން ވަނީ ހަވީރު ކުޅުނު މެޗުގައި ސީދާ ތިން ސެޓުން ގުޑީސް ސްޕޯޓްސް ކްލަބް ބަލިކޮށްފަ އެވެ.

ލީގު ބުރުގެ އެއް ވަނައިގައި އޮތް ސިޓީ އަށް ވަނީ ހަތަރު މެޗުން 12 ޕޮއިންޓް ލިބިފަ އެވެ. ސިފައިންނަށް ހަތަރު މެޗުން ނުވަ ޕޮއިންޓް ލިބިފައިވާއިރު، ތިން ވަނައިގައި އޮތީ ހަތަރު މެޗުން ހަތް ޕޮއިންޓް ހޯދާފައިވާ ޕޮލިހެވެ. ހަތަރު ވަނައިގައި އޮތް ކްލަބް ވެމްކޯ އަށް ވަނީ ތިން މެޗުން ފަސް ޕޮއިންޓް ލިބިފަ އެވެ.

ދެން އޮތް، އޮއްފު އެފްސީ އާއި ގުޑީސް އަށް އަދި މޮޅެއް ނުލިބެ އެވެ. ގުޑީސް ތިން މެޗު ކުޅުނުއިރު، އޮއްފު ވަނީ ހަތަރު މެޗު ކުޅެފަ އެެވެ. ލީގުގެ ގަދަ ހަތަރެއްގެ ފަހު ޖާގަ އަށް ވާދަކުރަނީ ގުޑީސް އާއި ވެމްކޯ އެވެ. މާދަމާރޭ ގުޑީސް އަތުން ވެމްކޯ މޮޅުވެއްޖެނަމަ ގަދަ ހަތަރެއް ޔަގީންވީ އެވެ.

ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗުގެ ސެޓުތައް ޕޮލިހުން ގެންދިޔައީ 25-23، 25-16 އަދި 25-13 އިންނެވެ.

ފުރަތަމަ ސެޓުގައި އޮއްފު އާއި ޕޮލިހުގެ ފަރާތުން ފެނިގެންދިޔައީ ވާދަވެރި ކުޅުމެކެވެ. ދެ ޓީމަށް ވެސް ފުރަތަމަ ސެޓުގެ މެދުތެރެއިން ލީޑު ލިބުނު ނަމަވެސް އޭގެ ބޭނުން ރަނގަޅަށް ހިފީ ޕޮލިހުންނެވެ. އެ ޓީމުން ވަނީ ސެޓުގެ މެދުތެރެއިން ލިބުނު ލީޑު ހިފަހައްޓައި، ފަހު ކޮޅު ޕްރެޝަރު ވަގުތުތަކުގައި ތަފާތު ދަައްކައިފަ އެވެ. ހާއްސަކޮށް ސެޓަރު، މުއްތުސާމީ އަޕަވޫ ދިން ބޯޅަތަކުގައި އެ ޓީމުގެ އަކިން އައްމާލް އާއި އަނޫ ޖޭމްސް އަދި މާއިޝް އަހުމަދުގެ އެޓޭކްތައް ފާހަގަކުރެވުނެވެ.

ދެ ވަނަ ސެޓު ފަށައިގެން އޮއްފު އިން ހަތަރު ޕޮއިންޓުގެ ލީޑެއްނެގި އެވެ. އެ ޓީމުގެ އިންޑިއާ ދެ ކުޅުންތެރިން ކަމަށްވާ، ގުރޫ ޕްރަސަންތާއި ޖޯން ޖޯސެފްގެ އެޓޭކްތައް ފެނުނުއިރު، އަހުމަދު މުހައްމަދު (ކޯކޭ) ވެސް ރަނގަޅަށް ކުޅުނެވެ.

އެކަމަކު، ދެ ވަނަ ސެޓުގެ މެދަކާ ހަމައިން ޕޮލިހުން އެއްވަރުކުރި އެވެ. އެ ގޮތުން މެޗުގެ ދެ ވަަނަ ސެޓުގައި 10-10 އާއި 11-11 އަދި 12-12 އިން ޕޮލިހާއި އޮއްފު އެއްވަރުވި ނަމަވެސް އޭގެ ފަހުން ޕޮލިހުން މެޗުގެ ކޮންޓްރޯލް ނެގި އެެވެ. ފަހުން ހަ ޕޮއިންޓަށް ލީޑުފުޅާކުރިއިރު، ޕޮލިހުގެ އަނޫ ޖޭމްސްގެ އެޓޭކްތަކާއި ޝުއައިބު އަބްދުލް ލަތީފްގެ ބްލޮކްތައް ވެސް ފެނިގެންދިޔަ އެވެ. އަދި ރަނގަޅު ލީޑެއް ފަހުން ނަގައި، ޕޮލިހުން ދެ ވަނަ ސެޓު ގެންގޮސް މެޗުގެ ކޮންޓްރޯލް މުޅިން ނެގި އެވެ.

ތިން ވަނަ ސެޓު ދިޔައީ، އޮއްފު އަށް އެއްވެސް ވަރަކަށް ވާދަނުކުރެވި އެވެ. ޕޮލިހުން ރަނގަޅަށް ކުޅެ، މި ސެޓު ގެންގޮސް މެޗުން މޮޅުވީ އެވެ.

ލީގުގައި މާދަމާ އޮތީ އެއް މެޗެވެ. މާދަމާރޭ ގުޑީސް އާއި ވެމްކޯ ކުޅޭ މެޗު ފަށާނީ 20:30 ގަ އެވެ.