ސިންގަޕޫރުގައި ހުންނަ ރާއްޖޭގެ ސަފީރުކަމަށް، ކުރީގެ ހޯމް މިނިސްޓަރު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަހުމަދު ތަސްމީން އަލީ އައްޔަން ކުރުމަށް ރައްޔިތުންގެ މަޖިލީހުން މިއަދު ރުހުން ދީފި އެވެ.

ކުރިން އެ މަގާމުގައި ހުންނެވި ހ. ޖެހޭ ވައި، އިބްރާހީމް ޝަހީބު، އިންޑިއާއަށް ބަދަލުކޮށް، އެމަގާމަށް ތަސްމީން އައްޔަން ކުރުމަށް ރުހުން ހޯދުމަށް މަޖިލީހަށް ހުށަހެޅީ މި މަހުގެ 15 ވަނަ ދުވަހު އެވެ.

ތަސްމީނަށް ރުހުން ދިނުމާމެދު މިއަދު ނެގި ވޯޓުގައި އޭނާއަށް ރުހުން ދިނުމަށް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 58 މެންބަރުންގެ އިއްތިފާގުންނެވެ.

މެލޭޝިއާގައި ހުންނަވާ ރާއްޖޭގެ ސަފީރުކަމުގައި ކުރިން ހުންނެވީ ވިސާމް އަލީ އެވެ. އެއީ ތަސްމީނުގެ އަނބިކަނބަލުންނެވެ.

ސިންގަޕޫރު ސަފީރުކަމަށް އައްޔަންކުރަން ރުހުން ހޯދަން މިއަދު ހުށަހެޅުއްވި ތަސްމީނަކީ ކުރީގެ ރައީސް މައުމޫނު އަބްދުލް ގައްޔޫމުގެ ސަރުކާރުގެ ފަހު ދައުރުގައި ހޯމް މިނިސްޓަރަކަށް ހުންނެވި ބޭފުޅެކެވެ. މައުމޫނަށް ނާކާމިޔާބު ވެވަޑައިގެންނެވި، 2008 ވަނަ އަހަރުގެ ރިޔާސީ އިންތިހާބުގައި އެމަނިކުފާނުގެ ރަނިން މޭޓަކީ ވެސް ތަސްމީނެވެ. އޭރު މައުމޫނު އިސްކޮށް ހުންނަވައިގެން އުފެއްދެވި ޑީއާރްޕީގެ ލީޑަރުކަން ވެސް ތަސްމީނު ކުރެއްވި އެވެ.

އޭނާ ފަހުން ވަނީ މިހާރު ވެރިކަންކުރާ ކޯލިޝަނުގެ މައި ޕާޓީ އެމްޑީޕީއާ ގުޅިވަޑައިގެންފަ އެވެ.