ނިމިދިޔަ އަހަރުގެ ފެބްރުއަރީ މަހު ގއ. މާމެންދޫގައި މާރާމާރީ ހިންގައި އެ ރަށު ލިލީ އޮފް ދަ ވެލީ، އަހްމަދު އުދައްޔު މަރާލި މައްސަލާގައި ދައުވާ އުފުލާފައިވާ މީހުންނާ ދެކޮޅަށް ދައުލަތުން ހުށަހަޅާ ހެކިންގެ ހެކިބަސް މި މަހުގެ ނިޔަލަށް ނަގައި ނިންމަން ކޯޓުން ތާވަލެއް އެކުލަވާލައިފި އެވެ.

މި މައްސަލާގައި ގއ. މާމެންދޫ، ރިހިފަރުދާގޭ، އަހުމަދު ޝަމީމްއާއި ހަމަ އެ ރަށު ބިލަތްމާގޭ، ޝަރަފު ރަޝީދާއި ގުލްފާމުގޭ، މުހައްމަދު މާޒިންގެ މައްޗަށް ދައުލަތުން ކުރާ ދައުވާއަކީ ގަސްތުގައި މީހަކު މެރުމުގައި ބައިވެރިވުމުގެ ދައުވާގެ އިތުރަށް މާރާމާރީ ހިންގުމުގައި ބައިވެރިވުމުގެ ދައުވާ އެވެ.

ޝަރީއަތް ފެށުމުގެ ކުރިއަށް ހުރިހާ ފަރާތަކުން ވެސް ހުށަހަޅާ ހުށަހެޅުންތަކަށް ގޮތެއް ނިންމުމަށް ފަހު މައްސަލަ ބައްލަވާ ގާޒީ އަލީ ނަދީމް ވިދާޅުވީ މި މަހުގެ 12 ވަނަ ދުވަހުން ފެށިގެން 30 ދުވަހާ ހަމައަށް ރަސްމީ ބަންދު ދުވަސް ފިޔަވައި ކޮންމެ ދުވަހަކު ހެކިބަސް ނެގުން އޮންނާނެ ކަމަށެވެ.

"މިއިން ކޮންމެ ދުވަހެއްގެ މެންދުރުފަހު ތިނެއް ޖަހާއިރަށް އަޑުއެހުމެއް ބާއްވަން، ކޮންމެ ދުވަހަކަށް ތިން ހެކިން ހާޒިރު ކުރަން ޝަރީއަތުން ގަސްދު ކުރަނީ،" ޝަރީއަތް ދެން ކުރިއަށް ގެންދަން ރާވާފައިވާ ތާވަލަށް އިޝާރާތް ކުރައްވައި ގާޒީ ވިދާޅުވި އެވެ.

މި މަހުގެ 12 ވަނަ ދުވަހު ހެކިބަސް ނަގަން ފެށުމަށް ޓަކައި، މި މަހުގެ ނުވަނަ ދުވަހަށް ހެކިންގެ ލިސްޓެއް ދައުލަތުން ފޮނުވަން ވެސް ގާޒީ އެންގެވި އެވެ. ލިސްޓު ފޮނުވާއިރު، ކޮންމެ ހާޒިރު ކުރަނީ ކޮން ދުވަހަކު ކަން އެނގޭނެ ގޮތަކަށް ފޮނުވަން ގާޒީ އިރުޝާދު ދެއްވި އެވެ.

ޝަރީއަތުގެ މަރުހަލާ އާންމު ގޮތެއްގައި ފަށާނީ ދެ ފަރާތުން އިފްތިތާހީ ބަޔާނެއް އިއްވާ ގޮތަށެވެ. އެއަށް ފަހު ފުރަތަމަ ނަގާނީ ދައުލަތުން ހުށަހަޅާފައިވާ ހެކިންގެ ހެކިބަހެވެ. ދިފާއަށް ހުށަހަޅާފައިވާ ހެކިންގެ ހެކިބަސް ނަގާނީ، ދައުލަތުން ހުށަހަޅާ ހެކިންނަށް ފަހުގަ އެވެ.

ގިނަ ދިފާއީ ހެކިން ބަލައިނުގަންނަން ނިންމުން

މި މައްސަލާގައި ދިފާއީ ހެކި ހުށަހެޅީ ޝަމީމްގެ ފަރާތުން އެކަންޏެވެ. 10 ހެއްކެއް ހުށަހެޅިއިރު އެއިން ހަތް ހެއްކަކީ ހާދިސާ ހިނގި ވަގުތު ޝަމީމް އެ ތަނުގައި ނެތް ކަމުގެ ދިފާއު ބިނާ ކުރަން ހުށަހެޅި ހެކިތަކެކެވެ.

ދައުލަތުން ހުށަހެޅީ އެ ހަތް ހެކި ބަލައިނުގަތުމަށެވެ. ދައުލަތުގެ ނުކުތާއަކީ ހާދިސާ ހިނގި ތަނުގައި ނެތް ކަމުގެ ދިފާއު ނަގައި، އެ ކަން ސާބިތު ކުރަން ހެކި ހުށަހަޅާނަމަ ކުރިން ހާމަ ކުރަން ޖެހޭ ކަމަށް ޖިނާއީ އިޖުރާއަތުގެ ގާނޫނުގައި ބަޔާން ކުރާ މާއްދާ އެވެ.

ގާޒީ ނަދީމް ވެސް ބުރަވީ ދައުލަތުގެ ނުކުތާއަށެވެ. ތަހުގީގު މަރުހަލާގައި ތުހުމަތު އަމާޒުވި އިރު ހާދިސާ ހިނގި ތަނުގައި ނެތް ކަމަށް ޝަމީމް ފާހަގަ ކޮށްފައި ނެތުމުން ދިފާއުގައި ހުށަހެޅި ހަތް ހެކި ބަލައިނުގަންނަން ގާޒީ ނިންމެވި އެވެ.

ދައުލަތުގެ ފަރާތުން ސިއްރު 25 ހެއްކެއް ހުށަހަށަޅާފައިވެ އެވެ. އެ ހެކިންގެ ހެކިބަސް އެހެން ތަނެއްގައި ބައިތިއްބައިގެން، ޓެކްނޮލޮޖީގެ ވަސީލަތްތައް މެދުވެރިކޮށް އަޑު ބަދަލުކޮށްގެން ހެކިބަސް ނަގަން ދައުލަތުން ހުށަހެޅި އެވެ. ދައުލަތުގެ އެ ހުށަހެޅުން ޝަރީއަތުން ބަލައިގަތެވެ.

ޝަމީމްއާއި މާޒިންގެ ފަރާތުން ވެސް ހުށަހެޅުންތަކެއް ހުށަހެޅި އެވެ. އޭގެ ތެރޭގައި ދައުވާ ފުރިހަމަ ނުވާ ކަމަށް ކަނޑައެޅުމާއި، ދައުލަތުގެ ހެކިތަކުގެ ތެރޭގައި ދައުވާ ރައްދުވާ މީހުނާއި ގުޅުން އޮތް މީހުންގެ ހެކިބަސް ބަލައިނުގަތުން ހިމެނެ އެވެ. މިއިން އެއްވެސް ހުށަހެޅުމެއް ޝަރީއަތުން ބަލައެއް ނުގަތަވެ.

މައްސަލައިގެ ފަސްފަހަތް

އުދައްޔުގެ މަރާ ގުޅިގެން ކުޑަކުއްޖެއްގެ މައްޗަށް ވެސް ދައުވާ ކޮށްފައިވެ އެވެ. ކުޑަކުއްޖަކަށް ވުމުން އޭނާގެ މައްސަލަ ކުރިއަށް ދަނީ ޖުވެނައިލް ކޯޓުގަ އެވެ.

މީހަކު މެރުމުގެ ކުށުގެ ދައުވާއާއި މާރާމާރީ ހިންގުމުގެ ކުށުގެ ދައުވާ އެ ކުއްޖާއަށް ކުރާއިރު، އުދައްޔު މަރުވީ އެ ކުއްޖާ ދިން ހަމަލާއަކުން ހާލަތު ގޯސްވެ ހޮސްޕިޓަލުގައި ފަރުވާ ދެމުން ދަނިކޮށެވެ.

އުދައްޔު މަރާލީ ފެބްރުއަރީ 8، 2021 ގެ ރޭ 10 ޖަހާކަށް ހާއިރު ކަމަށް ފުލުހުން ބުނެފައިވެ އެވެ. މިއީ މާމެންދޫގައި ދެ ގްރޕެއްގެ ދެމެދުގައި މާރާމާރީއެއް ކަމަ ވެސް ފުލުހުން ބުނެފައިވެ އެވެ.

އުދައްޔުގެ ފުރަގަހުން ފުއްޕާމެއާ ދިމާލަށް ތަކުރާރުކޮށް ވަޅި ހަރާފައި ހުރި ކަމަށް ވެއެވެ. މި މާރާމާރީގައި އުދައްޔުގެ ބޭބެއަށް ވެސް ސީރިއަސް އަނިޔާތަކެއް ލިބުނެވެ.