ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެމްބަރަކު ހޮވުމަށް ބޭއްވި ބައި- އިލެކްޝަންގައި ރަނގަޅު ނޫން ގޮތަކަށް ގުނި ކަމަށް އެމްއެންޕީން ބުނާ ދެ ވޯޓު ކަރުދާސް އަލުން ބެލުމަށް ފަހު، ކުރިން އޮތް ނަތީޖާ އަނެއްކާ ވެސް އިލެކްޝަންސް ކޮމިޝަން (އީސީ) އިން އިއުލާންކޮށްފި އެވެ.

މިދިޔަ ހޮނިހިރު ދުވަހު ބޭއްވި އެ ބައި އިލެކްޝަން އެމްއެންޕީގެ ކެންޑިޑޭޓް އާމިނަތު ޝީޒާ ބަލިކޮށް ޕީޕީއެމްގެ ކެންޑިޑޭޓް ފާތިމަތު ނާޒިމާ ކާމިޔާބު ކުރީ އެންމެ ވޯޓެއްގެ ތަފާތުންނެވެ. ޝީޒާއަށް 358 ވޯޓު ލިބުނު އިރު ނާޒިމާއަށް ލިބުނީ 359 ވޯޓެވެ.

އީސީގެ ރައީސް ފުއާދު ތައުފީގު ވިދާޅުވި ގޮތުގައި މުހްޔިއްދީން ސްކޫލްގައި ބަހައްޓާފައިވާ އެއް ނަމްބަރު ވޯޓު ފޮށިން ޝަކުވާ ހުށަހެޅި ދެ ވޯޓު ކަރުދާސް ދެ ވަނަ ފަހަރަށް މިރޭ ގުނުމުން ވެސް ނަތީޖާއަށް އެއްވެސް ބަދަލެއް އައިސްފައި ނުވާ ކަމަށެވެ.

ފުއާދު ތައުފީގް މި ނޫހަށް އިތުރަށް މައުލޫމާތު ދެއްވަމުން ވިދާޅުވީ އެއީ ސައްހަ ވޯޓެއް ބާތިލް ވޯޓެއް ގޮތުގައި ކަނޑައެޅި ވޯޓު ކަރުދާހަކާއި ބާތިލް ވޯޓެއް ސައްހަ ވޯޓެއް ކަމުގައި ކަނޑައެޅި ވޯޓު ކަރުދާހެއް ހިމެނޭ ކަމަށް ބުނެ އެމްއެންޕީން ހުށަހެޅި މައްސަލައަށް ނިންމާފައިވާ ކަމެއް ކަމަށެވެ.

"އަޅުގަނޑުމެން ނިންމީ އެ ދެ ވޯޓު ކަރުދާސް އަލުން ޗެކް ކުރަން، އަލުން ވޯޓު ގުނަން އެދުނު ނަމަވެސް ކޮމިޝަނުން ނިންމާފައި ވަނީ އަލުން ހުރިހާ ވޯޓުތަކެއް ނުގުނާ ގޮތަށް،" އޭނާ ވިދާޅުވި އެވެ.

މި އިންތިހާބު ބޭއްވީ ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއްވެ، މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގައި ވިލިމާލެ ދާއިރާ ތަމްސީލު ކުރައްވަމުން ގެންދެވި މެމްބަރު، އައިމިނަތު އީމާން ނިޔާވުމާ ގުޅިގެންނެވެ.

މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގައި ޖުމްލަ 17 މެމްބަރުން ތިބޭއިރު، އޭގެ މެޖޯރިޓީ އޮތީ އެމްޑީޕީއަށެވެ. އެއީ އެމްޑީޕީގެ 12 މެންބަރުންނެވެ. ދެން ތިބެނީ ޕީޕީއެމްގެ މެމްބަރަކާއި އަދާލަތު ޕާޓީ އާއި އެމްއާރުއެމްގެ މެމްބަރެއްގެ އިތުރުން މިނިވަން ދެ މެމްބަރެކެވެ.