މީގެ 15 ވަރަކަށް އަހަރު ކުރިން، ވިލިމާލޭ މުހިއްޔުއްދީން ސްކޫލްގެ އިންޓަ ހައުސް މުބާރާތަކަށް ކުޅުންތެރިން ނަގަން ވެގެން ބޭއްވި ޓްރަޔަލަކަށް ދިޔަ އާދަމް ނާސިފް އުމަރު (އާދަޅޭ)ގެ ހިތުގައި އޭރު ކްރިކެޓުން ކުރިއަށްދިއުމުގެ މާބޮޑު ހިޔާލެއް ވެސް ނެތެވެ. ކުޅިވަރު ތެރޭގައި އުޅޭތީ އެ ދުވަހު އެ ތަނަށް ދިޔައީ އެވެ. އެކަމަކު، އެ ދުވަހު ކުރި ތަޖުރިބާއެއްގެ އަލީގައި އާދަމްގެ ހަޔާތުގައި ކުރިއަށްދާނެ މަގެއް ކޮށުނީ އެވެ. ކުޅިވަރަކުން އެންމެ މަތީ ފަންތީގައި ވެސް ކުރިއަށްދެވޭނެ ކަމުގެ އުންމީދަަށް ދިރުމެއް ލިބުނީ އެވެ.

"ކުދިން ނަގަން ވެގެން އޭރު ހުރީ އާމިރު ކޯޗު. އޭނަ ބުނީ ބޯޅައިގައި ޖަހާށޭ. ނޭނގެ ކިިހިނެއް ކަމެއް ވަނީކީއެއް. ވާއެއް ނުވާއެއް ވެސް ނޭނގޭ. ކޯޗު ދީފި ބެޓެއް. ދެން، ކޯޗު އެއްލި ބޯޅަ ޖެހީ ވަރަށް ދުރަށް. ޖެހުނީމަ ކުޅޭހިތްވީ، އެގޮތަށް ގޮސް ކުޅެމުން ކުޅެމުން. ފުރަތަމަ އަހަރު ހުރީ ބެންޗުގައި، ނުލިބޭ އިންޓަ ހައުސް ކުޅެލާކަށް ވެސް ޗާންސެއް. އޭގެ އަނެއް އަހަރު ޗާންސް ލިބިގެން ކުޅެގެން އެ ގޮތަށް ފެށުނީ،" ގައުމީ ކްރިކެޓް ޓީމުގެ ކުޅަދާނަ އޯލްރައުންޑަރު، އާދަަމް، 24، އޭނާގެ ކްރިކެޓް ހަޔާތް ފެށުނު ގޮތުގެ ހަނދާންތައް ކިޔައިދިނެވެ.

އާދަމް، "އަދަދު" އަށް އިންޓަވިއު ދެނީ: ކެރިއަރުގެ މުހިންމު ވާހަކަތަކެއް ހިއްސާކުރި.-- ފޮޓޯ: އަބްދުﷲ އިޔާން/ އަދަދު

ގިނަ ޒުވާނުންނެކޭ އެއްގޮތަށް އާދަމް ވެސް އެކި ކުޅިވަރުތަކުގައި ޝާމިލުވެ އުޅުނެވެ. ތަފާތު ކުޅިވަރުތަކުގެ އެކި ލެވަލްތަކުގައި ކުޅެފައި ވެސް އެބަހުއްޓެވެ. އެކަމަކު، ވަކި ކުޅިވަރަކުން ކުރިއަށްދާން އޭނާ އަޒުމު ކަނޑައެޅީ، އުންމީދެއް އޮވެގެންނެވެ. ޕްރޮފެޝަނަލްކޮށް ކްރިކެޓަށް ހުސްވީ، އެ ކުޅިިވަރަށް ހިތްޖެހިފައި އޮތް މިންވަރު ވެސް ބޮޑުވުމުންނެވެ. އަދި ގިނަ ބަޔަކަށް ބެލެވުނީ އާދަމް އަށް މުސްތަގުބަލެއް އޮތީ ވެސް ކްރިކެޓުން ކަމަށެެވެ.

"ފުޓްބޯޅަ އަށް ވެސް ދިޔައިން. އޭރު ހުރި ސްޕޯޓްސް ސުޕަވައިޒަރު ބުނީ، ނުކުޅޭނެއޯ ފުޓްބޯޅައެއް ކުޅޭށޯ ކްރިކެޓް. އެހެންވެ، ދެން ހަމަ މުޅިން ކްރިކެޓްގައި. ދެން، އެ ފަހުން ކްރިކެޓްގެ މުޅި އެތި ދަސްވީމަ، އިތުރު ކުޅިވަަރެއް ކުޅޭހިތެއް ނުވި، ޕްރޮފެޝަނަލް ގޮތަކަށް. މުޅިން ވެސް ކްރިކެޓް ކުޅޭހިތްވީ،" ކްރިކެޓަށް ހުސްވި ގޮތް އާދަމް ބުނެދިނެވެ.

ސްކޫލް ލެވަލްގައި ގިނަ މުބާރާތްތަކެއް ކުޅެމުންދިޔަ އާދަމްގެ ހުނަރު ފެނި، ކްރިކެޓް ބޯޑްގެ ޑިވެލޮޕްމަންޓް ޕްރޮގްރާމްގެ ތެރެއިން އޭނާ އަށް ފުރުސަތު ލިބުނެވެ. އެ ފަހުން ދެން ވިލިމާލޭގައި ކުޅެން އުޅުމުގެ ބަދަލުގައި މާލެ އަށް ގަވާއިދުން ޓްރެއިނިން އަށް އަންނަން ފެށީ އެވެ. މާގިނަ ދުވަހެއް ނުވެ، 2013 ވަނަ އަހަރު އާދަމް އަށް ގައުމީ ޓީމާ އެކު ފަރިތަކުރުމުގެ ފުރުސަތު ފަހިވި އެވެ.

އާދަމް (ވ) ކްރިކެޓް ބޯޑްގެ ރައީސް ފައިސަލް (ކ)އާ އެކު ގައުމީ ޓީމުގެ ޖޯޒީ ހިފައިގެން.--- ފޮޓޯ: އާއިމް ޒަމީރު/ އަދަދު

ގައުމީ ޓީމާ އެކު ދަތުރު ފެށުނު ހިސާބުން އާދަމް އަޒުމު ކަނޑައެޅީ ފަސް އެނބުރި ނުބަލައި، ދެވެން އޮތް އެންމެ ދުރަކަށް ދިއުމަށެވެ. މޮޅު ކުޅުންތެރިއަކަށް ވުމަށް އޭރު ގައުމީ ޓީމުގައި ފެށި، މަސައްކަތުގެ އަލީގައި އާދަމް ވަނީ ގައުމީ ޓީމާ އެކު ކާމިޔާބުގެ ސޮފުހާތަކެއް ވެސް ލިޔެފަ އެވެ.

"2015 ގައި 18 އަހަރުން ދަށުގެ (ގައުމީ) ޓީމު، ލަންކާގައި އޭރު އޮންނަ އެންމެ މޮޅު ސްކޫލް ކްލަބް، އެސްއެސްސީ ބަލިކޮށްފައި ޗެމްޕިއަންކަން ނެގި ދުވަސް (އަބަދުވެސް ހަނދާން ހުންނާނެ). މެލޭޝިއާގައި ތައިލެންޑް އަތުން މޮޅުވި ދުވަސް، 2019 ވަނަ އަހަރު ނޭޕާލްގައި ސައުތު އޭޝިއަން ގޭމްސްގައި ބޫޓާން އަތުން މޮޅުވި ދުވަސް. އެންމެ ފަަހަކަށް ހަނދާން ހުންނަނީ މި ފަހުން ނިންމާލި ޓީ10 މުބާރާތުގެ ޗެމްޕިއަންކަން ހޯދުން،" ކްރިކެޓްގައި މެޗުތަކެއް ކިޔާނަމަ އާދަމްގެ ހަނދާނުގައި ހުރި އެންމެ ހިތްހަމަ ޖެހުނު ދުވަސްތަކަށް އަލިއަޅުވާލަމުން ބުންޏެވެ.

ކުޅިވަރުގައި މޮޅާއި ބަލި އޮންނަކަން ގަބޫލުކުރަން ޖެހޭ ގޮތަށް، އާދަމްގެ ކެރިއަރުގައި ވެސް އޭނާ ފިލާވަޅު ނެގި ކަންތައްތަކެއް އެބަހުއްޓެވެ.

ދާދިފަހުން ކްރިކެޓް ބޯޑުން ބޭއްވި ޓީ20 މުބާރާތުގައި ހެދުނު އެންމެ ގޯހަކުން އާދަމް ކުޅެމުން އައި، ޓީމު، މިލާން ކްރިކެޓް އެކެޑަމީ އަށް މުބާރާތް ގެއްލުނެވެ. އެކަމަކު، އޭގެ ޖެހިގެން އައި މުބާރާތް، ޓީ10ގައި އެއްވެސް މެޗަކުން ބަލިނުވެ، އެ ޓީމުން ތަށި ނެގި އެވެ. އާދަމް މި ދެ މުބާރާތުން މުހިންމު ކަންތައްތަކެއް ދަސްކުރި އެވެ. އެ ތަޖުރިބާތައް އޭނާ ދޫކޮށްލީ ބޭނުންހިފޭނެ މެސެޖެއްގެ ސިފައިގަ އެވެ.

"އެ ކުޅޭ ޓީމެއްގެ ޓީމު ބޮންޑް ކަންނޭނގެ އެންމެ މުހިންމު އެއްޗަކީ. ދެން، އަމިއްލަ އަށް ކުރާ މަސައްކަތް އެއްޗަކީ، ބަލިވިޔަސް އެ މީހާގެ މައިންޑްސެޓް އޭގެ އިންނާނީ. މިހާރު، ނުވާނެއޭ ހިތަށް އަރައިފިއްޔާ ނުވާނެ އެއްވެސް ކަމެއް. ތިމާ މީހާ ވިސްނަނީ ތިމާ މީހާ އަށް ވާނެއޭ، އެކަމަކު، ވާނީ ވެސް އެ އަށް މަސައްކަތް ކޮށްގެން. ހަމަ ބަލަން ހުރެގެނެއް ނުވާނެ. ވާހަކަ އަކީ މަސައްކަތް ކޮށްގެންނޭ އެ މީހަކަށް ވިން ވާނީ،" އާދަމް ބުންޏެވެ.

ޓީ10 މުބާޜާތުގެ ޗެމްޕިއަންކަން ހޯދުމަށް ފަހު މިލާން ކްރިކެޓް އެކެޑަމީގެ ކުޅުންތެރިން.

ކޮންމެ ކުޅިވަރެއްގައި ކުރިއަށްދާން ބެލިޔަސް އާދަމްގެ ވިސްނުމަކީ ހުނަރުހުރި ކުޅުންތެރިންތަކެއް އެކުވެގެން، ޓީމެއްގެ ގޮތުގައި މަސައްކަތް ކޮށްފިއްޔާ ނުވާނެ ކަމެއް ނެތެވެ. މީގެ އޮތީ އަމިއްލަ ނަފްސަށް ކުރާ އިތުބާރާއި ދާން ބޭނުންވާ މިސްރާބަށް ދެވޭނެ ކަމަށް ފުރަތަމަ ގަބޫލުކުރުމެވެ. ދެން، އެ އަށް މަސައްކަތް ކުރުމެވެ. މި ހުރިހާ ކަމަކަށް ވެސް އިސް ރޯލެއް ކުޅޭނެ އެއް ކަމަކީ ޑިސިޕްލިން ނުވަތަ ކުރާ ކަމެއްގައި ރަނގަޅު އަހުލާގު އިސްކުރުމެވެ. ރަނގަޅަށް އަރާމްކުރުމާއި ފިޓްނަސް ބެލެހެއްޓުން އެއީ އެތުލީޓެއްގެ ގޮތުގައި އެންމެ ބޮޑަށް އިސްކަންދޭން ޖެހޭނެ ކަންކަން ކަމުގައި އާދަމް ގަބޫލުކުރެ އެވެ. އޭނާ އަމަލުކުރަމުން އަންނަނީ ވެސް އެ ގޮތަށެވެ.

ރާއްޖޭން ބޭރުގެ ފުރުސަތު ލިބުން ވަރަށް މުހިންމު

ރާއްޖޭގެ ކޮންމެ ކުޅިވަރެއްގައި ވެސް ބޭނުންވަނީ ފުރުސަތެވެ. ރާއްޖޭން ފަހިވެފައި އޮންނަން ޖެހޭ ފުރުސަތުގެ އިތުރުން ބައިނަލްއަގުވާމީ މައިދާނުގައި ވެސް ކުރިއަށްދެވޭނެ ފަދަ މަގެކެވެ. އާދަމް ގަބޫލުކުރާގޮތުގައި ކޮންމެ ކުޅިވަރެއްގައި އުޅޭ ކުޅުންތެރިއަކަށް ވެސް އަމިއްލަ މީހާ ވަޒަންކޮށްލެވޭ ވަރުގެ ރަނގަޅު ޓްރެއިނިން ލިބޭ ވަރަކަށް ކުރިއަރާނެ އެވެ. އެ ފުރުސަތު ލިބުމުގައި އޮތް އެންމެ ބޮޑު ދައްޗަކީ ދިވެހި ކުޅުންތެރިންގެ "ސެމީ ޕްރޮފެޝަނަލް ލައިފްސްޓައިލް" އެވެ. އެއީ ދިވެހި ގިނަ ކުޅުންތެރިން ވެސް ކުޅެން ޖެހެނީ ވަޒީފާ އަދާކޮށްފައި ކަމަށް ވާތީ ދިމާވެފައި އޮތް މަޖުބޫރީ ހާލަތެވެ.

"ހުރިހާ ކުޅުންތެރިން ވެސް ގިނައިން މި އުޅެނީ ވަޒީފާގައި. ވަރަށް އުނދަގޫ ކަމެއް އެއީ. ހުރިހާ ކަމެއް މެނޭޖްކުރަން. ޖޮބަށް ދަމުން ކުޅެން އައިސް، މީހާގެ ނިދި ވެސް އެއީ މުހިންމު އެއްޗެއް،" މޯލްޑިވްސް އެއާޕޯޓްސް ކޮމްޕެނީ ޕްރައިވެޓް ލިމިޓެޑް (އެމްއޭސީއެލް)ގައި ވަޒީފާ އަދާކުރަމުން އަންނަ އާދަމް ބުންޏެވެ.

ޒަވާޖީ ހަޔާތެއް ފަށައިގެން މި ވަގުތު އަނބިމީހާއާ އެކުގައި އުޅެމުން އަންނައިރު، ކުރިން މުޅި އާއިލާ އެކުގައި އުޅުނު ހަދާންތަކަކީ އާދަމް އަށް ބައެއް ފަހަރު "މިސް" ވާ ކަމެކެވެ. އެކަމަކު، ކެރިއަރެއް ބިލްޑްކުރާއިރު، އެންމެ ބޮޑު އުފަަލަކީ އެންމެންގެ ވެސް ސަޕޯޓް އަބަދުވެސް އޮތުން ކަން އާދަމް ފާހަގަކުރި އެވެ.

މޯލްޑިވްސް ސްޕޯޓްސް އެވޯޑްސްގައި ރާއްޖޭގެ އެންމެ މޮޅު ކްރިކެޓް ކުޅުންތެރިޔާގެ އެވޯޑް އާދަމްއާ ހަވާލުކުރަނީ.--

މޯލްޑިވްސް ސްޕޯޓްސް އެވޯޑްސް ހަފްލާގައި މި ފަހަރު ރާއްޖޭގެ އެންމެ .މޮޅު ކްރިކެޓް ކުޅުންތެރިޔާގެ އެވޯޑް އާދަމް އަށް ލިބުނީ، ދުނިޔޭގެ ކްރިކެޓްގައި ވެސް މަގުބޫލު ދެ ކުޅުންތެރިން އަތުންނެވެ. އިންޑިއާގެ ސުރޭޝް ރައިނާ އާއި ސްރީލަންކާގެ ސަނަތު ޖަޔަސޫރިއާ އަތުންނެވެ. އެއީ އެންމެ ފުރަތަމަ ދުވަހުން ފެށިގެން ވެސް އާއިލާ އާއި ގާތް އެންމެންގެ އެހީގައި އާދަމް ކުރި މަސައްކަތުން، މިދިޔަ ތިން އަހަރަށް ބަލާއިރު، އޭނާ ކުރި މަސައްކަތުގެ ހައްގު އިނާމެވެ.

"އެ ދެން ވަރަށް ބޮޑު ޑްރީމެއް. ވަރަށް ގިނަ މީހުން، ވާހަކަ އަކީ މަންމަ އާއި ބައްފަ، ދެން ވައިފްއާ އެންމެން ވެސް، ވަރަށް ޕްރައުޑްވެފައި ހުރީ. ނޭނގެ އެ ދުވަސް ކިޔައިދެން ވެސް އަސްލު،" އެންމެ މޮޅު ކްރިކެޓް ކުޅުންތެރިޔާގެ އެވޯޑް ލިބުމުން ކުރެވޭ އިހުސާސާ މެދު އާދަމް ބުންޏެވެ.

ރާއްޖޭގެ ކްރިކެޓް ލެޖެންޑުންގެ ނަންތަކާއި އެ މީހުންގެ ކާމިޔާބީގެ ވާހަކަތައް އާދަމް އަށް ވެސް ވަނީ އިވިފަ އެވެ. އޭގެތެެރެއިން ބައެއް ލެޖެންޑުންނާ އެކު ކުޅުމުގެ ފުރުސަތު ވެސް އާދަމް އަށް ވަނީ ލިބިފަ އެވެ. މޫސާ ކަލީމް ފަދަ ކުޅުންތެރިންގެ ކުޅުން ފެނި، އަފްޒަލް ފާއިޒު (ކުޑަ އަފޫ) ފަދަ ކުޅުންތެރިންނާ އެކު ކުޅެލަން ލިބުމުން ކެރިއަރެއް ބައްޓަން ކުރަން އާދަމް އަށް ކަންތައްތަކެއް ދަސްވި އެވެ. އެއީ އަސްލު ކްރިކެޓްގައި އޭނާ ކުރިއަށްދާން ލިބޭ ހިތްވަރެއްގެ ގޮތުގައި އަބަދުވެސް ދެކޭނެ އެވެ.

ކްރިކެޓް އިންޑޯގައި ގިނަ ވަގުތުތަކެއް ހޭދަކޮށް، ޓްރެއިނިން އަށް އާދަމް އަންނަނީ ބޮޑު ސަމާލުކަމެއް ދެމުން.-- ފޮޓޯ: އަބްދުﷲ އިޔާން/ އަދަދު

ކްރިކެޓްގައި މި ވަގުތު އާދަމް ހުރި ހަރުފަތް މައްޗަށް ޖައްސާލަން ބަލާއިރު، އޭނާ އެދެނީ ބައިނަލްއަގުވާމީ ގައުމަކުން ކުޅެލަން ދިއުމުގެ ފުރުސަތަކަށެވެ. ކްލަބަކަށް ކުޅެލަން ނޫނީ ޓްރެއިނިން ކޭމްޕަކުން ޖާގަ ލިބުނަސް އާދަމް ހުރީ އޭގެ ބޭނުން ހިފަން ކެރިގެން ތައްޔާރަށެވެ.

"އިންޑިވިޖުއަލީ ބަލަންޏާ މި ކަމަށް ކޮމިޓެޑް ކުދިންނަށް އިންޑިއާ ނޫނީ ލަންކާ ތަނެއްގެ ކްލަބަކަށް ކުޅެލަން ލިބުމުން ކުޅުންތެރިންނަށް ވަރަށް ފައިދާކުރާނެ،" އާދަމް ބުންޏެވެ.

"އަހަރުންނަށް މުހިންމީ ރަނގަޅު ޓާފެއް. އިންޓަނޭޝަނަލް މުބާރާތެއްގައި ގޮސް އަހަރެމެން މި ކުޅެނީ ޓާފެއްގައި، މިތާ އޮންނަ ކަހަލަ އެސްޓްރޯއެއްގައެއް ނޫން ކުޅޭނީ. އަހަރުމެން މުބާރާތަކަށް ގޮސްފައި، ދެތިން ދުވަސް އެބަނަގާ ހޭނެން، ކޭމްޕެއް ނުޖަހައި މުބާރާތަކަށް ގޮސްފިއްޔާ ވަރަށް އުނދަގޫ، މި ކޮޅުގައި ވެސް ޓާފް ޕިޗެއް ލިބިއްޖިއްޔާ ވަރަށް ރަނގަޅުވާނެ ކޮންމެހެން ޓްރެއިނިން ކޭމްޕެއް ޖަަހަން އެހެން ގައުމަކަށް ދާން ނުޖެހޭނެ،"

ކޮންމެ ކުޅިވަރެއްގައި ވެސް ހުނަރުވެރި ކުުޅުންތެރިން ރާއްޖޭގައި އެބަތިބި އެވެ. ބޭނުންވަނީ ފުރުސަތެވެ. ރާއްޖެއިން ވިޔަސް ގައުމުން ބޭރުގައި ވިޔަސް ކޮންމެ ކުޅުންތެރިއަކު ވެސް ބޭނުންވަނީ ރަނގަޅު ވަސީލަތެއްގައި ޓްރެއިނިން ގެންދިއުމެވެ. މުޅި ދުނިޔެ އަށް ބެލިޔަސް އެންމެ ހަލުވި ދުވެލީގައި ކުރިއަށްދާ އިންޑަސްޓްރީ އަކީ ކުޅިވަރެވެ. ޖިއޮގްރަފިކަލީ ބަލާއިރު، ރާއްޖެ މި އޮތީ ކްރިކެޓްގެ ނަޒަރުން ބަލާނަމަ، ދުނިޔޭގެ ޗެމްޕިއަނުންގެ ހަބެއްގެ ތެރޭގަ އެވެ. ސާކް ސަރަަހައްދުގައި ގިނައިން އޮތީ ކްރިކެޓްގެ ފުންނާބު އުސް އެ ކަމަށް މަރުދޭ މީހުން ދިރިއުޅޭ ގައުމުތަކެވެ. ވަށައިގެން މި އޮތް އެ ފަސަ ގައުމުތަކުގެ އެހީ ހޯދައިގެން އާދަމް ފަދަ ހުނަރުވެެރި ތަރިން ޑިވެލޮޕްކުރެވޭނެ މަގެއް ހޯދަންވީ އެވެ. އޭރުން މުސްތަގުބަލުގައި ރާއްޖޭގެ ކްރިކެޓް ތަރިން ބައިނަލްއަގުވާމީ މައިދާނުގައި ފިޔަޖަހާ ނިސްބަތް އިތުރުވާނެ އެވެ.