ރައްޔިތުންގެ މަޖިލީހުގެ މިއަދުގެ ޖަލްސާގައި ކުރި ހަަމަ އެކަނި ބަހުސަކީ އަންހެން ކައުންސިލަރުންނާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ މެމްބަރުން، އެ ބޭފުޅުންގެ މަސްއޫލިއްޔަތު އަދާކުރުމުގައި ކުރިމަތިވާ ދަތިތައް ހައްލުކުރަން ގޮވާލައި ހުށަހަޅާފައިވާ ގަރާރެއްގެ ބަހުސެވެ. މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ އެމްޑީޕީ މެމްބަރު އީވާ އަބްދުﷲ ހުށަހެޅުއްވި އެ ގަރާރަށް ތާއީދު ކުރެއްވި ނަމަވެސް އެމްޑީޕީގެ މެމްބަރަކު އެ ބަހުސްގައި ނުސީދާކޮށް އީވާއަށް ފާޑުވިދާޅުވި އެވެ.

ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފު ވިދާޅުވީ އަންހެން ކައުންސިލަރުންނަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެމްބަރުންނަށް އޮތް އެންމެ ބޮޑު ދައްޗަކީ ކައުންސިލްތަކުގެ އިދާރާތަކުގެ ޖާގަ އޮތް ގޮތް ކަމަށެވެ. އެހެންވެ، ރަސްމީގަޑި ފިޔަވައި އެހެން ގަޑިއެއްގައި އެ ބޭފުޅުން މަސައްކަތެއް ކުރައްވާ ނަމަ އޮފީސް ހުޅުވަން ޖެހެނީ ކައުންސިލްތަކުގެ ޒިންމާދާރު ވެރިންނަށް ގުޅައިގެން ކަމަށް ވެސް އޭނާ ވިދާޅުވި އެވެ.

"އެއީ އެބޭފުޅުންގެ މަސައްކަތަށް ހުރި ގޮންޖެހުންތަކެއް. އަޅުގަނޑު ގަބޫލުކުރާ ގޮތުގައި މިކަންތައް މިފާހަގަ ކުރެވެނީ އަޅުގަނޑުމެންގެ މަޖިލީހުގެ ނައިބު ރައީސް [އީވާ އަބްދުﷲ] ރަށްރަށަށް ދުރުވެ، މިކަންކަން ފެނުނީމާ ކަމަށް. އިތުރަށް ކުރިއަށް އޮތްތާގައި ދުރުވާނެ ކަމަށް އަޅުގަނޑު އުއްމީދުކުރަން،" ސަނީފު ވިދާޅުވި އެވެ.

ސަނީފު އެ ފާހަގަ ކުރެއްވީ އެމްޑީޕީގެ ޗެއާޕާސަންގެ އިންތިހާބުގައި ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއަށް ތާއިދު ހޯއްދެވުމަށް އީވާ ދަތުރު ކުރައްވާތީ، އެ ކަމެވެ.

ސަނީފު ވިދާޅުވީ އީވާ މީގެ ކުރިން ދަތުރުކުރައްވާފައި ނުވާތީ އެކަހަލަ މައްސަލަތައް ފާހަގަނުވެ ހުރެދާނެ ކަމަށެވެ.

މިއަދުގެ ހާޒިރީ

• ހާޒިރުވެވަޑައިގެންނެވީ: 27 މެމްބަރުން
• ސަލާމުގައި: 09 މެމްބަރުން
• ރަސްމީ ދަތުރުތަކުގައި: މެމްބަރަކު ވަޑައިގެން ނޫޅުއްވާ

ސަނީފުގެ އެ ވާހަކައަށް ރިޔާސަތުން މަޖިލީހުގެ ރައީސް މުހައްމަދު ނަޝީދު ވަގުތުން ރައްދު ދެއްވި އެވެ. އެމަނިކުފާނު ވިދާޅުވީ "ރާއްޖޭގެ ކަންކަން އޮޅުން ފިލާތޯ" އެމަނިކުފާނު ބައްލަވާނެ ކަމަށެވެ.

ސަނީފުގެ ނަން ވިދާޅު ނުވިޔަސް، މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފު އެ ވާހަކަ ސިފަކުރެއްވީ އީވާއަށް "ބުލީ ކުރުން" ކަމަށެވެ.

"އަޅުގަނޑު ހިތާމަކުރަން އަޅުގަނޑުމެންގެ މި މަޖިލިސްގެ އިއްޒަތްތެރި ނައިބު ރައީސް މި މައްސަލަ ހުށަހެޅުއްވީމާ، ވާހަކަ ދައްކަވާއިރު ބައެއް ބޭފުޅުންގެ ވާހަކަތަކުން ގަބޫލުކުރެވެނީ އިއްޒަތްތެރި ނައިބު ރައީސް މި މައްސަލަ ހުށަހެޅުއްވީ ވެސް އިއްޔެ އެކަމަނާ ދަތުރުތަކެއް ކުރެއްވީމާ ފެނުނު މަންޒަރުތަކަކުން ކަމަށް،" އާދަމް ޝަރީފު ވިދާޅުވި އެވެ.

އެއީ އެގޮތަށް ކުރެއްވި ކަމެއް ނޫން ކަމަށް ވެސް އޭނާ ވިދާޅުވި އެވެ.

"އަޅުގަނޑުމެން މިތަނުގައި ބުލީ ކުރުމާއި ޖެއްސުންކުރުމާ މިކަންކަން އަޅުގަނޑުމެން ހުއްޓައިނުލައެއް އިއްޒަތްތެެރި ރައީސް އަޅުގަނޑުމެންގެ މިރާއްޖެއަކަށް ކުރިއެެރުންތަކެއް ނާންނާނެ،" އާދަމް ޝަރީފު ވިދާޅުވި އެވެ.

އޭގެ ފަހުން އެ ބަހުސްގައި އީވާ ވިދާޅުވީ އެ ފަދަ ގަރާރެއް ހުށަހެޅުމުން މަލާމާތްކުރިޔަސް ފަހަތަށް ޖެހިވަޑައިނުގަންނަވާނެ ކަމަށެވެ. އޭނާ ވިދާޅުވީ "ރޭރުކުރަން އުޅުނަސް ދެން ރޭރުނުވާނެ" ކަމަށެވެ.

"އަޅުގަނޑު ކިތަންމެ ރޭރުކުރާން ވެގެން އަޅުގަނޑުގެ އަމިއްލަ ޕާޓީގެ ފިރިހެނުން ވެސް އަޅުގަނޑާ ދިމާލަށް ވައްބަހުން ނަަމަވެސް އެއްޗިހި ގޮވިޔަސް، އިއްޒަތްތެރި ރައީސް، ފިރިހެނެއްގެ ރޭރުކުރުމަކަށް ދެނެއް އަޅުގަނޑެއް ދީލައިލާކަށް ނެތިން،" އީވާ ވިދާޅުވި އެވެ.

ދުވަހުގެ ފޮޓޯ

މަޖިލީހުގެ ނައިބުރައީސް އީވާ ޖަލްސާގެ ރިޔާސަތު ބަލަހައްޓަވަނީ

ދުވަހުގެ ކޯޓޭޝަން

އަޅުގަނޑު ކިތަންމެ ރޭރުކުރާން ވެގެން އަޅުގަނޑުގެ އަމިއްލަ ޕާޓީގެ ފިރިހެނުން ވެސް އަޅުގަނޑާ ދިމާލަށް ވައްބަހުން ނަަމަވެސް އެއްޗިހި ގޮވިޔަސް، އިއްޒަތްތެރި ރައީސް، ފިރިހެނެއްގެ ރޭރުކުރުމަކަށް ދެނެއް އަޅުގަނޑެއް ދީލައިލާކަށް ނެތިން،" އީވާ