އުރީދޫ ދިވެހި ޕްރިމިއާ ލީގުގައި ރޭ ކުޅުނު ދެ ވަނަ ބުރުގެ ފުރަތަމަ މެޗުން ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަތުން 1-0 އިން ކްލަބް އީގަލްސް އިން ހޯދީ ދެގުނަ ބޮޑު މޮޅެއް ކަމަށް އެ ޓީމުގެ ހެޑްކޯޗުގެ ޒިންމާއާ ހަވާލުވެ ހުރި އެސިސްޓަންޓް ކޯޗު އަހުމަދު ނިމާދު (ނިމާ) ބުނެފި އެވެ.

ފުރަތަމަ ހާފުގައި ހަސަން ރާއިފް އަހުމަދު (ހަންނަ) ޖެހި ގޯލުން އީގަލްސް އިން ހޯދި މި ކާމިޔާބީއާ އެކު ވަނީ މާޒިޔާގެ މޮޅުވުމުގެ ސިލްސިލާ އަށް ނިމުން އަތުވެ، ލީގުގެ އެއް ވަނައިގައި ލީޑުކުޑަވެފަ އެވެ.

މި ފަހަރު ލީގުގައި ވި ފުރަތަމަ ބައްޔަށް ފަހު ވެސް މާޒިޔާ އެއް ވަަނައިގައި އޮތީ އަށް މެޗުން 21 ޕޮއިންޓާ އެކު އެވެ. އީގަލްސް ދެ ވަނައިގައި އޮތީ އަށް މެޗުން 19 ޕޮއިންޓް ހޯދައިގެންނެވެ. ރޭގެ މެޗުން މާޒިޔާ މޮޅުވިނަމަ އެއް ވަނައިގައި އެ ޓީމުގެ ލީޑު އަށް ޕޮއިންޓަށް ފުޅާކުރެވޭނެ އެވެ. އެކަމަކު، ނުކުތް ނަތީޖާއާ އެކު އީގަލްސް ދެ ޕޮއިންޓަށް ގާތްކުރީ އެވެ.

"މި ވަގުތަށް ބަލާއިރު މިއީ އީގަލްސް އަށް ލިބުނު ވަރަށް ބޮޑު ކާމިޔާބެއް ކަމަށް ދެކެނީ. މިއީ ދެ ގުނަ ބޮޑު މޮޅެއް،" ރޭގެ މެޗަށް ފަހު "އަދަދު" އަށް ނިމާ ބުންޏެވެ.

ނިމާ ވަނީ މާޒިޔާ އަތުން އީގަލްސް އަށް ލިބުނު ކާމިޔާބީ "ދެގުނަ މޮޅަކަށް" ވާ ސަބަބުތައް ކިޔައިދީފަ އެވެ. މި ފަހަރު ލީގުގެ ފުރަތަމަ ބުރު ނިމުނު ފަހުން އީގަލްސް އިން ރާއްޖޭގެ ގައުމީ ޓީމުން ބަންގްލަދޭޝާ ކުޅޭ މެޗަށް ނެގި ބްރޭކަށް ފަހު އަލުން ފަށައިގެން ޕްރެކްޓިސްތައް ދިޔައީ އެންމެ ބޭނުންވި ގޮތަކަށް ނޫނެވެ. ޕްރެކްޓިސް ކުރި މިންވަރު މަދުވެގެން، ބައެއް ކުޅުންތެރިންގެ ފިޓްނަސް އަށް ވެސް ވަނީ އަސަރުކޮށްފަ އެވެ. ޓީމާ ދުރުގައި ހުރެފައި، މަދު ޕްރެކްޓިހާ އެކު ދެ ވަނަ ބުރުގައި ކުޅެން ޖެހޭތީ ނިމާ ހުރީ ކަންބޮޑުވެފަ އެވެ.

އީގަލްސް ޓީމުގެ ހާލަތު އޮތްގޮތުން ދެ ވަނަ ބުުރުގެ ފުރަތަމަ މެޗު މާޒިޔާއާ ކުޅެން ޖެހުން ވެސް ވީ އެ ޓީމަށް ގޮންޖެހުމަކަށް ކަމަށް ނިމާ ވަނީ ބުނެފަ އެވެ. އަދި ދެ ވަނަ ބުރަށް ފަރިތަކުރަން ލިބުނު މަދު ދުވަސްކޮޅާއި ރޯދަ މަހުގެ ފުރަތަމަ މެޗު މާޒިޔާ ކަހަލަ ރަނގަޅު ކުޅުންތެރިން ތިބި ހުރިހާ މެޗަކުން މޮޅުވަމުން އައި ޓީމަކާ ކުޅެން ޖެހުމުން އީގަލްސް އިން ހުރިހާ ގޮތަކުން ވެސް ތައްޔާރުވީ "ޗެލެންޖެއް ނަގައިގެން ނަތީޖާ ނެރެން" ކަމަށް ނިމާ ބުންޏެވެ.

"އެހެންވެ، މިއީ ދެގުނަ ބޮޑު މޮޅެއް. ދެ މޮޅު މިއީ. މާޒިޔާގެ ތައްޔާރީތަކާއި އެ އޮތް ޓީމަށް ބަލާއިރު، އީގަލްސް އަށް ލިބުނު. ސީދާ މެޗު ރާވާފައި ބުނިން އެޓޭކިން ގޭމަކަށް ދާން. މޮޅުވާން ސީދާ ތިން ޕޮއިންޓަށް ކުޅުންތެރިން ކައިރީ ވެސް ބުނީ. އެހެންނޭ ވިސްނާނީ އަހަރެމެންނަށް ގެއްލޭނެ އެއްޗެއް ނެތޭ، އަހަރެމެންނަށް ޕްރެޝަރެއް ނެތޭ. މި ތިން ޕޮއިންޓް ނަގައިގެން ނޫނިއްޔާ މި ލީގު ފޯރިގަދައެއް ނުވާނެއޭ. ވަރަށް ކިކްގައި ތިބީ މެޗަށް އައިރު ވެސް،" އީގަލްސް އަށް މި ސީޒަނުގެ 19 އަހަރުން ދަށުގެ ޔޫތު ޗެމްޕިއަންޝިޕްގެ ތަށި ހޯދައިދިން ނިމާ ބުންޏެވެ.

މީގެ ކުރިން ވެސް އީގަލްސް އިން ވަނީ މާޒިޔާ ރަނގަޅު ފޯމެއްގައި ކުޅެމުން އަންނަނިކޮށް އެ ޓީމު ބަލިކޮށްފަ އެވެ. ރޭގެ މެޗުގެ ކުރިން އީގަލްސް އިން އެންމެ ފަހުން މާޒިޔާ ބަލިކުރީ މިދިޔަ ސީޒަނުގެ ޗެރިޓީ ޝީލްޑް މެޗުގައި ފަހަތުން އަރައި 3-2 އިންނެވެ. މިދިޔަ ފަސް ވަރަކަށް ސީޒަނަށް ބަލާއިރު، މާޒިޔާ ކައިިރިން އެންމެ ގިނައިން ނަތީޖާއެއް ހޯދި ޓީމަކަށްވާނީ އީގަލްސް އެވެ.

ކީޕަރު އަލީފަށް ތައުރީފު ހައްގު

ލީގުގެ ފުރަތަމަ ބުރު ނިމުމުން އީގަލްސް އަށް ކުޅެމުން އައި ލެބަނަން ގޯލްކީޕަރު މުހައްމަދު ތަހާ ވަނީ އެނބުރި ގައުމަށް ގޮސްފަ އެވެ. އޭނަގެ އަމިއްލަ ޑިމާންޑްތަކަކަށް އީގަލްސް އިން ގަބޫލުނުުވުމުން އެންމެ ފަހުން ނިންމީ ކޮންޓްރެކްޓް އުވާލާށެވެ. މިއީ ޓްރާންސްފާ ކުރެވޭނެ މުއްދަތަކަށް ނުވާތީ، އީގަލްސް އަށް ޖެހުނީ އެ ޓީމުގެ ގޯލު ބެލެހެއްޓުން ދިވެހި ކީޕަރަކާ ހަވާލުކުރާށެވެ. ސްކޮޑުގައި ތިބި ތިން ކީޕަރުންނަކީ، ހަސަން އަލީފް އިބްރާހިމް، 20، އާއި މުހައްމަދު ސިނާހު، 24، އަދި ޝައިހާން އަލީ 17، އެވެ.

މި ތިން ކީޕަރުންގެ ތެރެއިން އީގަލްސް ސީނިއާ ޓީމަށް މެޗެއް ކުޅުނު ހުރީ އެންމެ ކީޕަރެކެވެ. އެއީ ސިނާހު އެވެ. އެކަމަކު، ޕްރެކްޓިހާ އެހެނިހެން ކަންކަމަށް ބަލާފައި ނިމާ ނިންމީ އަލީފަށް ފުރުސަތު ދޭށެވެ. ރޭގެ މެޗަކީ އީގަލްސްގެ ޔޫތު ޓީމުތަކަށް ކުރިން ކުޅުނު އަލީފް ސީނިއާ ޓީމުގެ ގޯލު ބެލެހެއްޓި ފުރަތަަމަ މެޗެވެ.

"ކީޕަރުގެ (އަލީފްގެ) ކުޅުން ސަތޭކައޭ ބުނަން ޖެހޭނީ. އެއީ ކޮޅަށް ގޯލެއް ނުވަދޭ. އެކަމަށް މަރުހަބާ ކިޔަންޖެހޭ، މި ކަހަލަ މެޗެއް އެގޮތަށް ފުރިހަމަ ކުރީމަ،" އަލީފާ ބެހޭގޮތުން ނިމާ ބުންޏެވެ.

ރޭގެ މެޗުގެ ތެރެއިން އީގަލްސްގެ ކީޕަރު އަލީފް: ފުރަތަމަ ފަހަރަށް އީގަލްސްގެ ސީނިއާ ޓީމުގެ ގޯލު ބެލެހެއްޓި އަލީފް ވަނީ މޮޅު ކުޅުމެއް ދައްކާފައި.--- ފޮޓޯ: އަބްދުﷲ އިޔާން/ އަދަދު

ނިމާ ބުނީ މާޒިޔާ އަށް ރޭގެ މެޗުގައި މާ ހުސް ފުރުސަތުތަކެއް ނުލިބޭ ކަމަށެވެ. އެކަން އެހެން ދިމާވީ އީގަލްސްގެ ޑިފެންސްލައިން އޮގަނައިޒްކޮށް އޮތުމުން ކަމަށާއި އެ ގޮތަށް ޓީމު ނުރޫޅި ބާއްވައިގެން މޮޅެއް ހޯދަން ކުރި މަސައްކަތުގައި އަލީފްގެ ދައުރު ވެސް ފާހަގަކުރަން ޖެހޭ ކަމަށް ނިމާ ވަނީ ބުނެފަ އެވެ.

"އައި ކްރޮސް އެއްޗެހި ވަރަށް ރަނގަޅު ތަންތަނަށް ނުކުމެ އަލީފް އެ އެއްޗެހި ހިފާފައި އެބަހުރި. އަނެއްހެން، އޯޕަން ވެގެން މާޒިޔާ އަށް ޗާންސެއް ނުލިބޭ. އޭރިއާ ބޭރުގައި ކުޅުނު ކަމުގައި ވިޔަސް. އެކަމު، އަލީފް ކޮންފިޑެންސާ އެކު މި ކަހަލަ ޕްރެޝަރު މެޗެއްގައި މިދިޔަ ދެ މުބާރާތުގައި ވެސް ނުކުޅެ ހުރެފައި، މުޅިން އަލަށް އީގަލްސް ސީނިއާ ޓީމު ފުރަތަމަ 11 ގައި އަރައި އަލީފް އެ ކުޅުނު ކުޅުން ވަރަށް ބަލައިގަންނަން ޖެހޭ،" ނިމާ ބުންޏެވެ.

މީގެ ކުރިން އަލީފަށް ފުރަތަމަ ޑިވިޝަނުގައި ކުޅުމުގެ ތަޖުރިބާ ލިބިފައިވެ އެވެ. އެއީ ލޯން އެއްބަސްވުމެއްގެ ދަށުން ކްލަބް ގްރީން ސްޓްރީޓްސް އަށް ކުޅުނުއިރު އެވެ.

އަލީފް ބުނީ އީގަލްސް ސީނިއާ ޓީމަށް ކުޅެލުމަކީ މިދިޔަ ދެތިން އަހަރު ދުވަހު އިންތިޒާރުކޮށްގެން ހުރި ކަމެއް ކަމަށެވެ. އަދި ރޭ ލިބުނު ފުރުސަތުގެ އަލީގައި ޓީމުގައި މަގާމު ދަމަހައްޓަން އަލީފް ހުރީ އަޒުމުކަނޑައަޅައިގެންނެވެ.

ނިމާ ވަނީ މީގެ ކުރިން އެކި ފަހަރުތަކުގައި އީގަލްސްގެ ހެޑް ކޯޗުގެ ޒިންމާ ނަގައިގެން މަސައްކަތް ކޮށްފަ އެވެ. އެ ގޮތުން މިދިޔަ ސީޒަނުގައި އީގަލްސްގެ ކޯޗުކަމުން މުހައްމަދު ޝިޔާޒް (މޯހަން) ވަކިވުމުން ވަގުތީ ކޯޗަކަށް ހުރެ ނިމާ ވަނީ މާޒިޔާއާ ދެކޮޅަށް ލީގުގައި ނުކުމެ 0-0 އިން އެއްވަރުކޮށްފަ އެވެ. އެ މެޗު އީގަލްސް މޮޅުކޮށްދޭން ލިބުނު ޕެނަލްޓީ ހަންނަ އަތުން ވަނީ ނާކާމިޔާބުވެފަ އެވެ. އެކަމަކު، އޭގެ އެއް އަހަރު ފަހުން ހަންނަ މި ވަނީ އީގަލްސް މޮޅުކޮށްދިން ލަނޑު ޖަހައި، މެޗުގެ މޮޅު ކުޅުންތެރިޔާގެ މަގާމު ވެސް ހޯދައިފަ އެވެ. ގައުމީ ޓީމުން ބަންގްލަދޭޝް އަތުން 2-0 އިން މޮޅުވި މެޗުގައި ފުރަތަމަ ގޯލު ޖެހީ ވެސް ހަންނަ އެވެ.

ލީގުގައި ޓީސީ ކޮޅަށް އީގަލްސް މޮޅުކޮށްދިން ގޯލު ޖެހި ހަންނަ އުފާފާޅުކުރަނީ.--

މި ސީޒަނުގައި އީގަލްސްގެ ތަރި އަކީ ހަންނަ އެވެ. އޭނާ ވަނީ ސީޒަނުގައި ޖުމްލަ އެކު 13 މެޗު ކުޅުނުއިރު ހަ ގޯލު ޖަހައި، އަށް ގޯލު ޖަހަން ފުރުސަތު ތަނަވަސްކޮށްދިނުމުގެ އިތުރުން ހަ މެޗުގެ މޮޅު ކުޅުންތެރިއަކަށް ހޮވިފަ އެވެ.

ނިމާ ބުނީ ހަންނަ ބޭނުންވާ ކުޅުން ދަށްކަން ކޮންފިޑެންސް ދޭން އީގަލްސް ދެމި އޮންނާނެ ކަމަށެވެ.

"އީގަލްސްގައި އަހަރެމެން މިދޭ ކޮންފިޑެންސްގެ ބޭނުން ހިފަންވީ. ގޭމުގެ ތެރެއިން ބޯޅަ ހިފައިގެން ވަންނަން މި އިރުޝާދުދެނީ. އޭނަ އަށް ކޮންފިޑެންސާ އެކު ކުޅެލަން ފުރުސަތު ދީގެން މި ކުރިއަރު ވަނީ. އެ ދައްކަމުން އަންނަ ކުޅުން އިތުރަށް ފުޅާކުރެވޭނީ އެހެން،" ނިމާ ބުންޏެވެ.

މިދިޔަ އާދިއްތަ ދުވަހު ފަލަމަސްގަނޑަށް ލިބުނު އަނިޔާއެއްގެ ސަބަބުން ރޭގެ މެޗުގައި އީގަލްސްގެ އަހުމަދު ރިޒުވާން (ރިޒޭ) ނުކުޅެ އެވެ.

ނިމާ ބުނީ ރޭގެ މެޗުގައި ރިޒޭ ހުރިނަމަ ކުރިއަށްދިޔަ ބޯޅަތަކުގައި އީގަލްސްގެ ކުޅުން އިތުރަށް ފުރިހަމަވާނެ ކަމަށެވެ. އަދި ރިޒޭ ކަހަލަ ކުޅުންތެރިއަކަށް ގޯލު ޖެހޭނެ ފަދަ ފުރުސަތުތައް އީގަލްސް އިން ރޭ ތަނަވަސްކުރި ކަމަށް ނިމާ ބުންޏެވެ.

ލީގުގައި ދެން އީގަލްސް ކުޅޭ މެޗުގައި މި މަހު 16 ވަނަ ދުވަހުގެރޭ ކުޅޭނީ ޓީސީ ސްޕޯޓްސް ކްލަބާ އެވެ.