ޓެކާޒް މައިލޯ ފުޓްސަލް ޗެމްޕިއަންޝިޕްގައި އއ. މަތިވެރިއާ އެ އަތޮޅު ބޮޑުފޮޅުދޫ އިއްޔެ ކުޅުނު މެޗުގައި ބޮޑު މަރާމާރީއެއް ހިނގައި ދެ ރަށުގެ މަސްލަހަތު ގެއްލިއްޖެ އެވެ.

ރޭ ކުޅުނު އެ މެޗުގައި މާރާމާރީ ހިނގައި ދިޔައީ އޮފިޝަލުންނާއި ކުޅުންތެރިން އަދި ސަޕޯޓަރުންގެ މެދުގަ އެވެ. އެ ހާދިސާއާ ގުޅިގެން އއ. މަތިވެރި ކައުންސިލުން ބަޔާނެއް ނެރެފައިވާއިރު ބޮޑުފޮޅުދޫ ކައުންސިލުން ވެސް ވަނީ ބަޔާނެއް ނެރެފަ އެވެ. އަދި ދެ ކައުންސިލުން ވެސް ވަނީ މާރަމާރީ ފެށުމުގެ ސަބަބެއްގެ ގޮތުގައި އެކި ސަބަބުތައް ދައްކައިފަ އެވެ.

އެ ހާދިސާއާ ގުޅިގެން މަތިވެރީ ކައުންސިލުން ނެރުނު ބަޔާނުގައި ވަނީ ރަށުގެ އާއްމު މަސްލަހަތަށް ބަލައި ބޮޑުފޮޅުދޫގެ ކުޅުންތެރިންނާއި އޮފިޝަލުން މަތިވެރިއަށް ދެން ދަތުރުނުކުރުމަށް އެދިފަ އެވެ.

މި ނޫހާ ވާހަކަދައްކަވަމުން އއ. މަތިވެރި ކައުންސިލްގެ ނައިބު ރައީސް އަލީ ނާފިޒު ވެސް ވަނީ އެގޮތަަށް ތަކުރާރުކޮށް އިލްތިމާސްކުރައްވާފަ އެވެ.

"އިއްޔެގެ މެޗުގަ ކުޅިވަރުގެ ރޫހުގެ ތެރެއިން އައި ފޯރީގަ ހިނގައިދިޔަ ކަމެއް ކަމަށް ބެލެވެނީ އެއީ. އަޅުގަނޑުމެން އެގޮތަށް މަތިވެރިއަށް ނައުމަށް އެދުނީ އެއީ ރަށުގެ މަސްލަހަތު ގެއްލުނަ ނުދިނުމަށް،" ނާފިޒް ވިދާޅުވި އެވެ.

އޭނާ ވިދާޅުވީ މަތިވެރި އާއި ބޮޑުފޮޅުދުއަކީ އަބަދުވެސް ކުޅިވަރުގެ ވާދަވެރިކަން އޮންނަ ދެ ރަށް ކަމަށެވެ. ކުޅިވަރުގެ ތެރެއިން މެޗުތަކުން މޮޅުވިޔަސް ބަލިވިޔަސް ދިމާކުރުމާއި އިންޒާރު ދިނުން ފަދަ ކަންކަން އަބަދުވެސް ހިނގައިދާ ކަމަށެވެ.

"ރޭގަ އެ މާރާމާރީ ހިނގައިދިޔައީ ބަނދަރު މަތިން އަދި މެޗު ނިންމާފަ ދަނިކޮށް އަވަގުރާނަފަދަ އެއްޗިހި ގޮވުމުން. ދެން މާރާމާރީ ހިނގައިދިޔަ އިރު މިރަށު ޒުވާނެއްގެ ކަންފަތް ވެސް އިރައިގެން ގޮސްފައިވޭ. އެއީ ބޮޑަށް ދަތް އަޅައިގެންކަމަށް މައުލޫމާތު ލިބެނީ،" ނާފިޒް ވިދާޅުވި އެވެ.

ހަމަނުޖެހުން ހިނގައިދިޔައީ މިފަހުން ބޭއްވި ގޯލްޑަން ފުޓްސަލް ޗެލެންޖުގެ ތެރެއިން މަތިވެރި އަތޮޅުގެ ޗެމްޕިއަންކަން ނެގުމުން ކަމަށް ވެސް ނާފިޒް ލަފާކުރެއްވި އެވެ. އަދި އިއްޔެގެ ޓެކާޒް މެޗު ކުޅެން ބޮޑުފޮޅުދުއިން އައީ ގޯލްޑަން މުބާރާތުގެ ނާކާމިޔާބީގެ ބަދަލުހިފުމަށް ކަމަށް ވެސް އޭނާ ލަފާކުރެއްވި އެވެ.

މަތިވެރި ކައުންސިލުން ނެރުނު ބަޔާނުގައި ބުނީ އިއްޔެގެ މެޗުގެ ހަމަނުޖެހުންތައް ފުލުހުންނަށް ވެސް ހުށަހަޅާފައިވާ ކަމަށާއި އަދި އެ މައްސަލަ ފުލުހުން ތަހުގީގުކުރަމުންދާ ކަމަށެވެ.

"އެއީ ރަށުގެ އައްމު މަސްލަހަތު ދެވަނަ ފަހަރަށް ގެއްލިގެން ނުދިޔުމަށް. އެކަން އަޅުގަނޑުމެންނަށް މުހިންމުވާތީވެ. ދެން އެކަމުގައި ގޮތެއް ނިންމާނީ ޓެކާޒްއިން (ބޮޑުފޮޅުދޫ ގެނައުމާއި ދޭތެރޭ). ފައިނަލްގަ ތޮއްޑުއާ ބައްދަލުކުރަން ބޮޑުފޮޅުދޫ ކުޅުންތެރިން އަންނަން ޖެހޭނީ މަތިވެރިޔަށް އަދި އޮތް ގޮތުން. ހޮސްޓު ރަށަށްވީމަ،" ނާފިޒް ވިދާޅުވި އެވެ.

މަތިވެރި ކައުންސިލުން ބުނީ މުބާރާތުގައި ދެން ބައިވެރިވާ ތޮއްޑޫ ޓީމަށް ފުރިހަމަ މެހެމާންދާރީ އާއި ރައްކާތެރިކަން ދޭނެކަމުގެ ޔަގީންކަން ކައުންސިލުން ވަނީ އަރުވާފަ އެވެ.

އެ މާރާމަރީއާ ގުޅިގެން ބޮޑުފޮޅުދޫ ކައުންސިލުން ވެސް މިހާރު ވަނީ ބަޔާނެއް ނެރެފަ އެވެ. އެ ބަޔާނުގައި އެ ކައުންސިލުން ބުނީ މެެޗު އޮމާންކަމާއެކު ކުރިޔަށް ދަނިކޮށް ދެވަނަ ހާފުގައި މަތިވެރި ޓީމުގެ ސަޕޯޓަރުންގެ ތެރެއިން ބަޔަކު އެކި ފަހަރު މަތިން ސަޕޯޓަރުންނާއި ކުޅުންތެރިންނަށް އަމާޒުކޮށް ހަޑިހުތުރު ބަހުން މުހަތަބުކުރަމުންދިޔަ އިރު ވެސް އެކަން ހުއްޓުވާފައި ނުވާ ކަމަށް ބުނެފަ އެވެ.

"އެކަން ހުއްޓުވަން ބަޔަކު މަސައްކަތްކޮށްފައި ނެތްކަމީ މައްސަލަ ބޮޑުވެ ހޫނުވާން މެދުވެރިވި ސަބަބު ކަމުގައި މި ކައުންސިލުން ދެކެމެވެ،" ބޮޑުފޮޅުދޫ ކައުންސިލުން ނެރުނު ބަޔާނުގައި ބުންޏެވެ.

ބޮޑުފޮޅުދޫ ކައުންސިލްގެ ބަޔާނުގައި ބުނީ ބޮޑުފޮޅުދޫ ޓީމުގައި ހިމެނޭ މަތިވެރިއަށް ވެސް ނިސްބަތްވާ 18 އަހަރު ނުފުރޭ ކުޑަކުއްޖަކަށް މަތިވެރި ސަޕޯޓަރުންތަކެއް ދަނޑުން ބޭރުން ގޮވައި، ދަނޑަށް ވަދެ ހަމަލާދިންއިރު ވެސް ބޮޑުފޮޅުދޫ ސަޕޯޓަރުން ދިޔައީ ބަނދަރާ ދިމާލަށް ދަތުރުކުރަމުން ކަމަށެވެ.

"ދަނޑު ސަރަހައްދުގައި ހިނގައިދިޔަ ހަމަނުޖެހުމާ ގުޅިގެން ބޮޑުފޮޅުދޫ ޓީމާއި ސަޕޯޓަރުންނަށް ރައްކާތެރިކަން އެކަށީގެންވާ މިންވަރަށް ފޯރުކޮށްދެވިފައި ނުވުމުގެ ނަތީޖާއަކަށް ވެގެން ދިޔައީ ބަނދަރުގައި އިތުރަށް ހަމަނުޖެހުން ހިނގުމަށް މަގުފަހިވެގެން ދިޔަ ކަމަކަށެވެ،" އެ ބަޔާނުގައި ބުނެ އެވެ.

ބޮޑުފޮޅުދޫ ކައުންސިލުން ވަނީ އެ ހާދިސާގައި އެ ރަށުގެ ޓީމުގެ ސަޕޯޓަރުންނާއި މެނޭޖަރު އަދި ކުޅުންތެރިންނަށް ލިބުނު ގެއްލުން އެންމެ ހަރުކަށި އިބަރާތުން ކުއްވެރިކުރާ ކަމަށް އެ ބަޔާނުގައި ބުނެފަ އެވެ.

އަދި މަތިވެރީގެ ރައްޔިތަކަށް ލިބުނު އަނިޔާއާ ދޭތެރޭ ވެސް އެ ކައުންސިލުން ކަންބޮޑުވެ, ހިތާމަ ފާޅުކުރާކަމަށް ބަޔާނުގައި ބުންޏެވެ. އަދި އެ ހާދިސާގެ ކަންކަން ކަމާބެހޭ ފަރާތްތަކުން ބަލައިދިނުމަށް ބޮޑުފޮޅުދޫ ކައުންސިލުން ވެސް ވަނީ ގޮވާލާފަ އެވެ.

ނަމަވެސް ބޮޑުފޮޅުދޫ ކައުންސިލުން ވަނީ މަތިވެރީ ކައުންސިލުން ނެރުނު ބަޔާނަކީ ނާތަހުޒީބީ ޒިންމާދާރުކަން ކުޑަ ބަޔާނެއް ކަމަށް ބުނެ އެ ބަޔާން ކުށްވެރިކޮށްފަ އެވެ. އަދި މުބާރާތް ހޯސްޓުކުރާ ރަށުގެ ހައިސިއްޔަތުން ކުޅުންތެރިންނާއި އޮފިޝަލުންނަށް ރައްކާތެރިކަން ނުދެވޭނެ ކަމަށް މަތިވެރި ކައުންސިލުން ބުނާ ބުނުން ބޮޑުފޮޅުދޫ ކައުންސިލުން ވަނީ ކުށްވެރިކޮށްފަ އެވެ.

އެ ބަޔާނާއި ގުޅިގެން ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް މި ނޫހަށް ވިދާޅުވީ ކައުންސިލްގެ އިލްތިމާސަކީ ދެން ވެސް އެއްވެސް ފަރާތަކުން ދެ ރަށުގެ ދެމެދުގައި އޮންނަ ގުޅުމަށް ބުރޫއަރާފާނެފަދަ އަމަލެއް އަދި ވާހަކަތަކެއް ވެސް ނުދެއްކުން ކަމަށެވެ.

"އެއްވެސް ފަރާތަކުން ދެ ރަށުގެ މަސްލަހަތަށް ގެއްލުންވެދާނެ ފަދަ ކަމެއް ނުކުރުމަށް މި އެދެނީ. އެފަދަ ވާހަކަ ވެސް ނުދައްކަން،" ޝުޖާއު ވިދާޅުވިި އެވެ.