މާލޭގެ ތިން ސަރަހައްދެއްގައި ރޭ މާރާމާރީ ހިންގައިފި އެވެ.

ފުލުހުން ބުނީ ރޭ މާރާމާރީ ހިންގާފައި ވަނީ މާފަންނު މުނިޔާމަގުގައި ހުންނަ ޑިޕަބްލިކް ކެފޭ ތެރޭގައި އާއި ޝަހީދު ކުޑަނެވި ތުއްތު މަނިކު ހިނގުމުގައި ހުންނަ ކިންޒާ ކެފޭ ކުރިމަތީގަ އާއި ހެންވޭރު ފިލިގަސް މަގުގައި ހުންނަ ނޫރު މިސްކިތް ކައިރީގައި ކަމަށެވެ.

ކިންޒާ ކުރިމަތީގައި މާރާމާރީ ހިންގީ ތޫނު ހަތިޔާރު ބޭނުން ކޮށްގެން ކަމަށް ފުލުހުން ބުންޏެވެ.

އޭގެތެރެއިން އެއްވެސް މާރާމާރީއެއްގައި މީހަކު ޒަހަމުވީކަމެއް ނުވަތަ ނޫންކަމެއް އަދި ނޭނގެ އެވެ. އަދި އެ މާރާމާތީތަކާ ގުޅިގެން މީހަކު ހައްޔަރުކުރި ކަމެއް ވެސް އަދި ފުލުހުން ހާމައެއް ނުކުރެ އެވެ.

މާލޭގައި ރޭ މާރާމާރީތަކެއް ހިންގާފައި މިވަނީ ސިލްސިލާކޮށް ހަމަލާ ބަދަލުކުރުންތަކެއް ހިނގާތާ ދުވަސްތަކެއް ވުމަށްފަހު އެވެ.

އެގޮތުން މިދިޔަ މަހުގެ ތެރޭގައި ވެސް ސިލްސިލާ މާރާމާރީތަކެއް ހިންގާފައިވާއިރު، ބައެއް ވެހިކަލްތަކުގައި ރޯކުރުމުގެ ސިލްސިލާއެއް ވެސް ދެ ބައެެއްގެ ދެމެދުގައި ހިންގާފައިވެ އެވެ.