ޓީރެކްސް ބާސްކެޓްބޯލް ކްލަބް ބަލިކޮށް ގައުމީ ބާސްކެޓްބޯޅަ މުބާރާތުގެ ފައިނަލުގެ ފުރަތަމަ ޖާގަ ކިންގްސް ބާސްކެޓްބޯލް ކްލަބުން ހޯދައިފި އެވެ.

ގައުމީ ބާސްކެޓްބޯޅަ މުބާރާތުގެ ފައިނަލުން ކިންގްސް ޖާގަ ހޯދިއިރު ފައިނަލުގައި އެ ޓީމު ނުކުންނާނީ ޓީރެކްސް އާއި ރެޑްވިންގްސް ވާދަކުރާ ތިން ވަނަ ސެމީ ފައިނަލުން މޮޅުވާ ޓީމަކާ ދެކޮޅަށެވެ. ރެޑްވިންގްސް ފަހު ސެމީ ފައިނަލުން ފުރުސަތު ހޯދީ ބައުސްގެ މައްޗަށް ކުރި ހޯދައިގެންނެވެ.

ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު މެޗުގައި ލީގުގެ ގަދަ ދެ ޓީމްގެ ކުރިމަތިލުން، ކިންގްސް އިން ކާމިޔާބުކުރީ 89-72 ޕޮއިންޓުންނެވެ.

މެޗުގެ ފުރަތަމަ ކުއާޓާ ނިމުނުއިރު، ދެ ޕޮއިންޓުން ޓީރެކްސް އޮތީ ކުރީގަ އެވެ. ނަމަވެސް ދެ ވަނަ ކުއާޓާއާ ހަމައިން ކިންގްސް އިން މެޗުގެ ކޮންޓްރޯލް ހޯދައި ލީޑް ނެގި އެވެ. ދެ ވަނަ ކުއާާޓާ ނިމުނުއިރު، ކިންގްސް އޮތީ 15 ޕޮއިންޓްގެ ލީޑެއް ނަގައިފަ އެވެ.

ތިން ވަނަ ކުއާޓާގައި ޓީރެކްސް އިން ރަނގަޅު ވާދައެއް ކުރި ނަމަވެސް ކިންގްސް ލީޑު ހިފަހައްޓައި ފަހު ވަގުތު ލީޑު ފުޅާކުރި އެވެ. ފަހު ކުއާޓާގެ ސްކޯ އަށް ބަލާއިރު ޓީރެކްސް ތިން ޕޮއިންޓްގެ ތަފާތެއް ދެއްކި ނަމަވެސް ކިންގްސް އޮތީ ލީޑުގައި ހަމަޖެހިލައިގެންނެވެ.

މުޅި މެޗަށް ބަލާއިރު ދެ ޓީމްގެ މައިގަނޑު ތަފާތަކަށް ފެނުނީ ބިދޭސީ ކުޅުންތެރިންނެވެ. ކިންގްސް ދެ ކުޅުންތެރިން ކަމަށްވާ ޑެކޯރޭ ޖޯންސް އާއި އާލަންޑޯ ކުކް މޮޅު ކުޅުމެއް ދެއްކިއިރު، ޓީރެކްސްގެ އެންމެ މުހިންމު ކުޅުންތެރިޔާ ފިލިޕް ވުކޮސެވިޗަށް މި މެޗުގައި މާ އެދެވޭ ކުޅުމެއް ނުދެއްކެ އެވެ. އަނިޔާގެ ސަބަބުން މެޗު ފެށިއިރު ހުރީ ކޮސްޓާ ޑޮޑެވިޗެވެ. ފިލިޕް މެޗުގައި ކުޅުނީ އެންމެ 14 މިނެޓެވެ.

ޓީރެކްސް އަތުން މޮޅުވެ ޗެމްޕިއަން ކިންގްސް ފައިނަލުން ޖާގަ ހޯދިއިރު، ޓީރެކްސް އާއި ދެކޮޅަށް ސެމީ ފައިނަލް ފަހު މެޗުގައި ނުކުންނާނީ ރެޑްވިންގްސް ބީސީ އެވެ.

ރެޑްވިންގްސް އިން ވަނީ ސެމީ ފައިނަލް ފުރަތަމަ މެޗުގައި ބައުސްގެ މައްޗަށް 88-97 ޕޮއިންޓުން ކުރި ހޯދައިފަ އެވެ. ފަހު ތިން ކުއާޓާގައި ބައުސް ވާދަވެރި ކުޅުމެއް ދެއްކިނަމަވެސް، ފުރަތަމަ ކުއާާޓާގައި ނެގި ލީޑާ އެކު ރެޑްވިންގްސް އިން ވަނީ ނުވަ ޕޮއިންޓްގެ ތަފާތުން މެޗު ކާމިޔާބުކޮށްފަ އެވެ.

ފޯރިގަދަ ސެމީ ފައިނަލުގައި ދެ ޓީމުގެ ބިދޭސީ ކުޅުންތެރިން ވެސް ރަނގަޅު ކުޅުމެއް ދެއްކި އެވެ. މި މެޗުގައި އެންމެ ބޮޑު ތަފާތަކަށްވީ ރެޑްވިންގްސްގެ ކެޕްޓަން މުހައްމަދު ޒީދާން އާއި ހަސަން ނަދީމް އެވެ. އެ ދެ ކުޅުންތެރިން ވަނީ މުހިންމު ދަނޑިވަޅުގައި ޕޮއިންޓްތަކެއް އެއްކޮށްދީ މެޗުން ޓީމު މޮޅުވުމުގައި ތަފާތު ދައްކައިފަ އެވެ.

ރެޑްވިންގްސް އާއި ޓީރެކްސް ވާދަކުރާ ސެމީ ފައިނަލް ފަހު މެޗު އޮންނާނީ އަންނަ އަންގާރަ ދުވަހުގެ ރޭގަނޑު 08:30 ގަ. އެވެ. ގައުމީ މުބާރާތުގެ ފިރިހެން ފައިނަލް މެޗު އޮންނާނީ އަންނަ ހުކުރު ދުވަހުގެ ރޭ 08:30 ގަ އެވެ.

އިއްޔެ ކުޅުނު އަންހެން ޑިވިޝަނުގެ ސެމީ ފައިނަލުގައި ކުއީންސް ބާސްކެޓްބޯލް ކްލަބް 114-38 ޕޮއިންޓުން ބަލިކޮށް ސައިކްލޯން ބާސްކެޓްބޯލް ކްލަބް ވަނީ ފައިނަލުގެ ފުރަތަމަ ޖާގަ ހޯދައިފަ އެވެ. ފައިނަލުގައި ސައިކްލޯން ކުޅޭނެ ޓީމެއް އެނގޭނީ ތިން ވަނަ ސެމީ އަށް ފަހު އެވެ. ތިން ވަނަ ސެމީގައި ކުއީންސް ކުޅޭނީ ބެންޗް ސްޕޯޓްސް ކްލަބާ އެވެ. ބެންޗުން ކުޅުނު ސެމީ މެޗުގައި ވަނީ 71-31 އިން އެލީޓް ސްޕޯޓްސް ކްލަބް ބަލިކޮށްފަ އެވެ.