މިލާން (ޖެނުއަރީ 13) - އިތުރު ވަގުތުގެ ދެ ހާފް ކުޅެގެން 2-1 އިން ޔުވެންޓަސް ބަލިކޮށް އިންޓަ މިލާނުން އިޓާލިއަން ސުޕަ ކަޕްގެ ތަށި މިރޭ އުފުލާލައިފި އެވެ.

މިއީ 2010 ވަނަ އަހަރަށް ފަހު އިންޓަ އިން ސުޕަ ކަޕް ކާމިޔާބު ކުރި ފުރަތަމަ ފަހަރެވެ. މިއީ އިންޓަ އިން ސުޕަ ކަޕްގެ ތަށި އުފުލާލި ހަ ވަނަ ފަހަރެވެ. އިންޓަ އަށް ވުރެ ގިނައިން މި މުބާރާތް ކާމިޔާބުކުރީ ހަތް ފަހަރު ހޯދި އޭސީ މިލާނާއި ނުވަ ފަަހަރު ތަށި ކާމިޔާބުކުރި ޔުވެންޓަސް އެވެ.

މިރޭގެ މެޗަށް ނުކުތްއިރު ޔުވެންޓަސް އަށް ދިމާވެފައި އޮތް އެންމެ ބޮޑު ގޮންޖެހުމަކީ އެ ޓީމުގެ ތަރި ފެޑެރީކޯ ކިއޭސާ ކަކުލަށް ސީރިއަސް އަނިޔާއެއް ލިބި ކުޅުމާ ދުރަށްދާން ޖެހުމެވެ. އަނިޔާގެ ސަބަބުން ކިއޭސާ އަށް އިޓަލީގެ ވޯލްޑް ކަޕް ކޮލިފައިން ޕްލޭއޮފް ބުރުގައި ވެސް ނުކުޅެވޭނެ އެވެ.

މިރޭގެ މެޗު ފަށައިގެން ރަނގަޅަށް ކުޅެ، ޔުވެންޓަސް އިން ލީޑުނެގި އެވެ. މެޗުގެ 25 ވަަނަ މިނިޓްގައި އަލްވާރޯ މޮރާޓާ ނެގި ހުރަހަކުން އެމެރިކާގެ މިޑްފީލްޑަރު ވެސްޓަން މެކްކެނީ ވަނީ ބޮލުން ގޯލެއް ޖަހައިފަ އެވެ.

އެކަމަކު، ޔުވެންޓަސް އަށް ލީޑު ހިފަހައްޓައިލެވުނީ 10 މިނިޓް އެވެ. މެޗުގެ 35 ވަނަ މިނިޓްގައި އިންޓަގެ ލަޓާރޯ މާޓީނޭޒް ވަނީ އެ ޓީމަށް ޕެނަލްޓީ އަކުން އެއްވަރުކޮށްދީފަ އެވެ. މިއީ އިންޓަގެ ބޮސްނިއާ ފޯވާޑް އެޑިން ޒެކޯ އަށް ޔުވެންޓަސްގެ އޭރިއާތެރެެއިން ކުރި ފައުލަކަށް ދިން ޕެނަލްޓީ އެކެވެ.

މެޗުގެ ފުރިހަަމަ ވަގުތު ކަމަށްވާ 90 މިނިޓް ހަމަވުމުގެ ކުރިން ދެ ޓީމުން ވެސް ލަނޑެއް ޖަހައި މެޗުން މޮޅުވެވޭތޯ ބެލި އެވެ. އެކަމަކު، އެއްވެސް ޓީމަކަށް އެކަން ކާމިޔާބުނުވެ، 2016 ވަަނަ އަހަރަށް ފަހު ފުރަތަމަ ފަހަރަށް ސުޕަ ކަޕް މެޗެއްގައި އިތުރު ވަގުތުގެ ދެ ހާފް ކުޅެން ޖެހުނީ އެވެ.

އިންޓަ މޮޅުވި ގޯލު ޖެހީ އިތުރު ވަގުތުގެ ދެ ވަަނަ ހާފްގެ ވެސް ފަހު މިނިޓްގަ އެވެ. މި ގޯލު ޖެހީ އޭރިއާތެރެއިން މަޓެއޯ ޑާމިއާން ދިން ބޯޅައަކުން އަލެކްސިސް ސަންޗޭޒް އެވެ. ސަންޗޭޒް ކޮންޓްރޯލް ކޮށްލުމަށް ފަހު ގޯލުގެ ކަނަށް ބޯޅަ ފޮނުވާލީ 121 ވަނަ މިނިޓްގަ އެވެ.

ސަންޗޭޒްގެ މި ގޯލު މިއީ ސުޕަ ކަޕް މެޗުގެ ތާރީހުގައި ފެނިގެންދިޔަ އެންމެ ލަހުން ޖެހި ގޯލެވެ. މީގެ ކުރިން އެންމެ ފަހުން ލަނޑު ޖެހުމުގެ ރެކޯޑް އޮތީ 2014 ވަަނަ އަހަރުގެ ސުޕަ ކަޕް މެޗުގައި ޔުވެންޓަސް އަތުން ނަޕޯލީ މޮޅުކޮށްދޭން ގޮންޒާލޯ ހިގައިން ޖެހި ގޯލެވެ. އޭނާ ގޯލު ޖެހީ 118 ވަަނަ މިނިޓްގަ އެވެ.