އަރަބިއްޔާ ސުކޫލުގެ ދަރިވަރުން ވަގުތީގޮތުން އިއްޒުއްދީން ސްކޫލަށް ބަދަލު ކުރުމަށް އެޑިއުކޭޝަން މިނިސްޓްރީން ނިންމާފައިވާތީ އެކަމާ ދެކޮޅަށް އެ ސްކޫލްގެ ބެލެނިން ކުރަމުންދާ ކަންކަން ހައްލުވަންދެން ހުއްޓާ ނުލާނެ ކަމަށް ބެލެނިވެރިން ބުނެފި އެވެ.

އަރަބިއްޔާ ސްކޫލް ކުރިމަތީގައި އިއްޔެ ހަވީރު އެ އިހްތިޖާޖްކުރަން ފެށީ އެ ސުކޫލުގައި ބެލެނިވެރިން ބޭއްވި ބައްދަލުވުމަކަށްފަހު އެވެ. ބެލެނިވެރިން ބުނެފައި ވަނީ އިއްޒުއްދީން ސްކޫލަށް ދަރިވަރުން ގެންގޮސްފި ނަމަ "ޅަދަރީންގެ އަރަބި އިސްލާމީ ތައުލީމު ފަނާވެ" ހިނގައިދާނެ ކަމަށެވެ.

އެ އިހްތިޖާޖުގެ ބައިވެރިން ތިބީ "ސޭވް އަރަބިއްޔާ" ފެހިކުލައިން ޖަހާފައިވާ ހުދު ޓީޝާޓު ލައިގެންނެވެ. އެ ޓީޝާޓުގަ "ދާއިމީ ހައްލެއް" އަދި "މުސްތަގުއްލު އިމާރާތެއް" މިފަދަ ޝުއޫރުތައް ލިޔެފައި ހުއްޓެވެ.

އަރަބިއްޔާގެ އިހުތިޖާޖުގައި އިސްކޮށް ހަރަކާތެރިވާ ބެލެނިވެރިޔަކު "އަދަދު" އަށް ބުނީ ބެލެނިވެރިން ނިންމާފައި ވަނީ އެޑިޔުކޭޝަން މިނިސްޓްރީން ނިންމާފައިވާ ނިންމުމާ ދެކޮޅަށް ކުރަން ޖެހޭ ކަންކަން މައްސަލަ ހައްލުވަންދެން ކުރިއަށް ގެންދިއުމަށް ކަމަށެވެ.

"ބެލެނިވެރިން އެދެނީ ވަގުތީގޮތުން ތިބެވޭނެ ވަކި އިމާރާތެއް ނުވަތަ ޖާގައެއް ހަމަޖައްސައިދިނުމާއެކު އާ އިމާރާތެއް ރަސްމީކޮށް އަރަބިއްޔާ ސްކޫލުގެ 800 ދަރިވަރުންނަށް ހަމަޖައްސައިދިނުމަށް،" އޭނާ ބުންޏެވެ.

އެޑިޔުކޭޝަން މިނިސްޓްރީއަށް އެ ސްކޫލުގެ ޕީޓީއޭއިން މަޝްވަރާ ކުރި ކަންކަން ފޮނުވުމުން ވެސް އެއްވެސް ޖަވާބެއް ދީފައިނުވާ ކަމަށް ބެލެނިވެރިން ބުންޏެވެ.

"މިނިސްޓްރީއަށް ސިޓީ ފޮނުވި ދުވަސް ނޫން އަނެއް ދުވަހުގެ ރޭގަނޑު ބަޔާނެ ނެރުނީ އިއްޒުއްދީނަށް ބަދަލު ކުރާ ކަމަށް. ރައިސް އޮފީހަށް ވެސް ދެ ފަހަރުމަތިން ސިޓީ ފޮނުވީމަވެސް ޖަވާބެއް ނުދެއްވި،" އޭނާ ކިޔައިދިނެވެ.

ރައިސް އޮފީހަށް ސިޓީ ފޮނުވާފައި ވަނީ ރައީސް އިބްރާހިމް މުހައްމަދު ސޯލިހާ ބައްދަލު ކުރުމުގެ އެންމެ ބޮޑު އެއް ބޭނުމަކީ ބެލެނިވެރިންނާ އެއްވެސް މަޝަވަރާއެއް ކުރުމެއް ނެތި ކަންކަން ނިންމަމުން ދާތީ ކަމަށް ވެސް ބެލެނިވެރިން ބުންޏެވެ.

އަރަބިއްޔާ ސްކޫލުގެ އާ އިމާރާތް، 29 މިލިއަން ރުފިޔާއަށް ހަދަން އެންމެ ފުރަތަމަ ހަވާލުކުރީ މާލޭ ހައި ރައިޒިން ކުންފުންޏާ އެވެ. އެއީ މާޗް 2، 2011 ގަ އެވެ. ނަމަވެސް މަސައްކަތް ނުގެންދާތީ ޖުލައި 20، 2011 ގައި އުވާލި އެވެ. އެއަށް ފަހު އޮގަސްޓް 25، 2011 ގައި ފަހުން ހައުސިން މިނިސްޓްރީން އެ އިމާރާތުގެ މަސައްކަތް ހަވާލުކުރީ އެލްއެފް ކޮންސްޓްރަކްޝަން އާ އެވެ.

ހަތް ބުރީގެ އެ އިމާރާތުގެ މަސައްކަތް އެކުންފުނިން ނިންމައި، އިމާރާތް ހުޅުވީ ސެޕްޓެމްބަރު 19، 2013 ގައެވެ. ހުޅުވިތާ އަށް އަހަރު ފަހުން އެ ސްކޫލުގެ ތަނބުތަކުގައި ބޮޑެތި ރެނދުތައް ލައި ވަރަށް ބޮޑަށް ވަނީ ހަލާކުވެފަ އެވެ.