އެތުލީޓުންނަށް ބާރު ލިބޭ ގޮތަށް އެކުލަވާލާފައިވާ އެތުލީޓްސް ކޮމިޝަންގެ ވޯޓުލުން މި މަހު 23 ވަނަ ދުވަަހަށް ތާވަލުކޮށްފައިވާއިރު، އިންތިހާބަށް ކުރިމަތިލާން ދިން މުއްދަތު މިއަދު އިތުރުކޮށްފި އެވެ.

އިންތިހާބުގައި ވާދަކުރަން ކުރިމަތިލާން އެތުލީޓުންނަށް ފުރަތަމަ ދިން މުއްދަތު ހަމަވީ މިދިޔަ ބުރާސްފަތި ދުވަހު އެވެ.

މޯލްޑިވްސް އޮލިމްޕިކް ކޮމިޓީ (އެމްއޯސީ) އިން މިއަދު އާންމުކުރީ ސޯޝަލް މީޑިއާ ޕޯސްޓްގައިވާ ގޮތުން އިންތިހާބަށް ކުރިމަތިލުމުގެ މުއްދަތު ހަމަވާނީ އަންނަ ބުރާސްފަތި ދުވަހު އެވެ. ކުރިމަތިލާ އެތުލީޓުންގެ ތެރެއިން ވާދަކުރާ ކެންޑިޑޭޓުންގެ ނަން އިއުލާނުކުުރުން އޮންނާނީ އަންނަ ހަފްތާގެ އާދިއްތަ ދުވަހު އެވެ.

އެތުލީޓްސް ކޮމިޝަނަކީ 2009 ވަަނަ އަހަރު އޮލިމްޕިކް ކޮމިޓީ އަށް މެމްބަރުން އިންތިހާބުކުރަން ފެށުނު އިރުން ފެށިގެން ހިމެނޭ ބައެކެވެ. އެކަމަކު، މީގެ ކުރިން އެ ކޮމިޝަންގެ އެކްޓިވް ބައެއްގެ ގޮތުގައި ފާހަގަވެފައި ނެތެވެ.

އެތުލީޓްސް ކޮމިޝަނަށް ބާރުތައް ދޭގޮތަށް ފާސްކޮށްފައިވަނީ 2019 ވަނަ އަހަރު ބޭއްވި އޮލިމްޕިކް ކޮމިޓީގެ އަހަރީ އާންމު ޖަލްސާގަ އެވެ. އެތުލީޓްސް ކޮމިޝަނުގެ ފުރަތަމަ ދެ މެމްބަރުންގެ ގޮތުގައި 2020 ވަނަ އަހަރު ފެބްރުއަރީ މަހު އިއުލާނުކުރީ ރާއްޖޭގެ އެންމެ ކާމިޔާބު ފިރިހެން އެތުލީޓް، ހަސަން ސާއިދު އާއި ކާމިޔާބު ފެތުންތެރިޔާ، އައިމިނަތު ސަޖަން އެވެ. މިދިޔަ ޖޫން މަހު 10 ވަނަ ދުވަހު ބޭއްވި އޮލިމްޕިކް ކޮމިޓީގެ އިންތިހާބުގައި އެތުލީޓްސް ކޮމިޝަންގެ އިސް މަގާމަށް ވާދަކުރީ ސަޖަން އާއި ސާއިދު އެވެ. އެ މަގާމަށް އިންތިހާބުވީ ސާއިދު އެވެ.

އެތުލީޓްސް ކޮމިޝަން އެެކުލެވޭނީ ފަސް މެމްބަރުންގެ މައްޗަށެވެ. އެއީ އޮލިމްޕިކްސްގައި ވާދަކޮށްފައިވާ ދެ އެތުލީޓުން ހިމެނޭ ގޮތަށެވެ. އަނެއް ތިން މެމްބަރުން ވާން ޖެހޭނީ އޮލިމްޕިކް ކުޅިވަރުތަކަށް ނިސްބަތްވާ އެތުލީޓުން ނޫނީ ކުޅުންތެރިންނަށެވެ. އެތުލީޓްސް ކޮމިޝަންގެ ދައުރެއްގެ މުއްދަތަކީ ހަތަރު އަހަރެވެ. އެތުލީޓްސް ކޮމިޝަންގެ ފަރާތުން އޮލިމްޕިކް ކޮމިޓީގެ ހިންގާ ކޮމިޓީ އަށް ދާނެ މެމްބަރެއް ކަނޑައަޅާނީ އެތުލީޓްސް ކޮމިޝަނުންނެވެ.

މިހާތަނަށް ވޯޓުލާން ރަޖިސްޓްރީވީ 357 އެތުލީޓުން

އޮލިމްޕިކް ކޮމިޓީގެ ސެކްރެޓަރީ ޖެނެރަލް ތަމޫހު އަހުމަދު ސައީދު (ތަމޫ)، "އަދަދު" އަށް މީގެ ކުރިން ވިދާޅުވީ އެތުލީޓްސް ކޮމިޝަން ރަސްމީކޮށް ފަށައިގަތުމުގެ މަސައްކަތުގެ ތެރެއިން ސެޝަނެއް ބޭއްވުމުގެ އިތުރުން އޮލިމްޕިކް ކުޅިވަރުތަކުގެ އެސޯސިއޭޝަންތަކަށް 2013 ވަނަ އަހަރުން ފެށިގެން ގައުމީ ޓީމުގައި ހިމެނިފައިވާ ކުޅުންތެރިންގެ ލިސްޓެއް ފޮނުވަން އެދުނު ކަމަށެވެ. ތަމޫ ވަނީ ބައެއް އެސޯސިއޭޝަންތަކުން ދޭ އެއްބާރުލުން ކުޑަކަން ފާހަގަކުރައްވައިފަ އެވެ.

އޮލިމްޕިކް ކޮމިޓީން މިއަދު އާންމު ކުރި ޕޯސްޓް.

އޮލިމްޕިކް ކޮމިޓީން ވަނީ މިދިޔަ ހުކުރު ދުވަހާ ހަމައަށް ވޯޓުލާން ރަޖިސްޓްރީވެފައިވާ އެތުލީޓުންގެ ލިސްޓެއް އެކުލަވާލައި އިއުލާނު ގެެޒެޓްކޮށްފަ އެވެ. އެ ލިސްޓުގައިވާ ގޮތުން ހުކުރު ދުވަހާ ހަމައަށް 357 އެތުލީޓުން ވަނީ ވޯޓުލާން ރަޖިސްޓްރީވެފަ އެވެ.

އޮލިމްޕިކް ކޮމިޓީން ގެޒެޓްކުރި އެ ލިސްޓުގައި ނުހިމެެނޭ އެންމެ ބޮޑު ކުޅިވަރަކީ ފުޓްބޯޅަ ކުޅުންތެރިންގެ ނަމެވެ.

އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ)، މިއަދު "އަދަދު" އަށް ވިދާޅުވީ ފުޓްބޯޅަ ކުޅުންތެރިންގެ ތެރެއިން އެތުލީޓްސް ކޮމިޝަންގެ އިންތިހާބުގެ ކަންކަމަށް ޝައުގުވެރިވާ ކުޅުންތެރިއަކު ނެތުމުން ރަޖިސްޓްރީކުރަން ނުފޮނުވާ ކަމަށެވެ.

ކުޅުންތެރިން އަމިއްލަ އަށް ރަޖިސްޓްރީވާން ބޭނުންނަމަ މި މަހު 14 ވަނަ ދުވަހުގެ ކުރިން އޮލިމްޕިކް ކޮމިޓީއާ ގުޅައިގެން އެކަން ކުރިއަށް ގެންދެވޭނެ އެވެ. ވޯޓުލާން ރަޖިސްޓްރީވުމުގެ އެންމެ ފަހުގެ މުއްދަތަކީ އަންނަ ހަފްތާގެ އަންގާރަ ދުވަހު 12:00 ގެ ކުރިންނެވެ. އަންނަ ހަފްތާގެ ބުރާސްފަތި ދުވަހު ވޯޓުލާ އެތުލީޓުންގެ އެންމެ ފަހުގެ ލިސްޓު އާންމުކުރާނެ އެވެ.

އިންތިހާބުގައި ވޯޓުލާން ރަޖިސްޓްރީ ކުރުމަށް ފަހު ވޯޓުލާން ނާދެވޭ އެތުލީޓުންގެ ބަދަލުގައި ޕްރޮކްސީން ހަމަޖައްސަން ދީފައިވާ މުއްދަތު ހަމަވާނީ މި މަހުގެ 20 ވަނަ ދުވަހަށެވެ.

އޮލިމްޕިކް ކޮމިޓީން ހުކުރު ދުވަހު އާންމުކުރި ވޯޓު ލެވޭ އެތުލީޓުންގެ ލިސްޓު: https://storage.googleapis.com/gazette.gov.mv/docs/iulaan/64997.pdf