ބަނދަރުތަކުގެ ރައްކާތެރިކަން ކަށަވަރުކުރުމަށް ބޭނުންވާ ގާނޫނާއި ގަވާއިދުތައް ނުހެދި ދިގުލައިގެންދާތީ، ބަނދަރުތަކުގެ ގާނޫނެއް އެކުލަވާލުމަށް ފަހު ރައްޔިތުންގެ މަޖިލިހަށް ހުށަހަޅަން ޓްރާންސްޕޯޓް މިނިސްޓްރީއަށް 150 ދުވަހުގެ މުހުލަތެއް ދޭން އެސްއޯއީ ކޮމިޓީން ފާސްކޮށްފި އެވެ.

މިއީ ބަނދަރުތަކުގެ ގާނޫނެއް އެކުލަވާލަން ޓްރާންސްޕޯޓް މިނިސްޓްރީގައި ދަންނަވަން އެސްއޯއީ ކޮމިޓީން ފާސްކޮށް، މަޖިލިހުގެ ތަޅުމަށް ހުށަހަޅަން ނިންމި ދެވަނަ ފަހަރެވެ.

ކުރިން މި ގާނޫނު އެކުލަވާލަން ޓްރާންސްޕޯޓަށް އެންގީ މާލޭ ވިޔަފާރި ބަނދަރުގައި ހިނގައިދިޔަ ނުރައްކާތެރި ހާދިސާތަކެއްގައި ދެ މީހެއްގެ ފުރާނާ ގެއްލުމާ ގުޅިގެން ބަނދަރުތަކުގެ ސަލާމަތާ ގުޅޭ މައްސަލަ ކޮމިޓީން ބެލުމަށް ފަހު އެވެ.

އެ ފަހަރު މައްސަލައިގެ ކޮމިޓީ ރިޕޯޓުގައި ފާހަގަކުރި ގޮތުގައި ރާއްޖެ ބައިވެރިވާ ސޭފްޓީ އޮފް ލައިފް އެޓް ސީ (ސޯލާސް) މުއާހަދާގެ ދަށުން ބަނދަރުތަކުގެ ސަލާމަތާ ބެހޭ ކަންކަން ބަލަހައްޓަން ދައުލަތުގެ މައްޗަށް ލާޒިމުކުރެ އެވެ.

އަދި، އެކަން އެންމެ ހަރުދަނާކޮށް ކުރެވޭނީ ގާނޫނަކުން ބާރުލިބޭ ގަވާއިދުތަކެއްގެ ދަށުން ކަމަށް ފެެންނާތީ، އެ ގާނޫނު ވީހާވެސް އަވަހަކަށް އެކުލަވާލުން މުހިންމު ކަމެއްގެ ގޮތުގައި ރިޕޯޓުގައި ހިމެނީ އެވެ.

އޭރު މި ޒިންމާ މަތިކުރީ ޓްރާންސްޕޯޓު މިނިސްޓްރީގެ ދަށުން އޮންނަ، ޓްރާންސްޕޯޓް އޮތޯރިޓީއާ އެވެ. އެކަމަކު ހުސްވި ހަފުތާގެ ތެރޭގައި މަޖިލިހުން ވަނީ މި އޮތޯރިޓީ އުވާލަން ފާސްކޮށް، އޮތޯރިޓީގެ ހުރިހާ ޒިންމާއަކާއި މަސްއޫލިއްޔަތެއް ޓްރާންސްޕޯޓް މިނިސްޓްރީއަށް ބަދަލުކުރަން ނިންމާފަ އެވެ.

"ވީއެންމެ އަވަސް ފުރުސަތެއްގައި ބަނދަރުތަކުގެ ގާނޫނެއް އެކުލަވާލައި ރައްޔިތުންގެ މަޖިލިހަށް ހުށަހެޅުމަށް މޯލްޑިވްސް ޓްރާންސްޕޯޓް އޮތޯރިޓީއަށް ދަންނަވައި، އަދި މި ގާނޫނާ އެކު އެކުލަވާލަންޖެހޭ ބަނދަރުތަކުގެ ސަލާމަތާބެހޭ ގަވާއިދުތައް އެކުލަވާލުމަށް ދެންނެވުމަށް" އެސްއޯއީ ކޮމިޓީގެ ރިޕޯޓުގައި ބުންޏެވެ.

އެކަމަކު މަޖިލިހުން އެ ރިޕޯޓު ފާސްކުރިތާ މިއަދާ ހަމައަށް އަށް މަސް ވޭތުވީއިރު، ބަނދަރުތަކުގެ ގާނޫނު އެކުލަވާލުމުގެ މަސައްކަތް ނުނިމެ އެވެ.

ވަކި މުއްދަތެއްގެ ތެރޭގައި އެ ގާނޫނު އެކުލަވާލަން ރިޕޯޓުގައި ހިމެނީ ވެސް، މިހާ ގިނަ ދުވަސް ވީއިރު ގާނޫނު ޑްރާފްޓުކޮށް ނުނިމޭތީ އެވެ.

މި މައްސަލަ މެމްބަރުންގެ ސަމާލުކަމަށް އަލުން ގެނައީ ރާއްޖެއަށް ބޭރުން މުދާ ގެންނަ ބަނދަރުތައް ބަލަހައްޓާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިންނެވެ.

އެގޮތުން އެސްއޯއީ ކޮމިޓީގައި މިކަމުގެ ކަންބޮޑުވުން އުފުއްލަވަމުން އެމްޕީއެލްގެ މެނޭޖިން ޑިރެކްޓަރު ޝާހިދު އަލީ ވިދާޅުވީ މެރިޓައިމް ގާނޫނާއި، ހާއްސަކޮށް ބަނދަރުތަކުގެ ގާނޫނެއް ނެތުމުން އެ ކުންފުންޏަށް ދަތިވާ ކަމަށެވެ.

އަދި، ބަނދަރުތަކުގެ ކަންކަން ރެގިއުލޭޓުކުރަން މެރިޓައިމް ގާނޫނުތަކާއި މެރިޓައިމް ރެގިއުލޭޓަރީ އޮތޯރިޓީއެއް އޮންނަން ޖެހޭ ކަމަށް އެ ކުންފުންޏަށް ކޮންސަލްޓަންސީ ދޭ ފަރާތްތަކުން ވެސް ލަފާދޭ ކަމަށް ވެސް އޭނާ ވިދާޅުވި އެވެ.

ހަމަ އެހެންމެ، އޮޕަރޭޓަރެއްގެ ހައިސިއްޔަތުން އަމިއްލައަށް ގަވާއިދު އެކުލަވާލަން ޖެހުމަކީ ރަނގަޅު ގޮތަކަށް ނުވާތީ އެ ގާނޫނުތައް ނެތް މައްސަލަ ޓްރާންސްޕޯޓް އޮތޯރިޓީ އާއި މިނިސްޓްރީގެ ސަމާލުކަމަށް ވަރަށް ގިނަ ފަހަރު ގެނެވިފައިވާ ކަމަށް އޭނާ ވިދާޅުވި އެވެ.

ބަނދަރުތަކުގެ ގާނޫނު ޑްރާފްޓުކުރުމުގެ މަސައްކަތާ ގުޅިގެން ޓްރާންސްޕޯޓު މިނިސްޓްރީގެ މެރިޓައިމް ޑިޕާޓްމެންޓުގެ ހެޑް، ކެޕްޓަން އާދިލް ރަޝީދު "އަދަދު"އަށް ވިދާޅުވީ، ގާނޫނު އެކުލަވާލުމުގެ މަސައްކަތް ކުރަމުންދަނީ އެޓާނީ ޖެނެރަލް އޮފީހުން ކަަމަށެވެ.