މެޑްރިޑް (ސެޕްޓެމްބަރު 9) - ބާސެލޯނާގައި ހުރިއިރު ބޯ ނުކޮށާނެ ކަމަށް ބުނެ އިންޓަވިއު ދިން އެންޓޮއިން ގްރީޒްމަން އަލުން އޭނާ ކުރިން ކުޅުނު އެތުލެޓިކޯ މެޑްރިޑަށް ބަދަލުވުމަށް ފަހު ބޯކޮށުމާ އެކު ބާސެލޯނާ ސަޕޯޓަރުން ހިތްހަމަނުޖެހިއްޖެ އެވެ.

އުމުރުން 29 އަހަރުގެ ގްރީޒްމަން، މިދިޔަ އަހަރު ނޮވެމްބަރު މަހު ސްޕެއިނުގެ ނޫހަކަށް ދިން އިންޓަވިއުއެއްގައި ވަނީ ބާސެލޯނާ އިން ބުނި ކަމުގައި ވިޔަސް އޭނާގެ ދިގު އިސްތަށިގަނޑު ނުކޮށާާނެ ކަމަށް ބުނެފަ އެވެ. ގްރީޒްމަން އޭނާގެ ކެރިއަރުގެ އެންމެ ރަން ދުވަސްވަރު އެތުލެޓިކޯގައި ހޭދަކުރީ ކުރުކޮށް ބޯކޮށައިގެން ހުރެ އެވެ. އެހެންވެ، ބާސެލޯނާގެ ބައެއް ސަޕޯޓަރުން އެދުނީ އެ ގޮތަށް ބާސެލޯނާގައި ވެސް ކުރިއަށްދާށެވެ. އެކަމަކު، ބާސެލޯނާގައި ބޯ ކޮށަން ގްރީޒްމަން ބޭނުމެއް ނުވި އެވެ.

މި ފަހަރުގެ ޓްރާންސްފާ މާކެޓްގެ ފަހު ދުވަހު ގްރީޒްމަން ވަނީ އަލުން އެތުލެޓިކޯއާ ގުޅިފަ އެވެ. މީގެ ދެ އަހަރު ކުރިން އެތުލެޓިކޯ ދޫކޮށް 135 މިލިއަން ޑޮލަރަށް ބާސެލޯނާ އަށް ބަދަލުވި ގްރީޒްމަން އަލުން އެތުލެޓިކޯ އަށް ބަދަލުވީ ލޯން ފީގެ ގޮތުގައި މި ސީޒަނުގައި ހަތަރު މިލިއަން ޑޮލަރު ދޭ ގޮތަށެވެ. އަދި އެ އެއްބަސްވުން ނިމުމުން ދާއިމީ ކޮންޓްރެކްޓެއްގައި ގްރީޒްމަން އެތުލެޓިކޯގައި މަޑުކުރާނަމަ ބާސެލޯނާ އަށް 50 މިލިއަން ޑޮލަރު ދޭން ޖެހޭނެ އެވެ.

މި ސީޒަނުގައި ބާސެލޯނާގެ މެޗެއްގެ ތެރެއިން ގްރީޒްމަން.

އެތުލެޓިކޯ ކުޅުންތެރިއެއްގެ ގޮތުގައި ގްރީޒްމަން މީޑިއާ އަށް ތައާރަފްކުރުމުގެ ކުޑަ ވަގުތު ކޮޅެއް ކުރިން ވީޑިއޯ ޝޫޓިން ނަގަން އުޅުމުގެ ތެރޭގައި އޭނާ ބޯކޮށާލި އެވެ. އަދި އެ ވީޑިއޯ ސޯޝަލް މީޑިއާގައި އާންމުވުމާ އެކު ބާސެލޯނާ ސަޕޯޓަރުން ހިތްހަމަނުޖެހިގެން، ޝުއޫރުފާޅުކުރަން ފެށި އެވެ.

ސްޕެއިނުގެ ބައެއް މީޑިއާ ރިޕޯޓްތައް ބުނާގޮތުގައި ގްރީޒްމަން ބޯކޮށަން ނިންމީ ކެރިއަރުަގއި އާ ފެށުމަކުން އެތުލެޓިކޯގައި ކުރިއަށްދާން ސަޕޯޓަރުންގެ ފަރާތުން އައި ހުށަހެޅުންތަކަކަށް އިޖާބަދިނުމުގެ ގޮތުންނެވެ.

ރެއާލް ސޮސިއެޑާޑުން 2014 ވަަނަ އަހަރު އެންމެ ފުރަތަމަ އެތުލެޓިކޯ އަށް ބަދަލުވި ގްރީޒްމަން ވަނީ އެ ޓީމަށް އެ ފަހަރު ކުޅެދިން 256 މެޗުން 133 ގޯލު ކާމިޔާބުކޮށްފަ އެވެ. އަދި އެ ޓީމާ އެކު ޔޫރޮޕާ ލީގު، ސްޕެނިޝް ސުޕަ ކަޕް އަދި ޔުއެފާ ސުޕަ ކަޕް ކާމިޔާުބުކުރި އެވެ. އެކަަމަކު، ބާސެލޯނާ އަށް ކުޅެދިން 102 މެޗުން ގްރީޒްމަން އަށް ޖެހުނީ 35 ގޯލެވެ.