ފުވައްމުލަކުން ރޭ ފުރަން އޮތް މޯލްޑިވިއަންގެ ފްލައިޓެއް ހައިޖެކް ކުރާނެ ކަމުގެ އިންޒާރު ދިން މައްސަލައެއް ފުލުހުން ތަހުގީގު ކުރަން ފަށައިފި އެވެ.

މޯލްޑިވިއަންގެ މީޑިއާ ޑިރެކްޓަރު މޫސާ ވަސީމް "އަދަދު" އަށް ވިދާޅުވީ، ރޭ ފުވައްމުލަކުން ފުރަން އޮތް ފްލައިޓަކަށް ކައުންޓަރު ބަންދު ކުރި ފަހުން ކާގޯ ކުރަން ދިޔަ މީހެއް އޭނާ ގެންދިޔަ ތަކެތި ފްލައިޓަށް އަރުވައި ނުދިނުމުން ފްލައިޓް ހައިޖެކް ކުރާނެ ކަމުގެ އިންޒާރު ދިން ކަމަށެވެ.

"އޭވިއޭޝަން ކޮމާންޑްގެ ކުދިން ވެސް ތިއްބާ އޭނާ އެހެން ބުނީ. އޭގެ ސަބަބުން ސިފައިން ބަލަން ޖެހޭ ކަންކަން ބެލުމަށް ފަހު ފްލައިޓަށް ފުރުނީ ދެ ގަޑިއިރު ފަހުން،" މޫސަ ވިދާޅުވި އެވެ.

އޭވިއޭޝަން ގަވައިދުތައް ބުނާ ގޮތުން ފްލައިޓެއް ހައިޖެކް ކުރާނެ ނުވަތަ ގެއްލުމެއް ދޭނެ ކަމުގެ އިންޒާރު ދީފި ނަމަ އެ ފްލައިޓަކަށް ފުރޭނީ ރަނގަޅަށް ސެކިއުރިޓީގެ ކަންކަން ބެލުމަށް ފަހުގަ އެވެ.

އެ އިންޒާރާ ގުޅިގެން އެ މީހާ ރޭ ވަނީ ފުވައްމުލަކު ފުލުހުންގެ އިދާރާއަށް ހާޒިރުކޮށް ހަތަރު ގަޑިއިރު ބޭންދުމަށް ފަހު ދޫކޮށްލައިފަ އެވެ.

އެ މައްސަލައާ ގުޅޭގޮތުން ފުލުހުންގެ މީޑިއާ އޮފިޝަލް ވިދާޅުވީ އެ މައްސަލައާ ގުޅިގެން މިހާތަނަށް މީހަކު ހައްޔަރު ނުކުރި ނަމަވެސް މައްސަލަ ތަހުގީގު ކުރަމުން އަންނަ ކަމަށެވެ.