އދ.، އެމެރިކާ (އޯގަސްޓު 16) - "އަފްގާނިސްތާނުގައި އޮތް ޓެރަރިސްޓް ނުރައްކަލާ" ދެކޮޅަށް ދުނިޔެ އެކުގައި ތެދުވުމަށް އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ގޮވާލައްވައިފި އެވެ.

ގުޓެރޭޒް އެގޮތަށް ވިދާޅުވިއިރު، 20 އަހަރަށް ފަހު އާދީއްތަ ދުވަހު ތާލިބާނުން ވަނީ އަލުން އަފްގާނިސްތާނުގެ ވެރިކަމަށް އައިސްފަ އެވެ.

"އަފްގާނިސްތާނަކީ ޓެރަރިސްޓް ޖަމާއަތްތަކުން ބޭނުން ކުރަން އޮތް ޕްލެޓްފޯމަކަށް އަލުން ވިޔަ ނުދިނުމަށް ބައިނަލްއަގްވާމީ މުޖުތަމައިން އެކުގައި މަސައްކަތް ކުރަން ޖެހޭނެ،" އަފްގާނިސްތާނާ ގުޅޭ ގޮތުން ބޭއްވި އދ. ގެ ސަލާމަތީ މަޖިލީހުގެ ކުއްލި ޖަލްސާއެއްގައި ގުޓެރޭޒް ވިދާޅުވި އެވެ.

ނިއު ޔޯކުގައި ހުންނަ އދ. ގެ މައި އިދާރާގައި ކުއްލި ޖަލްސާއެއް ބޭއްވީ އާދީއްތަ ދުވަހު ތާލިބާނުން ކާބުލް އަށް ވަންނަން ތައްޔާރުވުމާއެކު އެ ގައުމުގެ ރައީސް އަޝްރަފް ގަނީ ގައުމު ދޫކޮށް ވަޑައިގެންނެވުމުންނެވެ.

"ސަލާމަތީ މަޖިލީހާއި މުޅި ބައިނަލްއަގްވާމީ މުޖުތަމައަށް އަޅުގަނޑު ގޮވާލަނީ އެކުގައި ތެދުވެ، އެކުގައި މަސައްކަތްކޮށް، އެކުގައި ފިޔަވަޅު އެޅުމަށް،" ގުޓެރޭޒް ވިދާޅުވި އެވެ.

އޭގެ އިތުރުން "އަފްގާނިސްތާނުގައި އޮތް ޓެރަރިސްޓް ނުރައްކާ ހިފެހެއްޓުމަށާއި އަސާސީ އިންސާނީ ހައްގުތަކަށް އިހްތިރާމް ކުރާނެކަން ޔަގީން ކުރުމަށް ގައުމުތަކަށް ލިބިފައިވާ ހުރިހާ ވަސީލަތެއް ބޭނުން ކުރުމަށް" އޭނާ ގޮވާލެއްވި އެވެ.

ވިހި އަހަރުވީ އަފްގާނިސްތާނުގެ ހަނގުރާމަ ނިންމާލާފައި ވަނީ އަލުން ތާލިބާނުންގެ ވެރިކަން ގާއިމްކޮށް، ކާބުލްގެ މަގުތަކުގައި ފޯރިމަރަން ހަނގުރާމަވެރިން ނިތުމާ އެކު އެވެ.

އަފްގާނިސްތާނުގެ ވެރިކަމަށް ތާލިބާނުން އައުމުން ހޯމަ ދުވަހު ވެރިރަށް ކާބުލްގެ އެއާޕޯޓުން ފެނުނީ ހިތްދަތި މަންޒަރެކެވެ. އެތައް ހާސް އަފްގާން ރައްޔިތުން އެއާޕޯޓަށް ޖަމާވެ، އެމެޖެންސީގައި ފުރަމުން ދިޔަ ފްލައިޓުތަކުގައި ގައުމުން ދެވޭތޯ މަސައްކަތް ކުރި އެވެ.

ގުޓެރޭޒް ވިދާޅުވީ އަފްގާން ރައްޔިތުންނަށް "ފުރިހަމަ އެއްބާރުލުން ދޭން ހައްގު" ކަމަށެވެ.

"ކުރިއަށް އޮތީ މުހިއްމު ދުވަސްތަކެއް. ދުނިޔެ މި އޮތީ ބަލަން. އަފްގާނިސްތާނުގެ ރައްޔިތުން އެކަހެރިކޮށްލެވިގެން ނުވާނެ".

އަފްގާނިސްތާނުގައި "އިންސާނީ ހައްގުތައް ނެގެހެއްޓުމަށްޓަކައި އެއް އަޑަކުން ވާހަކަ ދެއްކުމަށް" ގުޓެރޭޒް ގައުމުތަކަށް ގޮވާލެއްވި އެވެ.

"ބުރަ މަސައްކަތުން ހޯދި އަފްގާން އަންހެނުންނާއި އަންހެން ކުދިންގެ ހައްގުތައް ރައްކާތެރި ކުރުން ވަރަށް މުހިއްމު" ކަމަށް އޭނާ ވިދާޅުވި އެވެ.

އޭގެ އިތުރުން ގުޓެރޭޒް ވަނީ "ބައިނަލްއަގްވާމީ އިންސާނީ ގާނޫނުތަކަށް އިހްތިރާމުކޮށް ރައްކާތެރިކޮށް ހިތުމަށާއި ވަކިވަކި ފަރުދުންގެ މިނިވަންކަމަށް އިހުތިރާމް ކުރުމަށް" ތާލިބާނުންނަށް ގޮވާލައްވާފަ އެވެ.