ބްރުސެލްސް (ޖުލައި 8) - މި ފަހަރުގެ ޔޫރޯ ފުޓްބޯޅަ މުބާރާތުގައި ބެލްޖިއަމްގެ އެސިސްޓަންޓް ކޯޗުކަމާ އަލުން ހަވާލުވި ފްރާންސްގެ ކުރީގެ މަޝްހޫރު ފޯވާޑް ތިއަރީ އޮންރީ އަށް މި ފަހަރުގެ މުބާރާތުގައި ލިބުނު މުސާރަ އެއްކޮށް ޗެރިޓީ އަށް ހަދިޔާކޮށްފި އެވެ.

އޮންރީ ވަނީ 2016 އިން 2018 އަށް ބެލްޖިއަމް އެސިސްޓަންޓް ކޯޗަކަށް ހުރިއިރު، ވެސް އެކި ފަހަރު މަތިން މުސާރައިގެ ބޮޑު ޕަސެންޓެއް ބެލްޖިއަމްގެ އެކި ޗެރިޓީ ޖަމިއްޔާތަކަށް ހަދިޔާކޮށްފަ އެވެ. އޮންރީ އޭރު ބެލްޖިއަމްގެ އެސިސްޓަންޓް ކޯޗަކަށް ހުރީ އަހަރަކު 1.5 މިލިއަން ޑޮލަރު ލިބޭ ކޮންޓްރެކްޓެއްގަ އެވެ. މި ފަހަރުގެ ޔޫރޯއާ ދިމާކޮށް އޮންރީ ގެނައީ ކިހާ މުއްދަތެއްގެ ކޮންޓްރެކްޓެއްގައި ކަމެއް މީޑިއާ އަށް ހާމަކޮށްފަ އެއް ނުވެ އެވެ.

ފްރާންސް އާއި ބެލްޖިއަމްގެ ނޫސްތަކުން ރިޕޯޓްކުރާގޮތުގައި އޮންރީ ވަނީ މި ފަހަރުގެ ޔޫރޯގައި އޭނާ އަށް ލިބޭ މުސާރަ އެއްކޮށް ޗެރިޓީއަށް ދީފަ އެވެ. ބެލްޖިއަމްގެ ނޫސްތަކުން ރިޕޯޓްކުރާގޮތުގައި ޔޫރޯގައި ބެލްޖިއަމްގެ ހުރިހާ މެޗުތަކެއްގެ މުސާރަ އާއި ބޯނަހާ އެކު އޮންރީ އަށް ގާތްގަނޑަކަށް 250،000 ޑޮލަރު ލިބޭނެ އެވެ.

ޔޫރޯ ފުޓްބޯޅަ މުބާރާތުގައި ބީބީސީގެ އެނަލިސްޓެއްގެ ގޮތުގައި މަސައްކަތްކުރަން ނިންމައިގެން ހުރި އޮންރީ ބެލްޖިއަމްގެ ކޯޗިން ޓީމާ އަލުން ގުޅުނީ އެ ޓީމުގެ ކޯޗު ރޮބާޓޯ މާޓީނޭޒްގެ އެދުމަށެވެ. ބެލްޖިއަމް ޔޫރޯ އިން ކެޓީ ކުއާޓާގައި އިޓަލީ އަތުންނެވެ.

ބެލްޖިއަމުން 2018 ވަނަ އަހަރު ރަޝިއާގައި ބޭއްވި ފީފާ ވޯލްޑް ކަޕްގެ ތިން ވަނަ ހޯދި ޓީމުގައި އޮންރީ ވަނީ މުހިއްމު މަސައްކަތްތަކެއް ކޮށްފަ އެވެ. އެ މުބާރާތަށް ފަހު ބެލްޖިއަމް ޓީމު ދޫކޮށް އޮންރީ ވަނީ ދެ ކްލަބަކަށް ކޯޗުކޮށްދީފަ އެވެ. އެއީ ފްރާންސްގެ މޮނާކޯ އާއި އެމެރިކާ ލީގުގައި ކުޅޭ މޮންޓްރެއާލް އިމްޕެކްޓަށެވެ. މޮންޓްރެއާލުން އޮންރީ ވަކިވީ މިދިޔަ ފެބްރުއަރީ މަހު އެވެ.