ރާއްޖޭގައި ކޮވިޑް ވެކްސިނޭޝަން ޕްރޮގްރާމް ރަނގަޅަށް ހިންގުމަށް އެކަށީގެންވާ އަދަދެއްގެ ވެކްސިން އަންނަ މަހުގެ ތެރޭގައި ލިބޭނެ ކަމަށް ހެލްތު މިނިސްޓަރު އަހްމަދު ނަސީމް މިއަދު ވިދާޅުވެއްޖެ އެވެ.

މިދިޔަ ފެބުރުއަރީ މަހުގެ ތެރޭގައި ވެކްސިން ޖަހަން ފަށައި ގިނަ ބަޔަަކަށް ދިނީ ކޮވިޝީލްޑެވެ. ވަކި ހިސާބަކުން ވެކްސިން ލިބުމުގެ ދަތިކަން ކުރިމަތިވެ، އާއްމުކޮށް ވެކްސިން ޖެހުން މިހާރު އޮތީ މެދުކެނޑިފަ އެވެ. ފުރަތަމަ ޑޯޒު ޖެހި ގިނަ ބަޔަކު ދެ ވަނަ ޑޯޒު ނުޖެހި ތިބިއިރު އެކަމަށް އޮތް ހުރަހަކީ ރާއްޖެ އިން ގަތް ވެކްސިން ވެސް ނުލިބުމެވެ.

ސިންގަޕޫރުގެ އެސްޓްރާޒެނިކާ އިން ގަތް 700،000 ޑޯޒު ލިބޭނެ ކަމަށް އެކި ތާރީހްތައް ސަރުކާރުން ވަނީ އިއުލާންކޮށްފަ އެވެ. އެކަމަކު އެއިން އެއްވެސް ތާރީހެއްގައި ވެކްސިނެއް ނުލިބެ އެވެ.

ނޫސްވެރިންގެ ބައްދަލުވުމުގައި ނަސީމް ވާހަކަ ދައްކަވަނީ: ވެކްސިން ލިބޭނެ ކަމުގެ އާ ތާރީހެއް މިއަދު ވަނީ އިއުލާންކުރައްވާފައި. -- ފޮޓޯ/ ރައީސް އޮފީސް

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ނަސީމް ވިދާޅުވީ މި މަހުގެ ތެރޭގައި އެކަށީގެންވާ އަދަދަކަށް ކޮވިޑު ވެކްސިން ލިބޭނެ ކަމުގެ އުއްމީދު އެބައޮތް ކަމަށެވެ.

"އަޅުގަނޑުމެންނަށް ލިބިފައިވާ ހުރިހާ މައުލޫމާތެއް ދައްކަނީ ޖުލައި މަހުގެ 12-20 ވަނަ ދުވަހާ ދެމެދު އަޅުގަނޑުމެންނަށް އެކަށީގެންވާ އަދަދެއްގެ ވެކްސިން ލިބޭނެ ކަަމަށް،" ނަސީމް ވިދާޅުވި އެވެ.

މިނިސްޓަރު ވިދާޅުވި ގޮތުގައި އެމެރިކާ އިން ވެސް ރާއްޖެ އަށް ވެކްސިން ލިބޭނެ އެވެ. އެކަމަކު ކޮން ދުވަހެއް ކަމެއް އަދި ސާފެއް ނުވެ އެވެ.

ރަޝިއާ އިން ސްޕަޓްނިކް ވެކްސިން ހޯދަން ވެސް މަސައްކަތް ކުރަމުން އަންނަ ކަމަށާއި އެއްބަސްވުމެއްގައި ސޮއިކޮށްފައިވާ ކަމުގެ ޔަގީންކަން ވެސް ދެއްވި އެވެ.

މިނިސްޓަރު ވިދާޅުވި ގޮތުގައި މިހާރު ކުރިއަށް ދަނީ އެއްބަސްވުމުގައި ހުރި ކުދިކުދި ކަންތައްތަކާ ގުޅޭ ގޮތުން މަޝްވަރާ ކުރުމެވެ. އެހެންކަމުން ލަސްނުވެ ވެކްސިން ގަތުމުގެ އެއްބަސްވުމުގައި ސޮއިކުރެވޭނެ ކަމަށް ވިދާޅުވި އެވެ.

ރާއްޖޭގެ ވެކްސިން ޕްރޮގްރާމް ފެށީ އިންޑިއާ އިން ހަދިޔާކުރީ 200،000 ޑޯޒުންނެވެ. ޗައިނާ އިން ވެސް 200،000 ޑޯޒާއި ހެޔޮއެދޭ އެހެން ފަރާތްތަކުން ވެސް ވެކްސިން ލިބުނެވެ. އޭގެ އިތުރަށް ރާއްޖެ އިން ވަނީ ޖުމްލަ 1،000،000 ޑޯޒަށް ފައިސާ ދައްކައިފަ އެވެ. އެއީ ސިންގަޕޫރުގެ އެސްޓްރާ ޒެނިކާ އަށް 700،000 ޑޯޒާއި އިންޑިއާގެ ސިރަމް އިންސްޓިޓިއުޓަށް 300،000 ޑޯޒަށެވެ.

މީގެ ތެރެއިން ރާއްޖެއަށް ލިބުނީ އިންޑިއާއަށް ފައިސާ ދެއްކި ވެކްސިންގެ ތެރެއިން 100،000 ޑޯޒެވެ. ބާކީ 200،000 އިންޑިއާ އިން ވެސް ލިބޭނެ ދުވަހެއް ނޭނގެ އެވެ.

ސަރުކާރުން އުއްމީދުކުރި ގޮތަށް ވެކްސިން ލިބުމުގައި ތާށިވީ، އިންޑިއާއަށް ކޮވިޑްގެ ދެވަނަ ރާޅެއް އަރައި ހާލަތު ވަރަށް ބޮޑަށް ގޯސްވުމާއެކު އެހެން ގައުމުތަކަށް އިންޑިއާއިން ވެކްސިން ފޯރުކޮށްދިނުމަށް ނުކުޅެދުމުންނެވެ.

ދުނިޔޭގެ އެހެން ގައުމުތަކާ އަޅާބަލާއިރު ރާއްޖޭގެ އާބާދީގެ ބޮޑު ޕަސެންޓަކަށް ފުރަތަމަ ޑޯޒު ދީފައިވާ ކަން ފާހަގަކޮށް ސަރުކާރުން ބުނެފައި ވަނީ އަންނަ އޮގަސްޓް މަހުގެ ނިޔަލަށް ގިނަ ބަޔަކަށް ވެކްސިންގެ ދެ ވަނަ ޑޯޒު ޖަހައި ނިމޭނެ ކަމަށެވެ.