ސަލަފު ޖަމިއްޔާގެ ދުއާތުންގެ މަޖިލިސް ބޭއްވުމަށް މާލެ ސަރަހައްދުގައި އުޅޭ ރައްޔިތުން ޕިކްނިކް ދިޔުމަށް ކަނޑައަޅާފައިވާ ކުޑަގިރި ދޫކުރީ އެ ރަށަށް ދިޔުމަށް މީހުން ހަދާފައި ހުރި ބުކިން ކެންސަލްކޮށްފައިކަން އެނގިއްޖެ އެވެ.
މިއަދަކީ ސްކޫލް ބަންދު ފެށުނު ދުވަސް ކަމަށްވާއިރު އާދީއްތަ ދުވަހަކީ ސަރުކާރު ބަންދު ދުވަހެކެވެ. އެހެންވެ ގިނަ ބަޔަކު މި ބަންދުގެ ތެރޭގައި ކުޑަގިރިއަށް ދިޔުމަށް ބުކިން ހައްދާފައި ހުރިކަން މި ނޫހަށް ވަނީ އެނގިފަ އެވެ.
އެހެން ނަމަވެސް، އެ ބުކިންތައް ކެންސަލް ކުރުމަށްފަހު މުޅި ކުޑަގިރި ވަނީ ސަލަފު ޖަމިއްޔާއަށް ދޫކޮށްފަ އެވެ. ކުޑަގިރި ހިންގަނީ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިންނެވެ.
ދުއާތުންގެ މަޖިލިސް އިފްތިތާހުކުރީ އިއްޔެ ކަމަށްވާއިރު 13 ވަނަ ދުވަހުގެ ނިޔަލަށް އެ މަޖިލިސް ކުރިއަށްދާނެ އެވެ. މަޖިލިސް އިފްތިތާހުކޮށްދެއްވީ އިސްލާމިކް މިނިސްޓަރު މުހައްމަދު ޝަހީމް އެވެ.
ސަލަފުން ބުނެފައިވާ ގޮތުގައި އެއީ އެ ޖަމިއްޔާގައި މަސައްކަތްކުރާ 50 އަށްވުރެ ގިނަ އިލްމުވެރިން ބައިވެރިވާނެ މަޖިލީހެކެވެ.
