ނައިޖީރިއާގެ މިސްކިތަކަށް ހުކުރު ނަމާދު ވަގުތު ހަތިޔާރު އެޅި ބަޔަކު ވަދެ، އެތައް ބަޔަކު ރަހީނުކޮށްފި އެވެ.
ނުރައްކާތެރި ގޭންގުތަކުގެ ބިރުވެރިކަން ބޮޑުވެފައިވާ އުތުރު ނައިޖާ ސްޓޭޓުގައި މީހުން ރަހީނުކުރުމަކީ އާންމު ކަމެކެވެ.
ފުލުހުންގެ ތަރުޖަމާނު ވަސިއު އަބިއޮދުން ވިދާޅުވީ، ހުކުރު ދުވަހުގެ މެންދުރު ގިދާން-ޒާނާ އަދި ކްޕެންޔާ އަވަށަށް ހަމަލާދިނުމަށްފަހު، ބޯގޫ ލޯކަލް ގަވަމަންޓް ސަރަހައްދުގެ ދެކާރާ ޑިސްޓްރިކްޓްގައި ހުންނަ ކްޕެންޔާ މިސްކިތަށް ވަދެގަތް ކަމަށެވެ.
އަބިއޮދުން ނެރުއްވި ބަޔާނެއްގައި ވިދާޅުވީ، މިހާތަނަށް ލިބިފައިވާ ރިޕޯޓްތަކަށް ބަލާއިރު އެއްވެސް މީހެއްގެ ފުރާނަ ގެއްލިފައި ނުވާ ކަމަށާއި، ހާލަތު ދެނެގަތުމަށާއި ރަހީނުކުރި މީހުން ސަލާމަތްކުރުމުގެ މަސައްކަތަށް ސަލާމަތީ ބާރުތަކުގެ ގުޅިފައިވާ ލަޝްކަރެއް އެ ސަރަހައްދަށް ފޮނުވާފައިވާ ކަމަށެވެ.
ފުލުހުން ބުނި ގޮތުގައި، މި ހާދިސާގައި ރަހީނުކުރި މީހުންގެ ސީދާ އަދަދު އަދި ކަށަވަރު ކުރެވިފައެއް ނުވެ އެވެ.
އެ ސަރަހައްދުގެ ރައްޔިތުން ރޮއިޓާސްއަށް މައުލޫމާތު ދިން ގޮތުގައި، މި ހަމަލާތަކުގައި 60 އަށް ވުރެ ގިނަ މީހުން ވަނީ ރަހީނުކޮށްފަ އެވެ.
ނައިޖީރިއާގެ ހުޅަނގު އުތުރާއި މެދުތެރޭގެ ސަރަހައްދުތަކުގައި ފައިސާ ހޯދުމުގެ ބޭނުމުގައި މީހުން ރަހީނުކުރުމަކީ އާންމު ކަމަކަށް ވެފައިވާއިރު، އެ ގައުމުގައި "ބެންޑިޓްސް" ގެ ނަމުން މަޝްހޫރުވެފައިވާ ހަތިޔާރު އެޅި ގޭންގުތަކުން ދަނީ އަވަށްތަކަށާއި، ސުކޫލުތަކުގެ އިތުރުން ހައިވޭތަކަށް ހަމަލާދީ މީހުން ރަހީނުކުރަމުންނެވެ.
