ކުޑަކުދިންތަކެއްގެ އޮރިޔާން ކާޑާއެކު ހައްޔަރު ކުރި މީހެއްގެ މައްޗަށް ދައުލަތުން އުފުލި ދައުވާތަކެއް އަނބުރާ ގެންގޮސްފި އެވެ.
އާދަމް އަދްލާން ލަތީފް، 22، ގެ މައްޗަށް ކޮށްފައިވާ ދައުވާތައް އަނބުރާ ގެންދިޔައީ ޕްރޮސެކިއުޓާ ޖެނެރަލް އައްބާސް ޝަރީފެވެ. ދައުވާތައް އަނބުރާ ގެންދިޔަ ސަބަބެއް އަދި ނޭނގެ އެވެ.
އަދްލާނުގެ މައްޗަށް ދެ ދައުވާއެއް އުފުލި އެވެ. އެއީ ކުޑަކުދިންގެ އޮރިޔާން އުފެއްދުމާއި ކުޑަކުދިންގެ އޮރިޔާން ކޮމްޕިއުޓަރު ސްޓޯރޭޖެއްގައި ބެހެއްޓުމުގެ ކުށުގެ ދައުވާ އެވެ.
މީގެ ކުރިން ވެސް އޭނާ ދޫކޮށްލަން ޕީޖީ އައްބާސް ވަނީ މަސައްކަތް ކުރައްވައިފަ އެވެ. އޭނާގެ އަތުން އޮރިޔާން ކާޑު ފެނުނު ތުހުމަތު އޮއްވައި އައްބާސް ފުރަތަމަ މަސައްކަތް ކުރެއްވީ އޭނާއަށް ދައުވާ ނުކުރާށެވެ.
އަދްލާނުގެ މައްޗަށް އައްބާސް ދައުވާ އުފުލީ، ދައުވާ ނުކުރަން ނިންމި ނިންމުން ރިވިއުކޮށްދިނުމަށް ފުލުހުންގެ ފަރާތުން ވަރަށް ބޮޑަށް އެދުމުންނެވެ. އޭނާގެ އަތުން ވަރަށް ގިނަ އަދަދެއްގެ އޮރިޔާން ކާޑު ފެނުނު ކަމަށް ތުހުމަތުކޮށްފައިވެ އެވެ.
"މި މައްސަލައިގެ ތަހުގީގަށް އޭނާގެ އަތުން ހިފެހެއްޓި އިލެކްޓްރޯނިކް ވަސީލަތްތަކުގެ ފޮރެންސިކް ތަހުލީލުތައް ހެދިއިރު، ކުޑަކުދިންގެ ބަރަހަނާ މަންޒަރުތައް ހިމެނޭ ގިނަ އަދަދެއްގެ ފޮޓޯ އާއި ވީޑިއޯ އެ ތަކެތިން ވަނީ ފެނިފަ. މީގެ ތެރޭގައި ކުޑަކުދިންނަށް ޖިންސީ ގޯނާކުރާ މަންޒަރުތައް ދައްކުވައިދޭ ވީޑިއޯތައް ވެސް ހިމެނޭ،" އެ މައްސަލައިގައި ފުލުހުން މީގެ ކުރިން ބުނެފައިވެ އެވެ.
ފުލުހުން ބުނީ އޭނާއަކީ ކުޑަކުދިންގެ އޮރިޔާން ފޮޓޯ ވިއްކާ ނެޓްވޯކެއްގެ މީހެއް ކަމަށެވެ. އޭނާ ފޮޓޯ ވިއްކަމުންދިޔައީ ކްރިޕްޓޯ ކަރެންސީ ބޭނުންކޮށްގެން ކަމަށް ވެސް ފުލުހުން ބުނެ އެވެ. ހައްޔަރު ކުރުމުގެ ކުރިން އޭނާ ވަޒީފާ އަދާ ކުރީ މޯލްޑިވިއަންގަ އެވެ. ނަމަވެސް އެ މައްސަލަ ފެންމަތިވުމުން އޭނާ ވަނީ ވަޒީފާއިން ވަކިކޮށްފަ އެވެ.
އޭގެ އިތުރުން، ލައިގެން ހުރި ޖަނގިޔަލުގެ ތެރެއިން މަސްތުވާތަކެތި ފެނުނު މީހަކަށް ދައުވާ ކުރުމަށްފަހު ވެސް ސަރުކާރުން ވަނީ އޭނާ ސަލާމަތްކޮށްފަ އެވެ. ސަލާމަތްކޮށްދިން މީހާއަކީ ވެރިކަން ކުރާ ޕީއެންސީގެ މެންބަރެކެވެ.
