ސަރުކާރު ކުންފުނިތަކުން މުވައްޒަފުން މަދުކުރުމަށް ކުރަމުން އަންނަ މަސައްކަތްތަކުގެ ތެރެއިން ވަކި ސިޔާސީ ފިކުރަކަށް ބަލައި މުވައްޒަފުން ވަކިކުރަން އަންގާފައި ނުވާނެ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.
ޖުލައި 13، ގައި ޕްރައިވަޓައިޒޭޝަން ބޯޑުން ވަނީ ތިން މަސްދުވަހުގެ ތެރޭގައި އެސްއޯއީތަކުން 33 ޕަސެންޓު މުވައްޒަފުން ވަކިކުރަން އަންގާފަ އެވެ. އެ އެންގުމާ އެއްގޮތަށް އެތައް މުވައްޒަފުންނެއް މިހާރު އަންނަނީ ވަކިކުރަމުންނެވެ.
އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބުނާ ގޮތުގައި ވަކިކުރަމުން ދަނީ ސަރުކާރަށް ތާއީދުނުކުރާ މުވައްޒަފުންނެވެ. މިއަދުގެ މަޖިލިސް ޖަލްސާގައި އެ ސުވާލު ފިނޭންސް މިނިސްޓަރާ ކުރެއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ.
"މުވައްޒަފަކު ނިސްބަތްވާ ސިޔާސީ ޕާޓީއަށް، ނުވަތަ ގެންގުޅޭ ސިޔާސީ ފިކުރަށް، ނުވަތަ ފާޅުކުރާ ހިޔާލަކަށް ބަލައި ވަޒީފާއިން ވަކިކުރުމަކީ މި ސަރުކާރުން ގަބޫލުކުރާ އުސޫލެއް ނޫން. މިގޮތަށް އަމަލުކުރުމަށް ސަރުކާރު ހިއްސާވާ އެއްވެސް ކުންފުންޏަކަށް މިފަދަ އެއްވެސް އެންގުމެއް މިނިސްޓްރީގެ ފަރާތުން އަންގާފައި ނުވާނެ،" އެ ސުވާލުގެ ޖަވާބުގައި ޒަރީރު ވިދާޅުވި އެވެ.
އެ ކުންފުންޏަކަށް ލިބޭ އާމްދަނީގެ ތެރެއިން ހަރަދުތައް ކަވަރު ކުރެވޭނެ ކުންފުނިތަކަށް ހެދުމުގެ ގޮތުން ފިޔަވަޅުތަކެއް އެޅުމަށް އަންގާފައިވާނެ ކަމަށް ޒަރީރު ވިދާޅުވި އެވެ. ދައުލަތާއި ދައުލަތުގެ ކުންފުނިތައް އެއްކޮށްލުމުން ޕަބްލިކް ސެކްޓަރުގައި އުޅޭ މީހުންގެ އަދަދު ވަޒީފާ އަދާކުރާ އާބާދީގެ 50 ޕަސެންޓަށްވުރެ އިތުރު ކަމަށް ޒަރީރު ވިދާޅުވި އެވެ.
މި އަހަރު ބޭއްވި ކައުންސިލް އިންތިހާބާއި ރެފަރެންޑަމާ ދިމާކޮށް އެތައް ސަތޭކަ ބަޔަކަށް މި ސަރުކާރުން ވަޒީފާ ބެހި އެވެ. އޭގެ ތެރެއިން ގިނަ މީހުންނަށް ލިބުނީ ހަމައެކަނި ލިޔުމެކެވެ. އެ ދެ އިންތިހާބުން ވެސް ސަރުކާރު ވީ ބައްޔެވެ.
އެޕްރީލް މަހު ސަރުކާރުން ހާމަކޮށްފައިވާ ގޮތުގައި ކުންފުނިތަކުގައި 42،000 އަށް ވުރެ ގިނަ މުވައްޒަފުން ދިޔައީ މަސައްކަތް ކުރަމުންނެވެ. އޭގެ ތެރެއިން 33 ޕަސެންޓު މުވައްޒަފުން ވަކިކުރުމުން 13،800 އަށްވުރެ ގިނަ މުވައްޒަފުން މަގުމަތިވާނެ އެވެ.
