ބެލްޖިއަމްގެ އިރުމަތީ ފްލެންޑާސްގައި ހުރި ގެއެއްގެ ބިންގަރާހުގެ ފާރުތަކުގެ ތެރޭގައި ފޮރުވާފައި ހުރި ގިނަ އަދަދެއްގެ ގަނޑުނަރާއި ފައިސާ ފޮތިތަކެއް ފެނިއްޖެ އެވެ.
ފާރުގެ ތެރެއިން 40 އަށް ވުރެ ގިނަ ގޯލްޑް ބާ ނަގާފައި ވާއިރު، މި ތަކެތީގެ އަގު ގާތްގަނޑަކަށް ނުވަ މިލިއަން ޔޫރޯ އަށް އަރާނެ ކަމަށް ރިޕޯޓުތައް ބުނެއެވެ.
މި ރަންތައް ފެނިފައި ވަނީ އެ ގޭގެ ނަރުދަމާ ހޮޅިތައް އެޅުމަށްޓަކައި ބިންގަރާހުގެ ފާރުތައް ތޮރުފަމުން ދަނިކޮށެވެ.
މި ރަންތައް ފެނުނު އިމާރާތަކީ މިހާރު އެ ސަރަހައްދުގެ ހިލޭ ސާބަހަށް މަސައްކަތްކުރާ ޖަމިއްޔާއެއް ކަމަށްވާ ސީ.އޭ.ޑަބްލިއު އޫސްޓް ފްލާންޑަރެންގެ މިލްކެކެވެ. އެ ޖަމިއްޔާގެ ޑައިރެކްޓަރު ވިދާޅުވި ގޮތުގައި މި ހޯދުމުގެ ސަބަބުން އެމީހުން ތިބީ ވަރަށް ބޮޑަށް ހައިރާންވެފަ އެވެ. އަދި މި ފެނުނު ރަންތަކުގެ ސަބަބުން އެ ޖަމިއްޔާއިން ކުރަމުންދާ އިޖުތިމާއީ މަސައްކަތްތަކަށް ބޮޑު ކުރިއެރުމެއް ލިބިގެންދާނެ ކަމަށް އުންމީދުކުރާ ކަމަށް އޭނާ ވިދާޅުވިއެވެ.
ބެލްޖިއަމްގެ ގާނޫނު ބުނާގޮތުން މިފަދަ ތަކެތީގެ އަސްލު ވެރިފަރާތަށް އެ ތަކެތި ހޯދުމަށް ފަސް އަހަރުގެ މުއްދަތެއް ލިބިގެންވެ އެވެ. ނަމަވެސް މިހާތަނަށް އެއީ ކާކުގެ އެއްޗެއްކަން ދެނެގަނެވިފައެއް ނުވެއެވެ.
ކުރިއަށް އޮތް ފަސް އަހަރު ދުވަހުގެ ތެރޭގައި އެއްވެސް ފަރާތަކުން އެއީ އެމީހުންގެ އެއްޗެއްކަން ސާބިތުކޮށްނުދެވިއްޖެނަމަ، މަދަނީ ގާނޫނުގެ ދަށުން އެ ރަންތައް ބަހާލެވޭނީ އެ ތަކެތި ފެނުނު މީހުންނާއި އެ އިމާރާތުގެ ވެރިފަރާތާ ދެމެދުގަ އެވެ.
މި ރަންތަކަކީ އެއްވެސް ކުށުގެ އަމަލަކާ ގުޅުންހުރި ތަކެތި ނޫންކަން ކަށަވަރުކުރުމަށް ފުލުހުން ދަނީ ތަހުގީގު ކުރަމުންނެވެ.
ފުލުހުން ބުނި ގޮތުގައި ފެނުނު ހުރިހާ ރަނެއް މިހާރު ވަނީ ރައްކާތެރި ތަނަކަށް ބަދަލުކުރެވިފަ އެވެ. އަދި އިތުރު ރަން ހޯދުމުގެ ބޭނުމުގައި އެ ސަރަހައްދަށް އާންމުން ނުދިއުމަށް ފުލުހުން ވަނީ އިލްތިމާސްކޮށްފަ އެވެ.
