އެސްޓީއޯ މެޑިކަލްސް އިން ދެމުންދިޔަ ބޭހުގެ ހިދުމަތްތައް ސްޓޭޓް ފާމާ ހަދައިގެން އޭގެ ދަށަށް ބަދަލުކުރިޔަސް ބޭސް ލިބުމުގައި ހުރި ދަތިތައް މި ދައުރުގެ ތެރޭގައި ހައްލު ނުވާނެ ކަމަށް އެސްޓީއޯގެ ކުރީގެ އެމްޑީ ހުސައިން އަމްރު ވިދާޅުވެއްޖެ އެވެ.
އަދަދު ނޫހުން ގެނެސްދޭ އެތެރެފުށް ޕްރޮގްރާމްގައި އަމްރު ވިދާޅުވީ ސްޓޭޓް ފާމާ އުފެއްދިޔަސް މި ދައުރުގެ ތެރޭގައި ބޭސް ލިބުމުގައި ހުރި ދަތިތައް ހައްލުވުމަށްވުރެ ބޮޑަށް އެހެން ދިމާލަކަށް މިސްރާބުދާތަން ފެންނަމުންދާ ކަމަށެވެ.
"ތިން މަހެއް ނޫން އަޅުގަނޑު މި ދަންނަވަނީ މި ދައުރުގައި ހައްލެއް ނުވާނެ މުއިއްޒުއަށް އެކަމެއް [ބޭހުގެ މައްސަލަ]. އެއީ މިދަނީ އަދި މުޅިން އެހެން ދިމާލަކަށް. ކުރިންވާ ފައިސާ ނުލިބިގެން ނެގެނެވިގެން އިމްޕޯޓް ނުކުރެވިގެން މި ބޭސް ނުލިބެނީ. މިހާރު އިންތިހާއަށް އަގުބޮޑުވާނެ ބޭސް ލިބޭވަރު،" އަމްރު ވިދާޅުވި އެވެ.
އަމްރު ވިދާޅުވީ ސަރުކާރުން މިހާރު އުޅެނީ ސްޓޭޓް ފާމާއިން ނުލިބޭ ބޭސްތައް ލިބޭނެ އެހެން ފާމަސީތައް ޓްރެކްކޮށްދޭން ކަމަށެވެ. ނަމަވެސް ސްޓޭޓް ފާމާ ފަދަ ފާމަސީއެއްގައި ހުރިހާ ބޭހެއްވެސް ހުންނަން ޖެހޭނެކަން އޭނާ ފާހަގަކުރެއްވި އެވެ.
"އަނެއްކާ މިހާރު އެ އުޅެނީ މާ މޮޅު އެއްޗެއް ހަދަން އެނގޭތޯ. މިހާރު އެއުޅެނީ މިސާލަކަށް ކަނޑައަޅަން މިވެނި މިވެނި ފާމަސީތަކުންނޭ މިވެނި ބޭހެއް ލިބޭނީ. މިވެނި ފާމަސީތަކުން މިވެނި ބޭހެއް ނުލިބޭނެއޭ. އެހެންވީމަ ބޭސް ސިޓީ ހިފައިގެން ފާމަސީއަށް ދިޔާމަ ބުނަނީ ސްޓޭޓް ފާމާއިން މިތަނަކުން ނޫނޭ ތި ބޭސް ދެނީކީ. އެހެން ތަނަކުންނޭ ލިބޭނީ،" އަމްރު ވިދާޅުވި އެވެ.
"އެހެންވީމަ އަނެއްހެން ދަންނަވާ ކަމަށްވަންޏާ އެތާ ބޭސް ނެތީކީ ނޫން. އެތަނުން ނުލިބޭ ބޭހަކީތާ. އެކަމަކު އެއީކީ އެކަން އޮންނަން ޖެހޭނެ ގޮތެއް ނޫންތާ. ސްޓޭޓް ފާމާ މިކިޔަނީ. އެހެންވެއްޖެއްޔާ ހުރިހާ ބޭހެއްވެސް ލިބެންޖެހޭނެ. ފާމަސީއެއްވެއްޖެއްޔާ. އަނެއްކާ ފާމަސީގެ ރެގިއުލޭޝަންގެ ދަށުން ހުންނަންޖެހޭނެ ބޭސްތައް."
މުހައްމަދު މުއިއްޒު ވެރިކަމަށް ވަޑައިގަތުމުގެ ކުރިން އެސްޓީއޯ މެދުވެރިކޮށް ރައްޔިތުންނަށް ބަރާބަރަށް ބޭސް ލިބެމުންދާކަން ފާހަގަކުރައްވާ އަމްރު ވިދާޅުވީ ބޭސް ލިބުމުގައި ދަތިތައް ދިމާވެގެން އުޅެނީ ފާމަސީތަކަށް އާސަންދައިން ދޭންޖެހޭ ފައިސާ ނުދީގެން ކަމަށެވެ. އޭނާ ވިދާޅުވީ ބޭސް ނުލިބެން ފެށީ އުސޫލުތަކަށް ސަރުކާރުން ގެންނަން ފެށި ބަދަލުތަކުން ކަމަށެވެ.
ސަރުކާރުން އުފެއްދި ބޭސް ކުންފުނި، ސްޓޭޓް ފާމާގެ ދަށަށް އެސްޓީއޯއިން ހިންގި ބޭސް ފިހާރަތައް ބަދަލުކޮށް ހިދުމަތްދޭން ފެށީ މިދިޔަ ޖުލައި 1، އިން ފެށިގެންނެވެ. ސްޓޭޓް ފާމާއިން ބުނީ އެ ކުންފުނީގެ އަމާޒަކީ ބޭހުގެ ހިދުމަތް ފަސޭހަކަމާއެކު މުޅި ރާއްޖެއިން ލިބޭނެ މަގު ތަނަވަސްކޮށްދިނުން ކަމަށެވެ.
ނަމަވެސް ސްޓޭޓް ފާމާ ހެދިތާ މަހަކަށްވުރެ ގިނަ ދުވަސްވެފައިވާއިރު އެތަނުން އަދިވެސް ގިނަ އަދަދެއްގެ ބޭސް ނުލިބެ އެވެ. އޭގެއިތުރުން ރާއްޖޭގެ އެކި ފާމަސީތަކުން ނުލިބޭ ބޭސްތަކުގެ އަދަދު ވަރަށް ގިނަކަން ފާހަގަކުރެވެ އެވެ.
