ކުނި މެނޭޖް ކުރަން ސަރުކާރުން ގެންގުޅޭ މާސްޓާ ޕްލޭނަކީ، ކުނި މެނޭޖް ކުރާ ހަތް ސެންޓަރެއް މުޅި ރާއްޖޭގައި ގާއިމްކޮށް، ގިނައިން ރިސައިކަލް ކުރުން ކަމަށް ތިމާވެއްޓާ ބެހޭ މިނިސްޓްރީ އިން ބުނެފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ތިމާވެއްޓާ ބެހޭ މިނިސްޓްރީގެ ވޭސްޓް މެނޭޖްމަންޓު ބައިގެ ޑިރެކްޓަރު އަހުމަދު މުރުތަޒާ ވިދާޅުވީ ސަރުކާރުގެ ޕްލޭނަކީ، ކުނި މެނޭޖް ކުރާ މައިގަނޑު ތިން ސެންޓަރާއި އެތަންތަނާ ކަނެކްޓު ކުރާ ހަތަރު ސެންޓަރެއް ގާއިމް ކުރުން ކަމަށެވެ.
"މާސްޓާ ޕްލޭނަކީ މުޅި ރާއްޖޭގައި [ކުނި މެނޭޖް ކުރާ] ސަރަހައްދީ މަރުކަޒުތަކެއް ގާއިމް ކުރުން. އެގޮތުން ބަލާއިރު މޭޖާ ތިން ފެސިލިޓީއަކާއި އެއާ ގުޅިގައި ހުރި އިތުރު ހަތަރު ފެސިލިޓީއެއް [ގާއިމް ކުރަނީ]،" މުރުތަޒާ ވިދާޅުވި އެވެ. "މި ހުރިހާ ތަންތަނެއް ނިމިގެން ދިޔައީމަ ވަށާޖެހޭ ގޮތެއްގައި މިކަން ކުރެވޭ ނިޒާމެއް ގާއިމް ކުރެވިގެންދާނެ."
މުރުތަޒާ ވިދާޅުވީ ސަރުކާރުގެ އަމާޒަކީ ކުނީގެ ގޮތުގައި އުކާލެވޭ، އެހެން ނަމަވެސް އަލުން ބޭނުން ކުރެވޭ ތަކެތި އަލުން އިގްތިސާދުގެ ތެރެއަށް ވެއްދުން ކަމަށެވެ.
"ކުނި މެނޭޖް ކުރުމުގެ ދާއިރާ މިހާރު އަޅުގަނޑުމެން ބައްޓަންކޮށްފައި މި ވަނީ ސާކިއުލާ އިކޮނޮމީއަކަށް ވާސިލުވެވޭ ގޮތަށް. މާނައަކީ އަޅުގަނޑުމެން މި އުފައްދާ ކުނީގެ ތެރޭގައި އެބަ ހިމެނޭ އަޅުގަނޑުމެންނަށް ރިސޯސްއެއްގެ ގޮތުގައި ބޭނުން ކުރެވިދާނެ އެއްޗެހި. އެ އެއްޗެހި އަލުން މާކެޓަށް ނެރެވޭ ކަހަލަ ނިޒާމަކަށް އަޅުގަނޑުމެން މިކަން މި ބައްޓަން ކުރަނީ،" އޭނާ ވިދާޅުވި އެވެ.
ރާއްޖޭގައި އަހަރަކަށް 517،000 ޓަނުގެ ކުނި އުފައްދަ އެވެ. މީހުންގެ ދިރިއުޅޭ އާބަން ސެންޓަރުތަކުގައި މީހެއްގެ ބޮލަށް 1.6 ކިލޯގެ ކުނި ދުވާލަކަށް އުފައްދަ އެވެ. އެންމެ ގިނައިން ކުނި އުފައްދަނީ ފަތުރުވެރިންނެވެ. ކޮންމެ ފަތުރުވެރިއަކު 3.5 ކިލޯގެ ކުނި ދުވާލަކު އުފައްދަ އެވެ.
މިއަދުގެ ނޫސްވެރިންގެ ބައްދަލުވުމުގައި މުރުތަޒާ ވިދާޅުވީ، ތިމާވެށީގެ ގޮތުން މީގެ އަހަރުތަކެއް ކުރިން ރާއްޖެއަށް ދިމާވެފައި އޮތް އެންމެ ބޮޑު މައްސަލައަކީ ރަށް ގިރުން ނަމަވެސް އެ މައްސަލައަށް ވުރެ ވެސް ކުނީގެ މައްސަލަ މިހާރު ބޮޑު ކަމަށެވެ.
"ކުނި މެނޭޖް ކުރުމަކީ ރާއްޖޭގެ ތިމާވެއްޓަށް މިހާރު ދިމާވެފައިވާ އެންމެ ބޮޑު މައްސަލަ. މީގެ އަހަރުތަކެއް ކުރިން ރާއްޖޭގެ ނަންބަރު ވަން ތިމާވެށީގެ މައްސަލައެއް ކަމަށް ފާހަގަ ކުރެވެނީ ރަށް ގިރުމުގެ މައްސަލަ މިހާރު ވެސް ކުރިއަށްދޭ އެބަ. އެހެންނަމަވެސް ކުނީގެ މައްސަލަ މި އޮތީ އެބައި އޯވާޓޭކް ކޮށްފައި އެންމެ މުހިންމު އެންމެ ބޮޑު މައްސަލައިގެ ގޮތުގައި،" މުރުތަޒާ ވިދާޅުވި އެވެ.
ކުނި މެނޭޖް ކުރުމުގައި މިވަގުތު ދިމާވާ ގޮންޖެހުންތަކަށް ވެސް މިއަދު މިނިސްޓްރީ އިން ވަނީ އަލިއަޅުވާލައިފަ އެވެ. ކުނި މެނޭޖް ކުރަން މިވަގުތު އޮތް އެންމެ ބޮޑު ގޮންޖެހުމަކީ ކުނި ގިނަވުމާއެކު ބިން ނެތުމާއި ކުނި މެނޭޖް ކުރަން ހަރަދުވާ ފައިސާ އިތުރުވުން ކަމަށް ސަރުކާރުން ބުނެ އެވެ.
"ސަރުކާރުގެ އިސްވެރިން ރަށްރަށަށް ޒިޔާރަތް ކުރީމާ ލިބޭ އެންމެ ބޮޑު ޝަކުވާއަކީ ވެސް އެ ރަށްރަށަށް ދިމާވެފައިވާ ކުނީގެ މައްސަލައަށް ހައްލެއް ނުލިބި ކުރިއަށްދާން ޖެހުން. އެންމެ ބޮޑު ކަމަކަށް ވަނީ ރަށްރަށުގައި މިކަން ކުރާނެ ޖާގަ ނެތި ކުނީގެ މިންވަރު އިތުރުވެގެން ދިޔުން އެއް ދުވަހުން އަނެއް ދުވަހަށް،" މިއަދުގެ ނޫސްވެރިން ބައްދަލުވުމުގައި މުރުތަޒާ ވިދާޅުވި އެވެ.
"ވަށާޖެހޭ ގޮތެއްގައި ރާއްޖޭގައި މިކަން ކުރަން ގޮންޖެހުންތަކެއް އެބަހުރި. އެއްކަމަކީ މިކަމަށް ކުރަންޖެހޭ ހަރަދު އިންތިހާއަށް ބޮޑުވެގެން ދިޔުން. ހާއްސަކޮށް ރާއްޖޭގެ ޖިއޮގްރަފީ މި އޮންނަ ގޮތުން ބަރޯސާ ވާންޖެހޭ އެއްގަމު ޓްރާންސްޕޯޓާއި މެރިން ޓްރާންސްޕޯޓަށް."
