ނިއު ޖާޒީ، ޔުނައިޓެޑް ސްޓޭޓްސް (ޖޫން 23) - އެމެރިކާ، މެކްސިކޯ އަދި ކެނަޑާގައި މިހާރު ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތުގެ ތަށި ނަގާނެ ކަމަށް ބެލެވެނީ ފްރާންސް ކަމަށް ނޯވޭގެ ތަރި، އާލިން ބްރަައުޓް ހާލަންޑް ބުނެފި އެވެ.
ބާކީ މެޗެއް އޮއްވައި، ގްރޫޕް އައި އިން ފްރާންސް އާއި ނޯވޭ އިން ވަނީ ގަދަ 32 ޓީމު ވާދަކުރާ ނޮކައުޓްގެ ފުރަތަމަ ބުރުން ޖާގަ ހޯދައިފަ އެވެ. އެ ގޮތުން، ފްރާންސް އާއި ނޯވޭ އިން ފުރަތަމަ ދެ މެޗުން މޮޅުވެ، ހަ ޕޮއިންޓާ އެކު އޮތްއިރު، ދެން އެ ގްރޫޕްގައި އޮތް ސެނެގާލް އާއި އިރާގަށް އަދި ޕޮއިންޓެއް ނުލިބެ އެވެ.
ގްރޫޕްގެ ފަހު މެޗުތަކަށް ބަލާއިރު، ނޯވޭ އާއި ފްރާންސްގެ ކުރިމަތިލުން ވެގެންދާނީ ގްރޫޕްގެ އެއް ވަނަ ޓީމު ކަނޑައަޅާނެ މެޗަކަށެވެ. އަދި، ސެނެގާލް އާއި އިރާގުގެ މެޗުން މޮޅުވާ ޓީމަކަށް އެންމެ ރަނގަޅު ތިން ވަނަ ޓީމުތަކުގެ ތެރޭގައި ހިމެނިގެން އަނެއް ބުރަށް ދިއުމުގެ ހަނި ފުރުސަތެއް އޮންނާނެ އެވެ.
ހާލަންޑް ވަނީ މި ފަހަރުގެ ވޯލްޑް ކަޕްގައި ކުޅުނު ފުރަތަމަ ދެ މެޗުން ހަތަރު ލަނޑު ޖަހައިފަ އެވެ. އަދި، ވޯލްޑް ކަޕް ކޮލިފައިންގައި އިޓަލީ ހިމެނުނު ގްރޫޕެއްގެ އެއް ވަނަ ހޯދައިގެން މުބާރާތަށް ކޮލިފައިވި ނޯވޭ އަށް ފްރާންސް ފަހަތަށް ޖައްސާލަައިފައި ގްރޫޕްގެ އެއް ވަނަ ހޯދޭނެ ކަމުގެ އަޑުތައް ވަނީ ގަދަވެފަ އެވެ. އެކަމަކު، ހާލަންޑް ބުނީ، އެއީ މާ ބޮޑަށް އޭނާ ވިސްނާ ކަމެއް ނޫން ކަމަށެެވެ.
ފޮކްސް ސްޕޯޓްސް އަށް ދިން އިންޓަވިއުއެއްގައި ހާލަންޑް ބުނީ އެންމެ ފުރަތަމަ އަމާޒަކަށްވީ ގްރޫޕް ސްޓޭޖުން ކުރިއަށް ދިއުން ކަމަށާއި އެކަން ހާސިލްވުމުން އެ ހިތްހަމަޖެހުން އެބައޮތް ކަމަށެވެ.
"ދެން. އޮތް ފްރާންސް މެޗަށް ހަގީގަތުގައެއް ނުއެއް ވިސްނަން. އެއީ، އަހަރެމެން މި އޮތީ ގޮސްފައި (ނޮކައުޓް ބުރަށް). ދެން، އެ މީޙުން (ފްރާންސް) އިން އަހަރެމެން ބަލިކުރާނެ، ދެން މި މުބާރާތް ވެސް ކާމިޔާބުކުރާނެ،" ހާލަންޑް ބުންޏެވެ.
ހާލަންޑް މި ގޮތަށް ބުނުމާ އެކު، ގިނަ ބަޔަކު އަންނަނީ ނޯވޭ އިން މުބާރާތުގައި ހާސިލްކުރަން ބޭނުންވާ ކަންކަމާ މެދު އެ ޓީމުގެ ތަރިން ދެކޭ ގޮތާ މެދު ސުވާލު އުފެދޭ ކަމަށް ބުނެފަ އެވެ.
މިއީ، 1998 ވަނަ އަހަރުގެ ފީފާ ވޯލްޑް ކަޕަށް ފަހު ނޯވޭ އިން ދުނިޔޭގެ އެންމެ ބޮޑު ފުޓްބޯޅަ މުބާރާތުގަައި ކުޅޭ ފުރަތަމަ ފަަހަރެވެ. ފްރާންސްގައި މީގެ 28 އަހަރު ކުރިން ބޭއްވި ވޯލްޑް ކަޕްގައި، ބްރެޒިލް އާއި މޮރޮކޯ އަދި ސްކޮޓްލެންޑް ހިމެނުނު ގްރޫޕެއްގެ ދެ ވަނަ. ހޯދައިގެން، ނޯވޭ އިން ގަދަ 16 ބުރަށް ދަތުުރުކުރި އެވެ. އެކަމަކު، އެ ބުރުގައި އިޓަލީ އަތުން 1-0 އިން ބަލިވެ މުބާރާތުން ކެޓީ އެވެ.
