މާލޭގައި ހިންގާ ސަރުކާރު ސްކޫލެއްގެ ބަޖެޓުން އޮޅުވާލައިގެން ހިންގި ހިޔާނާތުގެ މައްސަލައާ ގުޅިގޭ ތިން މުވައްޒަފެއްގެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށައިފި އެވެ.
އަދަދު އަށް އެނގިފައިވާ ގޮތުގައި އޭސީސީން ބަލަމުންދަނީ ސްކޫލުގައި މަސައްކަތް ކުރި ބިދޭސީ މުވައްޒަފަކު ވަޒީފާއިން ވަކިވި ފަހުން، އޭނާގެ ނަމުގައި ގާތްގަނޑަކަށް ފަސް އަހަރު ވަންދެން މުސާރަ ނަގަމުންދިޔަ މައްސަލަ އެވެ.
މި މައްސަލައިގައި ހިމެނެނީ ސްކޫލުގެ އެޑްމިނިސްޓްރޭޓަރާއި، ހިއުމަން ރިސޯސް މެނޭޖަރުގެ އިތުރުން ބަޖެޓު އޮފިސަރުގެ މައްސަލަ އެވެ. އެ ތިން މުވައްޒަފުންގެ މައްސަލަ ބެލުމަށްފަހު ސިވިލް ސާވިސް ކޮމިޝަނުން ވަނީ އެ މުވައްޒަފުން ވަޒީފާއިން ވަކިކޮށްފަ އެވެ.
ހިޔާނާތުގެ މައްސަލައެއްގައި މާލޭ ސްކޫލެއްގެ އިސް މުވައްޒަފުންތަކެއް ވަކިކޮށްފި
ވަޒީފާއިން ވަކިވި ބިދޭސީއެއްގެ ނަމުގައި ފަސް އަހަރުވަންދެން މުސާރަ ނަގައި، 1.5 މިލިއަން ރުފިޔާގެ ހޔާނާތްތެރިވި މައްސަލައެއްގައި މާލޭގެ ސްކޫލެއްގެ އިސްވެރިންތަކެއް ވަޒީފާއިން ވަކިކޮށްފި. މި މައްސަލައިގައި ވަކިކޮށްފައިވަނީ އެ ސްކޫލުގެ އެޑްމިނިސްޓްރޭޓަރާއި، އެޗްއާރު މެނޭޖަރުގެ އިތުރުން ބަޖެޓު އޮފިސަރު
ސަރުކާރުގެ އިތުބާރު ކުރެވޭ މަސްދަރަކުން މައުލޫމާތު ދިން ގޮތުގައި، 2021 އިން ފެށިގެން އެ ބިދޭސީ މީހާގެ މުސާރަ ދިޔައީ ގަވާއިދާ ހިލާފަށް ބަޖެޓު އޮފިސަރާ އާއިލީ ގޮތުން ގުޅުން އޮތް މީހުންގެ ބޭންކު އެކައުންޓަށް ޖަމާކުރަމުންނެވެ.
"އެއީ ގާތްގަނޑަކަށް 1.5 މިލިއަން ރުފިޔާގެ ހިޔާނާތެއް،" އޭނާ ވިދާޅުވި އެވެ.
މި މައްސަލަ ފުރަތަމަ ފާހަގަވީ ޓީޗަރުންގެ މުސާރަ އެޕްރޫވްކުރުން އެޑިއުކޭޝަން މިނިސްޓްރީގެ ދަށަށް ބަދަލުކުރި ފަހުން ރެންޑަމްކޮށް ކުރި ޗެކްކުރުމެއްގެ ތެރެއިން ކަމަށް މައުލޫމާތު ދިން އޮފިޝަލް ބުންޏެވެ.
މި ހިޔާނާތުގެ މައްސަލައެއް ފެންމަތިވެ، އިދާރީ ފިޔަވަޅު އަޅާފައިވީ ނަމަވެސް، މި މައްސަލަ ޖިނާއީ ކުށެއްގެ ގޮތުގައި ފުލުހުން ބަލަމުންދާކަން އެނގިފައެއް ނުވެ އެވެ.
