ލޮސް އެންޖެލްސް، ޔުނައިޓެޑް ސްޓޭޓްސް (ޖޫން 15) - އިޒްރޭލާއި އެމެރިކާ އިން އިސްވެ، މި އަހަރުގެ ފެބްރުއަރީން ފެށިގެން އިރާނާ ދެކޮޅަށް ހަނގުރާމައެއް ކުރަމުން އަންނަ ދަނޑިވަޅެއްގައި، ފީފާ ވޯލްޑް ކަޕްގައި ވާދަކުރަން، އިރާނާ ހަނގުރާމަ ކުރާ އެއް ގައުމުކަމަށްވާ އެމެރިކާ އަށް އިރާން ޓީމުން އައިސް ތިބީ އެ ގައުމުގެ ހުރިހާ ރައްޔިތުންގެ ހައްގުގައި ކަމަށް އިރާންގެ ކެޕްޓަން، މަހުދީ ތަރޭމީ ބުނެފި އެވެ.
އެމެރިކާ އާއި އިރާގުން ރޭގެ ވަގުތެއްގައި ސުލްހަ ގާއިމްކުރި ކަމަށް އިއުލާނުުކުރި ނަމަވެސް، މިދިޔަ ހަތަރު ވަރަކަށް މަސް ތެރޭގައި ނަފްސާނީ ގޮތުން، އިރާން ކުޅުންތެރިންނަށް ވޯލްޑް ކަޕަށް ތައްޔާރުވުމަށް ގިނަ ގޮންޖެހުންތަކެއް ކުރިމަތިވި އެވެ. ހާއްސަކޮށް، މުބާރާތުގެ ގްރޫޕް ސްޓޭޖުގެ މެޗުތައް އެމެރިކާގައި ކުޅެން ޖެހޭއިރު، އިރާނުން ކޭމްޕް ކޮށްގެން ތިބީ މެކްސިކޯގަ އެވެ. ކޮންމެ މެޗެއް ނިންމާފައި، އެނބުރި މެކްސިކޯ އަށް ދާ ގޮތަށް އެމެރިކާ އިން އިރާނަށް އަންގާފައިވާއިރު، ޓީމުގެ ބައެއް ފަރާތްތަކަށް ވިސާ ނުލިބި މަޑުކުރަން ވެސް ޖެހުނެވެ.
"އަހަރެން ތި އެންމެންނަށް އަންގާލައިދޭން ބޭނުންވަނީ އަހަރެމެން މި ތަނަށް (އެމެރިކާ އަށް) އައިސް މި ތިބީ ފުޓްބޯޅަ ކުޅެންކަން. އިހުތިރާމް ލިބިގެންވާ އިރާންގެ ކޮންމެ ރައްޔިތެއް ތަމްސީލްކުރުމަށް، އެ މީހުންގެ ހައްގުގައި. އިރާނުގައި ދިރި އުޅުނަސް ނޫޅުނަސް، އިރާނަށް ނިސްބަތްވާ އެންމެނަށްޓަކައި،" ތަރޭމީ ބުންޏެވެ.
ތަރޭމީގެ ވާހަކަތައް ތަކުރާރުކޮށް، އިރާން ޓީމުގެ ކޯޗު، އާމިރު ގަލެނޯއީ ބުނީ، އިރާނުގެ ހައްގުގައި މިފަދަ މުހިންމު ކަމެއް ކުރުމަށް ކުޅުންތެރިން ވެސް އަޒުމު ކަނޑައަޅައިގެން ތިބުމަކީ، މި މުބާރާތުގެ މެޗުތަކުގައި އިރާނުގެ ހިތްވަރު އިތުރަށް ގަދަވުމުގެ ފުރުސަތު އޮތް ކަމެއް ކަމަށެވެ.
އިޓަލީގެ އިންޓަ މިލާނަށް ކުރިން ކުޅުނު، އަދި މިހާރު ގްރީސްގެ އޮލިމްޕިއާކޯސް އަށް ކުޅެމުން އަންނަ ތަރޭމީ ބުނީ، އިރާން ޓީމުގެ މެދުަގައި މުބާރާތާ ކުރިމަތިލާއިރު އޮތީ އެއްބައިވަންތަ ކަމުގެ ރޫހެއް ކަމަށާއި އިރާނުގެ މީހުން އުފާކުރާ ވަރުގެ ނަތީޖާތަކެއް ނެރެން ބޭނުންވާ ކަމަށެވެ.
މި ފަހަރުގެ ވޯލްޑް ކަޕްގައި އިރާން ވާދަނުކުރަން އެދޭ މީހުން ވެސް އިރާނުގައި އުޅޭނެ ކަމަށާއި އެހެން ނަމަވެސް، ކޮންމެ މީހަކީ ވެސް އަމިއްލަ ވިސްނުމުގައި ބަސްބުނުމުގެ އިހުތިޔާރު އޮންނަންޖެހޭ މީހެއް ކަމަށް ވުމުން އިހުތިރާމާ އެކު އެ ފުރުސަތު ދޭނެ ކަމަށް ތަރޭމީ ވަނީ ބުނެފަ އެވެ.
"ސިޔާސީ ކަމެއްގައި ބައިވެރިއެއްނުވާނަން. މި އުޅެނީ ފުޓްބޯޅަ ކުޅެން އައިސް،" ތަރޭމީ ބުންޏެވެ.
ނިއު ޒީލެންޑާއި އިރާނާ ދެކޮޅަށް މިރޭ ކުޅެން އޮތް މެޗުގެ ކުރިން، ހުރިހާ ނޫސްވެރިން ވެސް މެޗުގެ ވާހަކަ އަށް ވުރެން ބޮޑަށް ހާލަތެއްގެ ވާހަަކަ އެހުމަކީ އެންމެ ރަނގަޅު ގޮތެއް ނޫން ކަމަށް ވެސް ތަރޭމީ ވަނީ ބުނެފަ އެވެ. އަދި، ސިޔާސީ ވާހަކަ ދައްކާނަަމަ، އެއީ އެކަމަށް ހާއްސަކޮށް ބާއްވާ ނޫސްވެރިންގެ ބައްދަލުވުމެއްގައި ކުރުން ރަނގަޅު ކަމެއް ކަމަށް ތަރޭމީ ވަނީ ބުނެފަ އެވެ.
