ނުއެވޯ ލިއޯން، މެކްސިކޯ (ޖޫން 15) - އަލެކްސަންޑަ އިސާކާއި ވިކްޓަ ޔޯކެރޭޝްގެ ލަނޑުތަކާ އެކު، ސްވިޑެން އިން 5-1 އިން ޓިއުނީޝިއާ ބަލިކޮށް މޮޅަކުން މި ފަހަރުގެ ފީފާ ވޯލްޑް ކަޕް ފުޓްބޯޅަ މުބާރާތް ފަށައިފި އެވެ.
ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގެ ކުއާޓާ ފައިނަލުގައި ކުޅުނު ސްވިޑެން އިން އެންމެ ފަހުން 2022 ވަނަ އަހަރު ގަތަރުގަައި ބޭއްވި ވޯލްޑް ކަޕަށް ކޮލިފައިނުވެ އެވެ. މި ފަހަރުގެ ވޯލްޑް ކަޕަށް ޔޫރަޕްގެ ޕްލޭއޮފް ބުރުން އައި ސްވިޑެން އިން ވަނީ މިއަދު ޓިއުނީޝިއާ ކައިރީގައި ރަނގަޅު ކުޅުމެއް ދައްކައިފަ އެެެވެ. ހާއްސަ ގޮތެއްގައި ސްވިޑެންގެ ފޯވާޑް ލައިން ބަރޯސާވާނެ ދެ ކުޅުންތެރިން ކަމަށްވާ އިސާކް އާއި ޔޯކެރޭޝްގެ ކޮމްބިނޭޝަން ވަރަށް ރަނގަޅަށް މި މެޗުގައި ފެނިގެންދިޔަ އެވެ.
މެޗު ފަށައިގެން ހަތް ވަނަ މިނިޓްގައި ސްވިޑެން އިން ވަނީ ލީޑުނަގައިފަ އެެވެ. މި ލަނޑު ސްވިޑެން ޓީމަށް ޖަހައިދިނީ، އިނގިރޭސި ޕްރިމިއާ ލީގުގައި ބްރައިޓަން އަށް ކުޅެމުން އަންނަ ޔާސީން އަޔާރީ އެވެ. ދެ ވަނަ ލަނޑެއްޖަހައި، ލީޑުފުޅާކޮށް ހަމަޖެހިލަން ސްވިޑެން އިން ކުރި މަސައްކަތް 30 ވަނަ މިނިޓްގައި އިސާކް ވަނީ ކާމިޔާބުކޮށްފަ އެވެ. މި ލަނޑު ޖަހަން ފުރުސަތު ތަނަވަސްކޮށްދިނީ ޔޯކެރޭޝް އެވެ.
ސްވިޑެން އިން ދެ ގޯލުގެ ލީޑެއްގައި ފުރަތަމަ ހާފު ނިންމާލަން ދަނިކޮށް ޓިއުނީޝިއާ އިން ވަނީ ލަނޑު ޖަހައިފަ އެވެ. އެ ގޮތުން، 43 ވަނަ މިނިޓްގައި ހަަނިބަލް މެޖްބްރީ ދިން ބޯޅައަކުން އޮމާރް ރެކިކް ވަނީ ގޯލު ޖަހައި، ޓިއުނީޝިއާ އަށް އުންމީދެއް ހޯދައިދީފަ އެވެ.
ދެ ވަނަ ހާފުގައި ކުޅެން އަރައި، މެޗުގެ 59 ވަނަ މިނިޓްގައި އިސާކް ދިން ބޯޅައަކުން ޔޯކެރޭޝް ވަނީ ސްވިޑެންގެ ތިން ވަނަ ގޯލު ޖަހައި، އަލުން އެ ޓީމަށް ދެ ގޯލުގެ ލީޑެއް ނަގައިދީފަ އެވެ. ޔޯކެރޭޝް އަކީ ކޮލިފައިން ޕްލޭއޮފްގައި ވެސް ސްވިޑެން އަށް މުހިންމު ލަނޑުތަކެއް ޖަހައިދިން ކުޅުންތެރިއެކެވެ.
އިތުރު ގޯލެއް ޖަހަން ސްވިޑެން އިން ކުރި މަސައްކަތް މެޗުގެ 86 ވަނަ މިނިޓްގައި ކާމިޔާބުކުރި އެވެ. އޭރިއާތެރެއިން ލިބުނު ފުރުސަތެއްގައި މަޓިއަސް ސްވެންބާގް ވަނީ ގޯލު ކާމިޔާބުކޮށްފަ އެވެ. މި ލަނޑު ބަލައިގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަަލައިފަ އެވެ.
އިތުރު ވަގުުތުގައި ސްވިޑެންގެ ފަހު ލަނޑު ޖެހީ މެޗުގައި މޮޅު ކުުޅުމެއް ދެއްކި އަޔާރީ އެވެ. އަޔާރީ އަކީ މެޗުގައި ސްވިޑެންގެ ފުރަތަމަ ލަނޑު ވެސް ޖެހި ކުޅުންތެރިޔާ އެވެ. އޭނާ ދެ ވަނަ ލަނޑު ޖެހީ ގޯލުގެ މަތީ ކަނަށް ބޯޅަ އަމާޒުކޮށްލައިގެންނެވެ.
ޓިއުނީޝިއާ އަތުން މޮޅުވުމުން ގްރޫޕް އެފްގެ ފުރަތަމަ ތިން ޕޮއިންޓް މި ހޯދީ ސްވިޑެން އިންނެވެ. އެ ގޮތުން، މި ގްރޫޕްގެ އަނެއް މެޗުގައި ޖަޕާނާއި ނެދަލެންޑްސް ވަނީ 2-2 އިން އެއްވަރުވެފަ އެވެ.
