ލޮލުގެ ސިއްހީ ހިދުމަތަކީ މުޅި މުޖުތަމައުއަށް ފަސޭހައިން ލިބޭ ހިދުމަތަކަށް ހަދައި، ދުޅަހެޔޮ ލޮލުގެ ސިއްހަތަށް ހޭލުންތެރިކުރުމަށް އައިކެއާ އިން ކުރާ މަސައްކަތުގެ ތެރެއިން، ކެއާ ސޮސައިޓީގެ ބައިވެރިންނަށް ލޮލުގެ ސްކްރީނިން ހެދުމަށް ހާއްސަ ޕްރޮގްރާމެއް ހިންގައިފި އެވެ.
ކެއާ ސޮސައިޓީން ކޮންމެ އަހަރު ބާއްވާ ހެލްތު ސްކްރީނިން އިވެންޓަށް އެއްބާރުލުން ދިނުމުގެ ގޮތުން އައިކެއާއިން ހިލޭ ފޯރުކޯށްދިން މި ހިދުމުތަކުގައި ހާއްސަ އެހީއަށް ބޭނުންވާ ކުދިންނާއި ބޮޑެތި މީހުން ހިމެނޭ ގޮތަށް 50 ބައިވެރިޔަކު ސްކްރީނިން ހެދި އެވެ.
މި ޕްރޮގްރާމްގެ މަގްސަދަކީ ލޮލުގެ ފެނުމާ ގުޅޭ މައްސަލަތައް ކުރީބައިގައި ދެނެގަނެ، ލޮލުގެ ސިއްހަތު ރަނގަޅަށް ބެހެއްޓޭނެ ގޮތްތަކާ ބެހޭ ލަފާ ދިނުން ކަމަށް އައިކެއާއިން ބުންޏެވެ. އެގޮތުން އައިކެއާގެ އޮޕްޓޮމެޓްރިސްޓުންގެ ޓީމުން ޕްރޮގްރާމުގެ ބައިވެރިންގެ ލޮލުގެ ފެނުމުގެ އަސާސީ ޓެސްޓުތައް ހަދައި، އިތުރު ފަރުވާ ބޭނުންވާ ފަރާތްތަކަށް ލަފާ ދިނެވެ.
އައިކެއާއިން ބުނީ މުޖުތަމައުތަކަށް ވާސިލްވެ، ލޮލުގެ ސްކީރިނިންގެ ހިދުމަތް ފަސޭހައިން ލިބޭނެ ގޮތް ހެދުމަކީ ކުންފުނީގެ ސީއެސްއާރުގެ މުހިންމު ބައެއް ކަމަށާއި ހުރިހާ ފަރާތްތަކަށް ވެސް ހަމަހަމަ ގޮތެއްގައި ފެންވަރު ރަނގަޅު ލޮލުގެ ފަރުވާ ފޯރުކޮށްދިނުމާއި، ބޭނުންވާ ވަގުތު އެކަށީގެންވާ ލަފަޔާއި އިރުޝާދު ދިނުމުގައި އެ ކުންފުނި ދެމި އޮންނާނެ ކަމަށެވެ.
ލޮލުގެ ސިއްހަތަށް ހޭލުންތެރިކަން އިތުރު ކުރުމާއި، ގަވާއިދުން ލޮލުގެ ޗެކަޕް ހެދުމުގެ މުހިންމުކަން މުޖުތަމައުތަކަށް ފޯރުކޮށްދިނުމަކީ، އައިކެއާގެ ސީއެސްއާރް ހަރަކާތްތަކުގެ ތެރެއިން ދެމެހެއްޓެނިވި ގޮތެއްގައި ކުރިއަށް ގެންދާނެ މަސައްކަތެއް ކަމަށް އެ ކުންފުނިން ބުންޏެވެ.
އައިކެއާގެ އަމާޒަކީ އަބަދުވެސް ކަސްޓަމަރުންނަށް ފައިދާހުރި، އުފާވެރި ތަޖުރިބާތަކެއް ފޯރުކޮށްދީ، ޒަމާނީ ޓެކްނޮލޮޖީއާއިއެކު ފެންވަރު ރަނގަޅު ލޮލުގެ ފަރުވާގެ ހިދުމަތްތައް ފޯރުކޮށްދިނުން ކަމަށް އެ ކުންފުނިން ބުންޏެވެ.
