ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ ޖެނެރަލް އެޑްމިނިސްޓްރޭޝަން އެންޑް ފްރަންޓް އޮފީހުގެ އިސްވެރިޔާ ޒަކަރިއްޔާ ހުސައިން އަދި ޖުޑީޝަލް އެކަޑަމީގެ ޑިރެކްޓާ ޖެނެރަލް އަހްމަދު އަލީ ސަސްޕެންޑުކޮށްފި އެވެ.
ޑީޖޭއޭގެ އިންފޮމޭޝަން އޮފިސަރު އަދަދު އަށް ވިދާޅުވީ އެ ދެ ބޭފުޅުން މަގާމުން ސަސްޕެންޑުކުރީ ބަލަމުންދާ މައްސަލައަކާ ގުޅިގެން ކަމަށެވެ. ނަމަވެސް އެކަމާ ގުޅިގެން އިތުރު ތަފްސީލެއް އިންފޮމޭޝަން އޮފިސަރު ނުދެއްވަ އެވެ.
ޑީޖޭއޭގެ ޗީފް އެޑްމިނިސްޓަރުގެ މަގާމުގައި ހުންނެވި އަމްޖަދު މުސްތަފާ މިދިޔަ އެޕްރީލް 20، ގައި މަގާމުން ވަނީ އިސްތިއުފާ ދެއްވާފަ އެވެ. އޭނާ އިސްތިއުފާ ދެއްވި ސިޓީގައި ބަޔާންކޮށްފައިވަނީ މަގާމުން ވަކިވެވަޑައިގެންނެވީ އަމިއްލަ ސަބަބުތަކަކާ ގުޅިގެން ކަމަށެވެ.
ޑީޖޭއޭގެ ޗީފް އެޑްމިނިސްޓްރޭޓާގެ މަގާމަށް އަމްޖަދު އައްޔަންކުރެއްވީ ޖުޑީޝަލް ސާވިސް ކޮމިޝަނުންނެވެ. އޭނާ އެ މަގާމާ ހަވާލުވެވަޑައިގަތީ ފެބްރުއަރީ 19، 2025 ގަ އެވެ. އަމްޖަދު މީގެ ކުރިން ވަނީ ވަޒީފާއާ ބެހޭ ޓްރައިބިއުނަލްގެ ރައީސްކަމާއި މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަންގެ ބޯޑު ޑިރެކްޓަރުކަމާއި އިލެކްޝަންސް ކޮމިޝަންގެ ނައިބު ރައީސްގެ މަގާމު ފުރުއްވައިފަ އެވެ.
ޑިޕާޓުމެންޓް އޮފް ޖުޑީޝަލް އެޑްމިނިސްޓްރޭޝަނަކީ އުއްތަމަ ފަނޑިޔާރާއި ސުޕްރީމް ކޯޓުގެ ލަފާގެ މަތިން، ރާއްޖޭގެ ކޯޓުތަކުގެ އިދާރީ ކަންކަން ބަލަހައްޓާ މައި އިދާރާ އެވެ. ޖޭއެސްސީގެ ދަށުގައި ޑީޖޭއޭ އޮތް އޮތުން ނިމުމަކަށް ގެނެސް އަލުން އެކުލަވައިލުމުގެ ވިސްނުން ގެންގުޅުއްވާ ކަމަށް މުއިއްޒު ވަނީ ވިދާޅުވެފަ އެވެ.
