އިންޑިއާގެ ބޮޑުވަޒީރު ނަރެންދުރަ މޯދީގެ ތިންވަނަ ދައުރުގެ މެދުތެރެއާ ހަމައަށް އައިއިރު، އެ ގައުމުގެ މުހިންމު ހަތަރު ސްޓޭޓެއްގައި ބޭއްވި އިންތިހާބުގައި ދެ ސްޓޭޓެއްގެ އަގުލަބިއްޔަތު މޯދީގެ ޕާޓީން ކާމިޔާބުކުރާނެކަން ކަށަވަރުވެއްޖެ އެވެ.
އިންޑިއާގެ އިލެކްޝަން ކޮމިޝަންގެ ވެބްސައިޓުން ލިބޭ ތަފާސްހިސާބުތަކަށް ބަލާއިރު، އިރުމަތީގެ ސްޓޭޓެއް ކަމަށްވާ އައްސާމްގެ ވެރިކަން ޖެހިޖެހިގެން ތިންވަނަ ދައުރަކަށް މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އިން ވަނީ ކާމިޔާބުކޮށްފަ އެވެ. މީގެ އިތުރުން ވެސްޓް ބެންގޯލްގައި ވެސް ބީޖޭޕީން ދަނީ ބޮޑު ކުރިއެރުމެއް ހޯދަމުންނެވެ. ބަންގްލަދޭޝްއާ ބޯޑަރު ހިއްސާކުރާ މި ދެ ސްޓޭޓްގެ އިންތިހާބުގައި އެންމެ ބޮޑު މައްސަލައަކަށް ވެފައިވަނީ ގަވާއިދާ ހިލާފަށް ބޯޑަރު ހުރަސްކޮށް އިންޑިއާއަށް ވަންނަ މީހުންގެ މައްސަލަ އެވެ.
ވެސްޓް ބެންގޯލްއަކީ މީގެ ކުރިން ދުވަހަކު ވެސް ބީޖޭޕީން ވެރިކަން ކުރި ސްޓޭޓެއް ނޫނެވެ. އަދި 2021 ވަނަ އަހަރާ ހަމައަށް އެ ސްޓޭޓްގެ ގާނޫނު ހަދާ މަޖިލީހުގައި ބީޖޭޕީ ތަމްސީލުކުރަމުން ދިޔައީ އެންމެ ތިން މެންބަރުންނެވެ.
މި އިންތިހާބާ ގުޅިގެން ބޮޑުވަޒީރު ނަރެންދުރަ މޯދީ އާއި، އެމަނިކުފާނުގެ ގާތް ބޭފުޅެއް ކަމަށްވާ ހޯމް މިނިސްޓަރު އަމިތު ޝާހްގެ އިތުރުން ބީޖޭޕީގެ އިސް ލީޑަރުން ވަނީ ހަފުތާތަކެއް ވަންދެން ވެސްޓް ބެންގޯލްގައި ވަރުގަދަ ކެމްޕޭނެއް ކުރައްވާފަ އެވެ. މި ކެމްޕޭނުގައި އެ ބޭފުޅުން އެންމެ ބޮޑަށް އަލިއަޅުވާލާފައިވަނީ ބަންގްލަދޭޝުން ގަވާއިދާ ހިލާފަށް މީހުން އެތެރެވާ މައްސަލައަށާއި، މިހާރުގެ ޗީފް މިނިސްޓަރު މަމަތާ ބެނަޖީގެ ސަރުކާރުގެ ދަށުން އެ ސްޓޭޓްގެ އިގްތިސާދު ބަލިކަށިވެފައިވާ މައްސަލައަށެވެ.
މަމަތާ ބެނަޖީއަކީ ބޮޑުވަޒީރު މޯދީއަށް ވަރަށް ބޮޑަށް ފާޑުވިދާޅުވާ، އިންޑިއާގެ އިދިކޮޅު އިއްތިހާދުގެ މުހިންމު ލީޑަރެކެވެ. އެކަމަނާ ގެންދަވަނީ 2011 ވަނަ އަހަރުން ފެށިގެން ވެސްޓް ބެންގޯލްގެ ވެރިކަން ކުރައްވަމުންނެވެ.
މި ފަހަރުގެ ސްޓޭޓް އިންތިހާބުތަކުން އިދިކޮޅު ފަރާތްތަކަށް ލިބުނު ނާކާމިޔާބީގެ ސަބަބުން، 2029 ވަނަ އަހަރު ރެކޯޑް ހަތަރުވަނަ ދައުރަކަށް މޯދީ ކުރިމަތިލައްވާއިރު، އިދިކޮޅު އިއްތިހާދު ވަރަށް ބޮޑަށް ބަލިކަށިވެފައި އޮންނާނެ ކަމަށް ބެލެވެ އެވެ.
