ވެންކޫވާ، ކެނަޑާ (އޭޕްރީލް 30) - ކްލަބްތަކުގައި ޒުވާން ކުޅުންތެރިން އުފައްދައި، މެޗުތަކުގައި ބޭނުންކުރުން ލާޒިމްކުރާ ގޮތަށް ބައްޓަންކުރުމަށްޓަކައި، ފީފާ އިން ޕްރޮޕޯސަލެއް ތައްޔާރުކޮށް މެމްބަރު ގައުމުތަކާ ހިއްސާކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
އެ ގޮތުން، ފީފާ އިން ހުށަހަޅާފައިވާ ޕްރޮޕޯސަލްގައި ބުނެފައިވަނީ، ޓީމުތަކުން މެޗުތަކުގައި ކުޅޭއިރު، އަބަދުވެސް ދަނޑުމަތީގައި، ހޯމްގްރައުން 20 އަހަރުން ދަށުގެ ކުޅުންތެރިއަކު ހުންނަން ޖެހޭނެ ކަމަށެވެ. މާނަ އަކީ، ކްލަބްތަކުގެ ސިސްޓަމްތަކުގެ ތެރެއިން އަންނަ ޒުވާން ކުޅުންތެރިއަކު ޓީމުގައި އަބަދުވެސް ބޭނުންކުރުން ލާޒިމްކުރުމެވެ.
ޓައިމްސް ނޫހުގައި ރިޕޯޓްކޮށްފައިވާ ގޮތުގަައި، ފީފާ އިން މި ބަދަލު ގެންނަން ބޭނުންވާ އެންމެ ބޮޑު ސަަބަބަކީ، ޒުވާން އުމުރުގައި ކުޅުންތެރިން ކްލަބްތަކަށް ގެންދިއުމަށް ފަހު، ސީނިއާ ޓީމާ ހަމައިން ފުރުސަތު ނުދީ އެ ކުޅުންތެރިން އެހެން ޓީމުތަކަށް ވިއްކާލައިގެން ވިޔަފާރި މޮޑެލަށް އިސްކަންދީގެން ގިނަ ކްލަބްތަކުން ޒުވާން ކުޅުންތެރިން ގެންގުޅޭތީ އެވެ.
މި ކަންކަމަށް ރިއާޔަތްކޮށް، ފީފާގެ ޓެކްނިކަލް އަދި ފުޓްބޯލް ޑިވެލޮޕްމަންޓް ޓީމުން ޕްރޮޕޯސަލެއް ތައްޔާރުކުރީ ޒުވާން ކުޅުންތެރިން އުފައްދައި، ސީނިއާ ޓީމުން ވެސް ފުރުސަތު ދޭން ޖެހޭ ގޮތަށް ކަންކަން ލާޒިމްކޮށްފައިވާ މޮޑެލް އެއް ތައްޔާރުކުރުމަށެވެ.
އެ ގޮތުން، ފީފާ އިން މިހާރު ފެޑެރޭޝަންތަކާއި މެމްބަރު ގައުމުތަކުން މި ކަަމަށް ދެކޭގޮތް، ނޫނީ ހިޔާލުތައް ހުށަހަޅަން އަންނަ އަހަރުގެ ފީފާ ކައުންސިލްގެ ބައްދަލުވުމާ ހަމައަށް ވަނީ މުހުލަތެއް ދީފަ އެވެ. އެކަމަކު، މި ވަގުތަށް ވެސް ފެންނަ ކަންކަމަށް ބަލާއިރު، ފީފާގެ މި ޕްރޮޕޯސަލް ގަވާއިދެއްގެ ސިފައިގައި ރަސްމީކޮށް ކަނޑައެޅިގެން ދިއުމަށް އޮތީ ހަނި ފުރުސަތެކެވެ.
ރިޕޯޓްތައް ބުނާގޮތުން، މި ޕްރޮޕޯސަލަށް އެންމެ ބޮޑަށް ދެކޮޅު ހަދާނެ ކަމަށް ބެލެވެނީ، ޔޫރަޕްގެ ކްލަބްތަކުންނެވެ. ޔޫރަޕަކީ ދުނިޔޭގެ އެކި ބައްރުތަކުން ޒުވާން އުމުރުގައި ކުޅުންތެރިންތައް ގެންގޮސްގެން، ޑިވެލޮޕްކުރުމަށް ފަހު، އެެހެން ޓީމުތަކަށް ކުޅުންތެރިން ވިއްކައިގެން، ވިޔަފާރި މޮޑެލަށް ގިނަ ޒަމާންތަކެއް ވަންދެން ހިންގަމުން އަންނަ ކްލަބްތަކެވެ.
