ޓޮންސިލް ސްޓޯން އަކީ ޓޮންސިލްގެ ވަޅުގަނޑުތަކުގެ ތެރޭގައި އުފެދޭ ހަރު، ކުދި ކުދި ހިލަކޮޅުތަކެކެވެ. މިއީ އެތައް މިލިއަން ބަޔަކަށް ދިމާވާ، ނަމަވެސް ގިނަ ބަޔަކު ވާހަކަ ނުދައްކާ ސިއްހީ މައްސަލައެކެވެ.
ޓޮންސިލަކީ ކަރުތެރޭގެ ފަހަތުގައިވާ ދިފާއީ ނިޒާމުގެ ބައެކެވެ. ޓޮންސިލް ސްޓޯންސް އުފެދެނީ ޓޮންސިލްގައި ހުންނަ ކުދި ރޫތަކުގެ ތެރޭގައި ކާނާގެ ކުނޑި، ބެކްޓީރިއާ، އަދި މަރުވެފައިވާ ސެލްތައް ތާށިވެ، ދުވަސްވާވަރަކަށް އެ އެއްޗެހި ގާވެ އެވެ. މިއީ އާންމުކޮށް ހުދު ނުވަތަ ރީނދޫ ކުލައެއްގައި ހުންނަ، އޮށެއްވަރުގެ ކުދި ހިލަކޮޅުތަކެކެވެ.
ބަލީގެ އަލާމާތްތައް
ގިނަ ފަހަރަށް މި ކުދި ހިލަކޮޅުތަކުން އުނދަގުލެއް ނުވެއެވެ. ނަމަވެސް ބޮޑެތިވާނަމަ ފެނިދާނެ އަލާމާތްތަކަކީ:
- ނުބައި ރަހައެއްލުން: އަނގަ ތެރޭގައި މެޓަލިކް ނުވަތަ ނުބައި ރަހައެއް ހުރުން.
- ކަރުގައި އެއްޗެއް އިންނަހެން ހީވުން: ކަރުތެރޭގައި ބީރައްޓެހި އެއްޗެއް ތާށިވެފައި ހުންނަ ކަމުގެ އިހުސާސްވުން.
- ދިރުވަން އުނދަގޫވުން: ކާއިރު ނުވަތަ ބޯއިރު ކަރުގައި ރިއްސުން.
- ކަންފަތުގައި ރިއްސުން: ޓޮންސިލާއި ކަންފަތުގެ ނާރުތައް ގުޅިފައި ހުރުމުގެ ސަބަބުން ކަންފަތަށް ތަދުވުން.
- ފެންނަން ހުންނަ ހުދު ގަނޑު: ޓޮންސިލްގެ ރޫތަކުގެ ތެރޭގައި ހުދުކުލައިގެ އެތިކޮޅުތައް ފެންނަން ހުރުން
- ދާއިމީ ގޮތެއްގައި އަނގަ ނުބައިވަސް ދުވުން: ބެކްޓީރިއާ އާއި ކުނި އެކުވެގެން އުފެދޭ "ކުނި ބިސް" ފަދަ ވަހެއް ދުވުން.
މިކަން މެދުވެރިވާ ސަބަބުތައް
- އަނގަޔާއި ދަތްތަކުގެ ސާފުތާހިރުކަން ކުޑަވުން.
- ގިނަގިނައިން ޓޮންސިލް ދުޅަވުން
- ހަށިގަނޑުން ފެންމަދުވުން
- ގުދުރަތީ ގޮތުން ޓޮންސިލްގެ ވަޅުގަނޑުތައް ފުންކޮށް ހުރުން.
ގޭގައި ކުރެވިދާނެ ފަރުވާ
ގިނަ ފަހަރަށް ޓޮންސިލް ސްޓޯންސް އަމިއްލައަށް ބޭރުވެއެވެ. ނަމަވެސް މިކަމުން ސަލާމަތްވުމަށް އަންނަނިވި ކަންކަން ކުރެވިދާނެއެވެ. އެފަދަ ބައެއް ކަންކަމަކީ
- ލޮނު ފެނުން ކަރުދޮވުން: ތާފަނާ ފެން ތަށްޓަކަށް ސައިސަމުސަލެއްގެ ލޮނު އަޅައިގެން ކަރު ދޮވުމުން ހިލަތައް ދޫވެ ބޭރުވާން އެހީތެރިވެދެއެވެ.
- އަނގަ ސާފުކުރުން: ދުވާލަކު 2 ފަހަރު ދަތް އުނގުޅައި، ފްލޮސްކޮށް، އަދި ދުލުގެ ފަހަތް ސާފުކުރުން މުހިންމެވެ.
- ގިނައިން ފެންބުއިން: އަނގަ ހިކުނަނުދީ ބެހެއްޓުމަކީ ބެކްޓީރިއާ އުފެދުން މަދުކޮށްދޭނެ ކަމެކެވެ.
- ކެއްސުން: ބާރަށް ކެއްސާލުމުން ވެސް ބައެއް ފަހަރު ހިލަތައް ބޭރުވެއެވެ.
ޑޮކްޓަރަށް ދައްކަންޖެހޭނީ ކޮން އިރަކު؟
އަމިއްލައަށް ކުރާ ފަރުވާއިން ރަނގަޅުނުވާނަމަ، ނުވަތަ ކަރުތެރޭގައި ވަރަށް ބޮޑަށް ރިއްސައި ދިރުވަން އުނދަގޫވާނަމަ ލަސްނުކޮށް ޑޮކްޓަރަށް ދައްކާށެވެ. ވަރަށް ބޮޑަށް ގޯސްވާ ހާލަތްތަކުގައި ޓޮންސިލް ނެގުމަށް ޑޮކްޓަރު ލަފާދީފާނެއެވެ.
މައުލޫމާތު: ހެލްތުޑައިރެކްޓު
