އިރާން ހަނގުރާމަ ހުއްޓާލުމުގެ މަޝްވަރާތައް ޕާކިސްތާނުގައި ކުރިއަށްދަނިކޮށް ޕާކިސްތާނުގެ އަސްކަރީ ފައިޓަރ ޖެޓްތައް ސައުދީ އަރަބިއްޔާއަށް ފޮނުވައިފިއެވެ.
މިއީ މި އެއްބަސްވުމުގެ ދަށުން ޕާކިސްތާނުން އެޅި އަސްކަރީ ފުރަތަމަ ފިޔަވަޅެވެ.
ސައުދީ އަރަބިއްޔާގެ މިނިސްޓްރީ އޮފް ޑިފެންސުން ހާމަކުރި ގޮތުގައި، ފައިޓަރ ޖެޓްތަކާއި ސަޕޯޓް ޖެޓްތައް ހިމެނޭ މި ފްލީޓް ހޮނިހިރު ދުވަހު ވަނީ ސައުދީގެ އިރުމަތީ ޕްރޮވިންސްގައި އޮންނަ ކިންގް އަބްދުލްއަޒީޒް އެއާ ބޭސްއަށް ޖައްސާފައެވެ. މި ޖެޓްތައް ފޮނުވާފައިވަނީ 2025 ވަނަ އަހަރުގެ ސެޕްޓެމްބަރު މަހު ދެ ގައުމުގެ ދެމެދުގައި ސޮއިކުރި ދިފާއީ އެއްބަސްވުމުގެ ދަށުންނެވެ. މި އެއްބަސްވުމުގައިވާ ގޮތުން އެއް ގައުމަށް ދޭ ހަމަލާއަކީ އަނެއް ގައުމަށް ދޭ ހަމަލާއެއްގެ ގޮތުގައި ބަލައި، އެހީތެރިކަން ފޯރުކޮށްދޭން ޖެހެއެވެ.
މި އެއްބަސްވުމުގައި ސޮއިކުރީ މިދިޔަ ސެޕްޓެމްބަރު މަހު ޕާކިސްތާނުގެ ބޮޑުވަޒީރު ޝެހްބާޒް ޝަރީފް ރިޔާޒަށް ކުރެއްވި ދަތުރުގައި ސައުދީގެ ވަލީއަހުދު މުހައްމަދު ބިން ސަލްމާނާ ބައްދަލުކުރެއްވުމަށްފަހުއެވެ. ޕާކިސްތާނުގެ ޖެޓްތައް ސައުދީއަށް ޖެއްސި ވަގުތަކީ، ހަފުތާތަކަކަށް ދެމިގެން ގޮސްފައިވާ ހަނގުރާމަ ހުއްޓާލުމަށްޓަކައި އެމެރިކާ އާއި އިރާނުގެ އިސް ވަފުދުތަކާއެކު އިސްލާމްއާބާދުގައި ޕާކިސްތާނުން މެދުވެރިއެއްގެ ދައުރު އަދާކޮށްގެން މަޝްވަރާތައް ބާއްވަމުންދިޔަ ވަގުތެވެ.
ފެބްރުއަރީ 28 ވަނަ ދުވަހު އެމެރިކާ އާއި އިޒްރޭލު ގުޅިގެން އިރާނުގެ ރޫހީ ލީޑަރު އަލީ ޚާމަނާއީ އަވަހާރަކޮށްލުމާ ގުޅިގެން، ގަލްފުގެ ގައުމުތަކުގައި ހުރި އެމެރިކާގެ އަމާޒުތަކަށް އިރާނުން މިސައިލާއި ޑްރޯން ހަމަލާތައް ދޭން ފެށި ފަހުން، ޕާކިސްތާނުން ދަނީ ދެ ފަރާތުގެ މަސްލަހަތު ހިފެހެއްޓުމަށް މަސައްކަތް ކުރަމުންނެވެ.
ޕާކިސްތާނުގެ ފޮރިން މިނިސްޓަރު އިސްހާގު ދާރު ވިދާޅުވި ގޮތުގައި، ސައުދީއާއެކު ވެފައިވާ އެއްބަސްވުމުގެ ދަށުން ޕާކިސްތާނުން އަދާކުރަންޖެހޭ ޒިންމާތަކާ ގުޅޭގޮތުން މާޗް މަހުގެ ކުރީކޮޅު އޭނާ ވަނީ އިރާނުގެ ލީޑަރުންނަށް އަމިއްލައަށް އިންޒާރު ދެއްވާފައެވެ.
އިރާނަށް ހަމަލާދިނުމަށް ސައުދީގެ ބިން ބޭނުން ނުކުރާނެ ކަމުގެ ޔަގީންކަމަށް އިރާނުން އެދުނު ކަމަށާއި، އެ ޔަގީންކަން ހޯއްދަވައިދެއްވި ކަމަށް އިސްހާގު ދާރު ވިދާޅުވިއެވެ. ނަމަވެސް، ސައުދީގެ މުހިންމު އަސްކަރީ މަރުކަޒުތަކަށާއި އެމެރިކާ އެމްބަސީ ހުންނަ އިމާރާތަށް އަމާޒުކޮށް އިރާނުން ދޭ ހަމަލާތައް ކުރިއަށް ގެންދިޔަ އެވެ. މި ހަމަލާތައް ހުއްޓުވުމަށް އެއްބަސްވުމުގެ ދަށުން އެޅިދާނެ ފިޔަވަޅުތަކާ ބެހޭގޮތުން މަޝްވަރާ ކުރެއްވުމަށް ޕާކިސްތާނުގެ އާމީ ޗީފް ފީލްޑް މާޝަލް އާސިމް މުނީރު މާޗް މަހުގެ ކުރީކޮޅު ރިޔާޒަށް ވަޑައިގެންނެވިއެވެ. އަދި ހޮނިހިރު ދުވަހު ޖެޓްތައް ފޮނުވުމުގެ ހަތަރު ދުވަސް ކުރިން، ބޮޑުވަޒީރު ޝަރީފް ވަނީ ވަލީއަހުދަށް ފޯނުން ގުޅުއްވައި، ސައުދީއާއެކު ޕާކިސްތާނުން "ކޮނޑާއި ކޮނޑު ޖައްސައިގެން" ސާބިތުވެ އޮންނާނެ ކަމުގެ ޔަގީންކަން ދެއްވާފައެވެ.
މީގެ އިތުރުން، ސައުދީން ޕާކިސްތާނަށް ދިނުމަށް އެއްބަސްވެފައިވާ 5 ބިލިއަން ޑޮލަރުގެ އިންވެސްޓްމަންޓް ޕެކޭޖުގެ މަސައްކަތް އަވަސްކުރުމަށް ވެސް ދެ ގައުމުން ވަނީ އެއްބަސްވެފައެވެ.
ހޮނިހިރު ދުވަހުގެ ކުރީކޮޅު، ސައުދީ ފިނޭންސް މިނިސްޓަރު މުހައްމަދު އަލް-ޖަދާން ވަނީ އިސްލާމްއާބާދުގައި ބޮޑުވަޒީރު ޝަރީފާއި، އިސްހާގު ދާރު އަދި އާސިމް މުނީރާ ބައްދަލުކުރައްވާފައެވެ.
ސައުދީ އަރަބިއްޔާއަކީ ޕާކިސްތާނުގެ 2.5 މިލިއަނެއްހާ މަސައްކަތްތެރިން ދިރިއުޅޭ ގައުމެކެވެ. އެ މީހުން ފޮނުވާ ފައިސާއަކީ ޕާކިސްތާނުގެ ބަލިކަށި އިގްތިސާދު ހިފެހެއްޓުމަށް ލިބޭ ބޮޑު އެހީއެކެވެ. އަދި ސައުދީން ދަނީ ތަކުރާރުކޮށް ޕާކިސްތާނަށް މާލީ އެހީތެރިކަން ފޯރުކޮށްދެމުންނެވެ.
އިސްލާމްއާބާދުގައި ހުންނަ ސެކިއުރިޓީ އެނަލިސްޓެއް ކަމަށްވާ އިމްތިޔާޒް ގުލް އަލްޖަޒީރާއަށް ބުނި ގޮތުގައި، މި ޖެޓްތައް ފޮނުވުމަކީ އަސްކަރީ ގޮތުން ކުރިމަތިލުމަކަށް ދިއުމެއް ނޫނެވެ. ނަމަވެސް މިއީ ޕާކިސްތާނުން ސައުދީއަށް ވެފައިވާ އިގުރާރުތައް އިރާނަށް ހަނދާންކޮށްދިނުމަށް ކުރި ކަމެކެވެ. ސައުދީގެ އަމިއްލަ ވައިގެ ސިފައިންގެ ބާރު ހުރި ގޮތުން، ތިން ޖެޓް ފޮނުވުމަކީ އަސްކަރީ ގޮތުން މާ ބޮޑު ތަފާތެއް އަންނާނެ ކަމެއް ނޫން ކަމަށް އޭނާ ފާހަގަކުރިއެވެ.
އޭނާ އިތުރަށް ބުނީ، މިއީ މިހާރު ކުރިއަށްދާ މަޝްވަރާތަކުގައި އިރާނުން ދޫދިނުމަށް ބާރުއެޅުމުގެ ގޮތުން ދިން މެސެޖެއް ކަމަށާއި، ސައުދީއާއެކު އޮތް ސްޓްރެޓީޖިކް އެއްބަސްވުމުގެ ދަށުން ޕާކިސްތާނުން އަދާކުރަންޖެހޭ ޒިންމާތަކެއް ހުރިކަން ހާމަކޮށްދިނުމެއް ކަމަށެވެ.
އެޓްލާންޓިކް ކައުންސިލްގެ ސައުތު އޭޝިއާ ސީނިއާ ފެލޯ މައިކަލް ކުގަލްމަން އަލްޖަޒީރާއަށް ބުނި ގޮތުގައި، ޕާކިސްތާނުގެ މި ނިންމުމަކީ "ނުރައްކާތެރި އުކުޅެކެވެ."
ކުގަލްމަން ބުނި ގޮތުގައި، މިއީ އިރާނުން އެއްބަސްވުމަކަށް އައުމަށް ދޫނުދީ، ހަމަލާތައް އަލުން ފަށައި ވަރުގަދަކޮށްފިނަމަ، ޕާކިސްތާނުން ސައުދީއާ ގާތްވެ، ދިފާއީ އެއްބަސްވުމުގެ ބޭނުން ހިފާފާނެ ކަމުގެ އިންޒާރެއް އިރާނަށް ދިނުމެވެ.
