ވިލިމާލެ ފަޅުތެރެއަށް ފީނަން ގޮސް އުޅުނު 22 އަހަރުގެ ނޭޕާލް ޒުވާނަކު މިއަދު މަރުވެއްޖެ އެވެ.
ފުލުހުން ބުނީ އެ ޒުވާނާ ގެއްލުނުކަމުގެ ރިޕޯޓް ފުލުހުންނަށް މިއަދު ހެނދުނު 06:30 ގައި ލިބުމާއެކު އޭނާ ހޯދުމުގެ މަސައްކަތް ވިލިމާލެ ޕޮލިސް ސްޓޭޝަނާއި މެރިން ޕޮލިސް ގުޅިގެން ވަނީ ވަގުތުން ފަށާފައިވާ ކަމަށެވެ.
އޭނާ ހޯދުމުގެ މަސައްކަތް ކުރަމުންދަނިކޮށް ފެނުނީ 06:55 ހާއިރު ވިލިމާލެ ފަޅުތެރޭ މޫދު އަޑީގައި އޮއްވާ ކަމަށް ފުލުހުން ބުންޏެވެ.
މިގޮތުން އޭނާ ނަގައިގެން ވަގުތުން ވިލިމާލެ ހޮސްޕިޓަލަށް ގެންގޮސް ފަރުވާދޭން ފެށި ނަމަވެސް، ފަހުން ވަނީ މަރުވެފަ އެވެ.
ނޭޕާލަށް ނިސްބަތްވާ އެ ޒުވާނާ ފީނަން އެރި އުޅުނީ ކޮން ބަޔަކާއެކު ކަމެއް ނޭނގެ އެވެ. އެނާގެ މަރުގެ މައްސަލަ ފުލުހުން ވަނީ ތަހުގީގުކުރަން ފަށާފަ އެވެ.
މޫދަށް އެރި އުޅުމުގެ ތެރޭގައާއި ފީނަން އުޅުމުގެ ތެރޭގައި މިފަދަ ހިތާމަވެރި ހާދިސާތައް ހިނގުން އިތުރުވަމުންދާތީ، މޫދަށް އެރި އުޅުމުގައި ސަލާމަތީ ފިޔަވަޅުތަކަށް ސަމާލުކަން ދިނުމަށް ކަމާބެހޭ ފަރާތްތަކުން އަބަދުވެސް އިލްތިމާސް ކުރެއެވެ. ހާއްސަކޮށް އެކަނި މޫދަށް އެރި އުޅުމާއި، އެކަށީގެންވާ ވަސީލަތްތަކާ ނުލައި ފުން ސަރަހައްދުތަކަށް ފީނުމަކީ ނުރައްކާތެރި ކަމެކެވެ.
