އެމެރިކާގެ އެއްގަމު ސިފައިން އިރާނަށް އަރައިގަނެފާނެ ކަމުގެ ބިރު އޮތް ނަމަވެސް، އެފަދަ ހަމަލާއަކަށް ފުރިހަމައަށް ތައްޔާރުވެފައިވާ ކަމަށާއި އެއީ އެމެރިކާއަށް ކުރިމަތިވާނެ ބޮޑު ކާރިސާއަކަށް ވާނެ ކަމަށް އިރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވެއްޖެއެވެ.
އެންބީސީ ނިއުސްއަށް ދެއްވި އިންޓަވިއުއެއްގައި އަރަގްޗީ ވިދާޅުވީ، އިރާނުން ހަމަލާ ބަދަލުކުރުން ހުއްޓާލުމަށް އެދިފައި ނުވާނެ ކަމަށާއި، އެމެރިކާއާއެކު އިތުރު މަޝްވަރާތަކެއް ކުރުމުގެ ވިސްނުމެއް މިހާރު ނެތް ކަމަށެވެ.
އެމެރިކާގެ އެއްގަމު ސިފައިން އަރައިގަނެފާނެތީ ބިރުގަނޭތޯ ސުވާލުކުރުމުން، އަރަގްޗީ ވަރަށް ސާބިތުކަމާއެކު ޖަވާބު ދެއްވިއެވެ.
"ނޫން، އަހަރެމެން މިތިބީ އެމީހުންގެ އިންތިޒާރުގައި،" ބުރާސްފަތި ދުވަހު ދިން އިންޓަވިއުގައި އޭނާ ވިދާޅުވިއެވެ.
"ސަބަބަކީ އެމީހުންނާ ކުރިމަތިލެވޭނެ ކަމުގެ ފުރިހަމަ އިތުބާރު އަހަރެމެންނަށް އެބައޮތް. އަދި އެކަން ވެގެންދާނީ އެމީހުންނަށް ކުރިމަތިވާނެ ބޮޑު ކާރިސާއަކަށް."
މިދިޔަ ހޮނިހިރު ދުވަހު އެމެރިކާ އާއި އިސްރާއީލުގެ އަސްކަރިއްޔާއިން އިރާނަށް ދޭން ފެށި ވަރުގަދަ ހަމަލާތަކުގައި އިރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ ވަނީ އަވަހާރަކޮށްލާފައެވެ. އަދި އިރާނުގެ ދިފާއީ ނިޒާމުތަކަށް ބޮޑެތި ގެއްލުންތަކެއް ލިބިފައިވާކަމަށް ރިޕޯޓުތައް ބުނެއެވެ.
އަރަގްޗީ ފާހަގަކުރެއްވި ގޮތުގައި، ޖެނީވާގައި އެމެރިކާގެ މަންދޫބުންނާއެކު މަޝްވަރާތައް ކުރިއަށް ދަނިކޮށް ހަމަލާދިނުމަކީ އެމެރިކާގެ އިހުލާސްތެރިކަމެއް ނެތްކަން ހާމަވާ ކަމެކެވެ. އެހެންކަމުން ދެން އިތުރު ވާހަކަތަކެއް ދެއްކުމުގެ ބޭނުމެއް ނެތް ކަމަށް އޭނާ ވިދާޅުވިއެވެ.
މީގެ އިތުރުން، އިރާނުގެ މިނާބްގައި ހުންނަ ސްކޫލަކަށް ދިން ހަމަލާގައި 171 ދަރިވަރުން މަރުވި މައްސަލާގައި އަރަގްޗީ ވަނީ އެމެރިކާ އާއި އިސްރާއީލަށް ވަރަށް ބޮޑަށް ފާޑުވިދާޅުވެފައެވެ. އެމެރިކާއިން ބުނަމުންދަނީ އެއީ އިރާނުގެ އަމިއްލަ މިސައިލެއް އޮޅިގެން އެރި ހަމަލާއެއްތޯ ބަލަމުންދާ ކަމަށެވެ. ނަމަވެސް އަރަގްޗީ ވިދާޅުވީ އެއީ އެމެރިކާ ނުވަތަ އިސްރާއީލުގެ ހަމަލާއެއް ކަމަށެވެ.
ޚާމަނާއީ އަވަހާރަވުމާ ގުޅިގެން އިރާނުގެ ވެރިކަމަށް އަންނާނެ ބަދަލުތަކާ ބެހޭގޮތުން ވާހަކަ ދައްކަވަމުން އަރަގްޗީ ވިދާޅުވީ، އާ ވެރިއަކު ހޮވުމުގެ ކަންކަން ކުރިއަށްދާނީ ގާނޫނީ އުސޫލުތަކުގެ ތެރެއިން "އެސެމްބްލީ އޮފް އެކްސްޕާޓްސް" މެދުވެރިކޮށް ކަމަށެވެ.
ޚާމަނާއީގެ ދަރިކަލުން މުޖްތަބާ ޚާމަނާއީ ވެރިކަމަށް އަތުވެދާނެ ކަމަށް ދެކެވޭ ވާހަކަތަކަކީ މިވަގުތު ހަމައެކަނި ފެތުރެމުންދާ އަޑުތަކެއް ކަމަށް އޭނާ ވިދާޅުވިއެވެ. މި ހަނގުރާމައިގައި އެއްވެސް ބަޔަކަށް ކާމިޔާބެއް ނުލިބޭނެ ކަމަށާއި، އިރާނުގެ ކާމިޔާބީއަކީ އެގައުމުގެ މިނިވަންކަމަށްޓަކައި ސާބިތުވެ ތިބުން ކަމަށްވެސް އޭނާ ވިދާޅުވިއެވެ.
