ސްޕެއިންގައި އުމުރުން 16 އަހަރުން ދަށުގެ ކުޑަކުދިންނަށް ސޯޝަލް މީޑިއާ މަނާކުރުމަށް އެ ގައުމުގެ ސަރުކާރުން ނިންމައިފި އެވެ.
އުމުރު ކަށަވަރުކުރާ ހަރުދަނާ ވަސީލަތްތައް ގާއިމުކުރުމަށް ސޯޝަލް މީޑިއާ ޕްލެޓްފޯމްތަކަށް ސްޕެއިނުން ވަނީ އަންގާފަ އެވެ. މި ގާނޫނުތައް ފާސްކުރުމުގެ މަސައްކަތް އަންނަ ހަފުތާގައި ފަށާނެ އެވެ.
"އަޅުގަނޑުމެންގެ ދަރިން މި ހުށަހެޅެނީ އެކަނި ދަތުރުކުރަން ހަމަޖެހިފައިވާ ތަނަކަށް ނޫން. އެއީ ދެވިހިފުމާއި، އިހާނެތިކަމާއި، ފާހިޝް ކަންތައްތަކާއި، ނުފޫޒު ފޯރުވުމާއި އަދި އަނިޔާވެރިކަމުގެ މާހައުލެއް،" ސްޕެއިންގެ ބޮޑުވަޒީރު ޕެޑްރޯ ސަންޗޭޒް އަންގާރަ ދުވަހު ވިދާޅުވި އެވެ.
"އަޅުގަނޑުމެން ދެން އެކަން ގަބޫލެއް ނުކުރާނަން. ޑިޖިޓަލް 'ވައިލްޑް ވެސްޓް' އިން އަޅުގަނޑުމެން އެ ކުދިން ރައްކާތެރިކުރާނަން."
ދުބާއީގައި ބޭއްވި ވޯލްޑް ގަވަމަންޓް ސަމިޓްގައި ވާހަކަ ދައްކަވަމުން ސަންޗޭޒް ވިދާޅުވީ، ޣައިރު ގާނޫނީ ނުވަތަ ނަފުރަތު އުފައްދާ ކޮންޓެންޓްތައް ނުނަގައިފިނަމަ، ސޯޝަލް މީޑިއާގެ އިސްވެރިން ޖިނާއީ ގޮތުން ޒިންމާދާރުކުރުވުމަށް އާ ގާނޫނުތަކެއް އޭނާގެ ސަރުކާރުން ވުޖޫދުކުރާނެ ކަމަށެވެ.
މީގެ އިތުރުން ޑިޖިޓަލް ޕްލެޓްފޯމްތަކުން ބައިބައިވުން އުފައްދައި ނަފުރަތު ފަތުރާ މިންވަރު ދެނެގަނެ، މިނެކިރާ ނިޒާމެއް ގާއިމުކުރަން ވެސް ސްޕެއިނުން ދަނީ މަސައްކަތް ކުރަމުންނެވެ.
ޑިސެމްބަރު މަހު، އޮސްޓްރޭލިއާ ވެފައިވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރި ދުނިޔޭގެ ފުރަތަމަ ގައުމަށެވެ. އެ ގައުމުން ވަނީ ފޭސްބުކް، ޓިކްޓޮކް، އިންސްޓަގްރާމް، ސްނެޕްޗެޓް އަދި އެކްސް ހިމެނޭހެން 10 ޕްލެޓްފޯމަކަށް ވަނުން މަނާކޮށްފަ އެވެ.
އިނގިރޭސިވިލާތުން ވެސް މިފަދަ ފިޔަވަޅެއް އެޅުމަށް ވިސްނަމުންދާއިރު، ފްރާންސް އާއި ޑެންމާކުން ވަނީ 15 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން ހުއްޓުވުމުގެ ރޭވުންތައް ދާދިފަހުން އިއުލާނުކޮށްފަ އެވެ.
ޔޫރަޕްގެ އެހެން ގައުމުތަކުން ވެސް ދަނީ ސޯޝަލް މީޑިއާ ކުންފުނިތަކާ މެދު ހަރުކަށި ފިޔަވަޅުތަކެއް އަޅަމުންނެވެ.
