އިރާނަށް ބޮން އެޅުމަށް ސްޕެއިންގެ އަސްކަރީ މަރުކަޒުތައް ބޭނުންކުރުމުގެ ހުއްދަ ނުދިނުމުން އެ ގައުމާއެކު އޮތް ވިޔަފާރީގެ ގުޅުން ކަނޑާލާނެކަމުގެ އިންޒާރު އެމެރިކާގެ ރައީސް ޑޮނާލްޑު ޓްރަމްޕު ދެއްވި ނަމަވެސް އެމެރިކާގެ ހަނގުރާމައިގައި ބައިވެރިނުވާނެ ކަމަށް ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވިދާޅުވެއްޖެ އެވެ.
އެމެރިކާގެ އަސްކަރީ އުޅަނދުތަކަށް ސްޕެއިންގެ ބޭސްތަކުން ތެޔޮ އަޅައިގެން ދިޔުމުގެ ހުއްދަ ނުދޭން ސްޕެއިންގެ ސަރުކާރުން ވަނީ ނިންމާފަ އެވެ. އެ ނިންމުމާމެދު ޓްރަމްޕު ވަނީ ވަރަށް ބޮޑަށް ނުރުހުން ފާޅުކުރައްވާފަ އެވެ.
ބޮޑުވަޒީރު ސަންޗޭޒް ވިދާޅުވި ގޮތުގައި މިއީ އިންސާނިއްޔަތަށް ކުރިމަތިވާނެ ބޮޑު ކާރިސާއެކެވެ. އަދި މުޅި ދުނިޔެއަށް އޭގެ ސަބަބުން ބޮޑެތި ގެއްލުންތައް ލިބޭ ކަންކަމުގައި ސްޕެއިނުން ބައިވެރިއެއް ނުވާނެ އެވެ. އެއްވެސް ހަނގުރާމައަކަށް އެ ގައުމުން އެހީތެރިނުވާނެ ކަމުގެ ޔަގީންކަން ބޮޑުވަޒީރު ދެއްވި އެވެ.
ބޮން އަޅައިގެން ދުނިޔޭގެ އެއްވެސް ދެބަސްވުމެއް މިހާތަނަށް ހައްލުކުރެވިފައި ނުވާކަން ސަންޗޭޒް ފާހަގަކުރެއްވި އެވެ. އިރާގު ހަނގުރާމައިގެ ސަބަބުން އެތައް އަހަރެއްވަންދެން ދުނިޔެއަށް އެތަކެއް ނޭދެވޭ އަސަރުތަކެއް ކުރި ކަމަށް ވެސް ބޮޑުވަޒީރު ވިދާޅުވި އެވެ.
އެމެރިކާއިން ވިޔަފާރި ގުޅުން ކަނޑާލައިފި ހާލަތެއްގައި ވެސް ކުރާ އަސަރުތައް ކުޑަކުރުމަށް ފިޔަވަޅުތަކެއް އަޅާނެ ކަމަށާއި ބައިނަލްއަގުވާމީ ހަމަތަކަށް އެމެރިކާއިން ވެސް އިހުތިރާމް ކުރަން ޖެހޭނެ ކަމަށް ބޮޑުވަޒީރު ސަންޒޭޗް ވިދާޅުވި އެވެ.
ސްޕެއިނަކީ ވެސް ނޭޓޯގެ މެންބަރެކެވެ. އިރާނަށް ބޮން އެޅުން އެ ގައުމުން ވަނީ ކުށްވެރިކޮށްފަ އެވެ. ގިނަ ނޭޓޯ އަދި ޔޫރަޕު ގައުމުތަކުން އެ ހަމަލާތަކާ ގުޅިގެން ވާހަކައެއް ނުދައްކަ އެވެ.
