ދުނިޔޭގެ ބާޒާރުގައި ސާފުނުކުރާ ތެޔޮ ފީފާއެއްގެ އަގު 84 ޑޮލަރަށް އަރައިފި އެވެ.
ތެލުގެ އަގު އުފުލެން ފަށާފައި މިވަނީ އެމެރިކާ އާއި އިޒްރޭލުން އިރާނަށް ބޮން އަޅައި މެދުއިރުމަތި ހަނގުރާމައަކަށް ވައްޓާލުމާ ގުޅިގެންނެވެ.
އިރާނުން އަންނަނީ ރައްދުގައި މެދުއިރުމަތީގެ އެހެން ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި ތެޔޮ އުފައްދާ ކާރުހަނާތަކަށް އަމާޒުކޮށް ހަމަލާ ދެމުންނެވެ. މި ހަމަލާތަކާ ގުޅިގެން ބައެއް ކާރުހާނާތައް ވަނީ ބަންދުކޮށްފަ އެވެ.
އިރާނާއި ގަލްފުގެ ގައުމުތަކާ ދެމެދު އޮންނަ ހޮރުމޫޒު ކަނޑުއޮޅިން ދުނިޔޭގެ ތެލުގެ ސަޕްލައިގެ ބޮޑު ބައެއް ދަތުރުކުރާއިރު އެ ކަނޑުއޮޅިން ކުރާ ދަތުރުތައް ވަނީ އެއްކޮށްހެން ހުއްޓިފަ އެވެ.
ދެވަނައަށް އެންމެ ގިނައިން ތެޔޮ އުފައްދާ ގައުމު ކަމަށްވާ އިރާގުން ވެސް ވަނީ ތެޔޮ އުފައްދާ މިންވަރު 1.5 މިލިއަން ފީފާއިން މަދުކޮށްފަ އެވެ. ތެޔޮ އެކްސްޕޯޓު ނުކުރެވޭނަމަ ތެޔޮ އުފައްދަން ހުއްޓާލަން ޖެހިދާނެ ކަމަށް އިރާގުން ބުނެ އެވެ.
ޖޭޕީ މޯގަން ފަދަ ދުނިޔޭގެ އިންވެސްޓްމަންޓް ބޭންކުތަކާއި އިގްތިސާދީ ދިރާސާ ކުރާ އިދާރާތަކުން ލަފާކުރާ ގޮތުގައި، ހޮރުމުޒް ކަނޑުއޮޅި މުޅިން ބަންދުކޮށް، އަސްކަރީ ކުރިމަތިލުންތައް އިތުރުވެއްޖެނަމަ، ދުނިޔޭގެ ބާޒާރުގައި ތެލުގެ އަގު ފީފާއަކަށް 120 އާއި 130 ޑޮލަރަށްވުރެ މައްޗަށް އަރާނެ އެވެ.
