އެފްއޭއެމް ވިމެންސް ފުޓްބޯލް ލީގުގައި މާޒިޔާ ސްޕޯޓްސް އެންޑް ރެކްރިއޭޝަން އަށް ކުޅޭ ނޭޕާލް ގައުމީ އަންހެން ފުޓްބޯޅަ ޓީމުގެ ކެޕްޓަން، ދީޕާ ޝާހީގެ ފަސް ގޯލާ އެކު، އެ ޓީމުން 10-0 އިން ޓީސީ ސްޕޯޓްސް ކްލަބް އަތުން މޮޅުވެއްޖެ އެވެ.
ހަ ޓީމު ވާދަކުރާ ވިމެންސް ފުޓްބޯލް ލީގުގައި މިހާތަނަށް ހަތަރު ޓީމަކުން ތިން މެޗު ވަނީ ކުޅެފަ އެވެ. އެ ގޮތުން، އެއް ވަަނައިގައި އޮތް އޮޑި ސްޕޯޓްސް ކްލަބާއި ދެ ވަނައިގައި އޮތް މާޒިޔާ އަށް ވަނީ ހަތް ޕޮއިންޓް ލިބިފަ އެވެ. އޮޑި ކުރީގައި އޮތީ ލަނޑުގެ ތަފާތުންނެވެ.
ލީގުގައި މާދަމާ ހަވީރު ކުޅޭނީ، ތިން ވަނައިގައި އޮތް ވިކްޓަރީ ސްޕޯޓްސް ކްލަބާއި ހަތަރެއްގައި އޮތް ނިއު ރޭޑިއަންޓް ސްޕޯޓްސް ކްލަބް އެވެ. ދެ ޓީމަށް ވެސް ވަނީ ދެ މެޗުން ހަތަރު ޕޮއިންޓް ލިބިފަ އެވެ.
ހެންވޭރު ދަނޑުގައި މިއަދު ހަވީރު ކުޅުނު މެޗުގައި، މާޒިޔާ އިން ވަނީ ފުރަތަމަ ހާފުގައި، ތިން ގޯލު ޖަހައިފަ އެެވެ. އެ ޓީމުން ލީޑުނެގީ، ޓީސީގެ ފާތިމަތު ތާނީ ލަތީފް އަތުން ބައިކޮޅަށް ވަން ގޯލުންނެވެ. ދެ ވަނަ ލަނޑު ޖަހައިދިނީ، 14 ވަނަ މިނިޓްގައި ޓީމުގެ ކެޕްޓަން، އައިޝަތު ސަމާ އެވެ. އަދި، ފުރަތަަމަ ހާފުގެ އިތުރު ވަގުތުގެ ތެރޭގައި ދީޕާ ވަނީ މާޒިޔާގެ ތިން ވަނަ ލަނޑު ޖަހައިފަ އެވެ.
މާޒިޔާގެ ކެޕްޓަން ސަހާ ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އަދަދު ސްޕޯޓްސް/ އިމޭޖަސް.އެމްވީ
ދެ ވަނަ ހާފުގައި މާޒިޔާ އިން ޖެހި ހަތް ގޯލުގެ ތެރެއިން ހަތަރު ލަނޑު މެޗުގެ މޮޅު ކުޅުންތެރިޔާގެ މަގާމު ހޯދި ދީޕާ ޖެހިިއިރު، އަނެއް ލަނޑުތައް ޖެހީ ނޭޕާލް ގައުމީ ޓީމުގެ ރޭކާ ޕޮއުޑެލް ވަނީ ދެ ލަނޑު ޖަހައިފަ އެވެ. އަދި، މާޒިޔާގެ ފާތިމަތު އިނާޔާ ވެސް ވަނީ ލަނޑެއް ޖަހައިފަ އެވެ.
މިއީ، މި ފަހަރުގެ ވިމެންސް ފުޓްބޯޅަ ލީގުގައި ފެނިގެންދިޔަ އެންމެ ފަރަގު ބޮޑު ނަތީޖާ އެވެ. މި ފަހަރުގެ މުބާރާތަކީ، 2014 ވަނަ އަހަރުގެ ފަހުން އެފްއޭއެމް އިން ކްލަބްތަކަށް ބާއްވާ ފުރަތަމަ ފުޓްބޯޅަ މުބާރާތެވެ.
މިއަދުގެ ނަތީޖާއާ އެކު، ޓީސީ އޮތީ ތާވަލުގެ އެންމެ ފުލުގަ އެވެ. އަދި، ޓީސީއާ އެކު ބިސް ބުރު ވެސް ވަނީ ލީގުގައި މިހާތަނަށް އެ ޓީމުން ކުޅުނު ތިން މެޗުން ވެސް ބަލިވެފަ އެވެ. ޓީސީގެ ގެއްލުން 23 ގޯލު އޮތްއިރު، ބިސް ބުރުގެ ގެއްލުން 15 ގޯލު އެބައޮތެެވެ.
