ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމްކޮށްގެން ކުރިއަށްގެންދިޔަ، ޓީ20 ޕްރެޒިޑެންޓް ކަޕްގެ ޗެމްޕިއަންކަން މާލޭ ސްޕޯޓްސް ކްލަބުން ހޯދައިފި އެވެ.
އިއްޔެ ކުޅުނު ފައިނަލުގައި، މާލޭ ސްޕޯޓްސް އިން ތަށި އުފުލާލީ، މިދިޔަ އަހަރުގެ ޗެމްޕިއަން ސީބީއެލްއާ ބައްދަލުކޮށް 4 ވިކެޓުން މޮޅުވެގެންނެވެ.
ކުޅިވަރު އެކުވެނި ކްރިކެޓް ދަނޑުގައި ކުޅުނު މެޗުގައި، ގުރުދިމާވުމުން ސީބީއެލް ގަސްދުކުރީ ކުޅުމަށެވެ.
ސީބީއެލް އިން ކުޅެންއަރައި، 20 އޯވަރު ހަމަވިއިރު ނުވަ ކުޅުންތެރިން ނުބައިވެގެން ހެދީ 127 ލަނޑެވެ. އެ ގޮތުން، ސީބީއެލްގެ އަސާން ޔަޕާ 39 ބޯޅައިން 52 ލަނޑު ހެދިއިރު، ސަވިންދަ ވަނީ 13 ބޯޅައިން 17 ލަނޑު ހަދައިފަ އެވެ. މި އިނިންސްގައި، މާލޭ ސްޕޯޓްސް ކުލަބްގެ މުހައްމަދު މަހަފޫޒު ވަނީ 27 ލަނޑަށް ތިން ވިކެޓް ނަގައިފަ އެވެ. އަދި، އިރުފާން އާއި ސިޔާމް ކޮންމެ ކުޅުންތެރިއަކު، ދެ ވިކެޓް ނެގި އެވެ.
ޖަވާބުގައި މާލޭ ސްޕޯޓްސް ކަލްބް ކުޅެންއަރައި ހަ ކުޅުންތެރިން ނުބައިވެގެން 18 ވަނަ އޯވަރުގައި 130 ލަނޑު ހަދައި މެޗުން މޮޅުވި އެވެ. މާލެ ސްޕޯޓްސް ކްލަބަށް މި މެޗުގައި، މޮޅު ކުޅުމެއް ދެއްކި، މުހަންމަދު ރިސްވާން 46 ބޯޅައިން 61 ލަނޑު ހެދިއިރު، އަބްދުލް ހަލީގް ވަނީ 21 ބޯޅައިން 29 ލަނޑު ހަދައިފަ އެވެ.
މި އިނިންސްގައި، ސީބީއެލް އަށް ހަރުޝަ އާއި ޕްރަގީތް ކޮންމެ އުކުންތެރިއެއް ދެ ވިކެޓް ނެގި އެވެ.
މުބާރާތުގެ ވަނަތަކަށް ބަލާއިރު، ޕްރިމިއާ ލީގްގެ އެންމެ މޮޅު ކުޅުންތެރިއަކަށް ހޮވުނީ މާލޭ ސްޕޯޓްސް ކްލަބް އިސްމާއިލް އަލީ، އެންމެ މޮޅު އުކުންތެރިއަކަށް ހޮވުނީ ސީބީއެލްގެ ޕަންޑުކާ ހޮވުނުއިރު، އެންމެ މޮޅު ހޮވުންތެރިއަކަށް ހޮވުނީ އެމްއެސް އެކަޑަމީގެ ދިލްޝާން އެވެ. އަދި، އެންމެ އުންމީދީ ކުޅުންތެރިއަކަށް ހޮވުނީ މިލާން ކްރިކެޓް އެކަޑަމީގެ މުހަންމަދު ރަޔާން ތޮލާލް އެވެ. މީގެ އިތުުރުން، މުބާރާތުގެ ހުރިހާގޮތަކުން އެންމެ މޮޅު ކުޅުންތެރިއަކަށް ހޮވުނީ ސީބީއެލްގެ ރުވާން ތާރަކައެވެ.
ޓީ20 ޕްރެޒިޑެންޓްސް ކަޕަކީ، ޓީ20 ޕްރިމިއާ ލީގުގެ ގަދަ ހަތަރު ޓީމުގެ މެދުގައި ކުޅޭ މުބާރާތެކެވެ. ސީބީއެލް އިން ފައިނަލަށް ދަތުރުކުރީ، ޕްރިމިއާ ލީގުގެ ޗެމްޕިއަން، މިލާން ކްރިކެޓް އެކަޑަމީ ބަލިކޮށްފަ އެވެ. އަދި، މާލެ ސްޕޯޓްސް އިން ވަނީ ފައިނަލުގެ ޖާގައެއް ހޯދަން ފުރަތަމަ މެޗުގައި، ނިއު ސްޓާ ބަލިކޮށްފަ އެވެ. އަދި، މިލާންގެ މައްޗަށް ވެސް ކުރިހޯދި އެވެ.
