ފޯރިގަދަ މެޗަކަށް ފަހު އެއް ލަނޑުން، މިލާން ކްރިކެޓް އެކެޑަމީ ބަލިކުރުމަށް ފަހު، ޓީ20 ޕްރެޒިޑެންޓްސް ކަޕްގެ ތަށި ސީބީއެލް އިން އަނެއްކާ ވެސް ހޯދައިފި އެވެ.
މިއީ މި މުބާރާތް ބޭއްވި ތިން ވަނަ ފަހަރެވެ. ސީބީއެލް އިން ތަށި ހޯދާފައި މި ވަނީ ދެ ވަނަ ފަހަރެވެ.
ޓީ20 ޕްރިމިއާ ލީގުގެ ގަދަ ހަތަރު ޓީމު ކުޅޭ ޕްރެޒިޑެންޓްސް ކަޕްގެ ޗެމްޕިއަންކަން 2022 ވަނަ އަހަރު ސީބީއެލް އިން ހޯދިއިރު، ސެމީގައި ވަނީ މިލާން ކްރިކެޓް އެކެޑަމީ ބަލިކޮށްފަ އެވެ. މިދިޔަ އަހަރު މުބާރާތުގެ ޗެމްޕިއަންކަން، ހޯދީ މިލާން ކްރިކެޓް އެެކެޑަމީންނެވެ. އެއީ މާލެ ވެޓަރަންސް ބަލިކުރުމަށް ފަހު އެވެ.
އެ ގޮތުން، ސީބީއެލް އިން 2022 ވަނަ އަހަރުގެ ފައިނަލުގައި 17 ލަނޑުން މާލޭ ސްޕޯޓްސް ކްލަބް ބަލިކޮށް ތަށި އުފުލާލިއިރު، މި ފަހަރުގެ ފައިނަލު ދިޔައީ ވަރަށް ފޯރިގަދަކޮށެވެ. ފަހު ބޯޅައާ ހަމައަށް އެ ޓީމުގެ އަތުން، ތަށި ގެއްލުމުގެ ފުރުސަތު އޮތެވެ.
ކުޅިވަރު އެކުވެނި ކްރިކެޓް ދަނޑުގައި މިއަދު މެންދުރު ފަހު ކުޅުނު ފައިނަލް މެޗުގައި، ޓޮސް ދިމާވުމުން ސީބީއެލް އިން ނިންމީ ކުޅެން އަރާށެވެ. އެ ގޮތުން، ސީބީއެލް އިން 20 އޯވަރުގެ ތެރޭގައި ވަނީ އަށް ކުޅުންތެރިން ނުބައިވެގެން، 167 ލަނޑު ހަދައިފަ އެވެެ. އެ ޓީމަށް އެންމެ ރަނގަޅު ކުޅުމެއް ދެއްކީ، 33 ބޯޅައިން 56 ލަނޑު ހެދި ކައުޝަލް ރޮޑްރީގޯ އެވެ. ދެން، އެ ޓީމުގެ ސަމިތާ ފެނާންޑޯ ވަނީ 35 ބޯޅައިން 36 ލަނޑު ހަދައިފަ އެވެ.
ސީބީއެލް އާއި މިލާން ކުޅުނު މެޗުގެ ތެރެއިން.--- ފޮޓޯ: އަތޫފް އާތިފް / އަދަދު
މި އިނިންގްސްގައި، މިލާން ކްރިކެޓް އެކެޑަމީގެ އިސްމާއިލް ނަޒްވާން ވަނީ ތިން ވިކެޓް ނަގައިފަ އެވެ.
ޖަވާބުގައި ކުޅެން އަރައި، މިލާނަށް 20 އޯވަރު ހަމަވިއިރު، ނުވަ ކުޅުންތެރިން ނުބައިވެގެން ހެދުނީ، 166 ލަނޑެވެ. އެންމެ ރަނގަޅަށް ކުޅުނީ، މުބާރާތުގައި އެންމެ ގިނަ ލަނޑު އެއްކުރި، ޔޫސުފް އަޒްޔާން އެވެ. އަޒްޔާން ވަނީ ފައިނަލް މެޗުގައި، 38 ބޯޅައިން 63 ލަނޑު ހަދައިފަ އެވެ. އަށް ފަހަރު ހަތަރަކަށް ޖެހިއިރު، ދެ ފަހަރު ހަޔަކަށް ޖެހި އެވެ. މިލާން ޓީމަށް ދެން އެންމެ ރަނގަޅު ކުޅުމެއް ދެއްކީ، 41 ބޯޅައިން 41 ލަނޑު ހެދި އަހުމަދު ހަސަން އެވެ.
ސީބީއެލް މޮޅުކޮށްދިނުމުގައި މި އިނިންސްގައި އެންމެ ބޮޑު ތަފާތެއް ދެއްކީ، ހަތަރު އޯވަރަށް ހަތަރު ވިކެޓް ނެގި، މަލިތު ޑި ސިލްވާ އާއި ތިން ވިކެޓް ނެގި، ހަރްޝާ އަމަރްސިންހޭ އެވެ. މެޗުގެ މޮޅު ކުޅުންތެރިއަކީ ވެސް، ހަރްޝާ އެވެ.
ފައިނަލް މެޗުގެ ޝަރަފްވެރި މެހެމާނަކީ ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) އެވެ. މީގެ އިތުރުން، ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ރައީސް، މުހައްމަދު ފައިސަލް އާއި އެ އެސޯސިއޭޝަންގެ ނައިބު ރައީސް، އަހުމަދު ހުސެއިން (ދޮނާ) ވަނީ ބައިވެރިވެވަޑައިގެންފަ އެވެ.
