މެންޗެސްޓާ (ފެބްރުއަރީ 21) - މި ވަގުތުގެ ހާލަތަށް ބަލާއިރު، މެންޗެސްޓާ ޔުނައިޓެޑްގައި ހައްލު ހޯދޭނެ ކަންކަމަށް ވުރެ ގިނައީ މައްސަލަ ކަމަށް އެ ޓީމުގެ ކޯޗު ރުބެން އަމޮރިމް ބުނެފި އެވެ.
ޔުނައިޓެޑުން ސީޒަން ފެށީ، ނެދަލެންޑްސްގެ ކޯޗު އެރިކް ޓެން ހާގާ އެކު އެވެ. އާ އެއްބަސްވުމެއް ދީގެން ޓެން ހާގާ އެކު، ސީޒަން ފެށި ޔުނައިޓެޑުން މީގެ ހަތަރު ވަރަކަށް މަސް ކުރިން، ސްޕޯޓިން ލިޒްބަންގައި ހުރި ޒުވާން ކޯޗު އަމޮރިމް ގެނެސް ޓީމު ހަވާލުކުރި އެވެ. އެކަމަކު، ޔުނައިޓެޑުގެ ހާލަތު ރަނގަޅު ކުރަން އަމޮރިމް ކުރާ މަސައްކަތުގައި އަދި ދެެމެހެއްޓެނިވި ނަތީޖާތަކެއް ނުނެރެވެ އެވެ.
މި ފަހަރު ލީގުގައި ޔުނައިޓެޑް ކުޅުނު 25 މެޗުގެ ތެރެއިން 12 މެޗުން ބަލިވިއިރު، އަމޮރިމް ހަވާލުވި ފަހުން ކުޅުނު 14 މެޗުގެ ތެރެއިން، އެ ޓީމު މޮޅުވީ އެންމެ ހަތަރު މެޗުންނެވެ. ލީގުގައި މި ހަފްތާގައި ޔުނައިޓެޑުން ލީގުގައި ކުޅޭނީ އެވަޓަންއާ އެވެ. އެވަޓަންގެ ކޯޗުކަމާ އެ ޓީމާއި ކުރިން ޔުނައިޓެޑަށް އިރުޝާދުދިން ޑޭވިޑް މޮއިސް ހަވާލުވެ، ރަނގަޅު މަސައްކަތްތަކެއް އަންނަނީ ކުރަމުންނެވެ.
"ބައެއް ފަހަރު ޓީމު ރަނގަޅުވާ ކަމުގެ އިހުސާސް ވެސް ކުރެވޭ. ރަނގަޅު ކަންކަން ވެސް ކުރެވޭ. އެކަމަކު، ޖުމްލަ މަންޒަރަށް ބަލާއިރު، އަހަންނަށް ޔުނައިޓެޑްގައި ހައްލުތަކަށް ވުރެ މައްސަލަތައް ގިނަކޮށް ފެންނަން އޮތީ، މިއީ ވަގުތު ނަގައިގެން ރަނގަޅުކުރެވޭނެ ކަންކަން،" އަމޮރިމް ބުންޏެވެ.
ޔުނައިޓެޑާ އެކު، 2027 ވަނަ އަަހަރުގެ ޖޫންގެ ނިޔަލަށް ކޮންޓްރެކްޓް އޮތް އަމޮރިމް ބުނީ، މި ވަގުތު ޔުނައިޓެޑަށް އެވަޓަންއާ ކުޅެން ވެސް އުނދަގޫވާނެ ކަމަށެވެ. ސަބަަބަކީ، އެވަޓަން އަކީ މި ވަގުތު ލީގުގައި އެންމެ އިތުބާރާ އެކު ކުޅޭ އެއް ޓީމުގެ ގޮތުގައި ނަތީޖާތަކުން ފެންނަން އޮތް ކަމަށެވެ.
ލީގުގެ 15 ވަނައިގައި އޮތް ޔުނައިޓެޑަށް 29 ޕޮއިންޓް ލިބިފައިވާއިރު، 14 ވަނައިގައި އޮތް އެވަޓަން އަށް ވަނީ 30 ޕޮއިންޓް ލިބިފަ އެވެ.
